د اسلامي نظامونو په وړاندي د منافقينو دسيسې:(دويمه برخه)

ليکنه: مولوي نورالحق مظهري.
لکه څنګه چي د رسول الله صلی الله عليه وسلم په زمانه کي منافقينو د اسلام او مسلمانانو پر ضد خپل ناوړه کارونه کول د هغه د وفات وروسته يې نور هم خپلو کارونو ته کش ورکړ او د دې لپاره چي د رسول الله صلی الله عليه وسلم په لاس جوړ سوی اسلامي نظام ړنګ کړي او د اسلام د پرمختګ مه ونيسي د صحابه وو په زمانه کي يې هم خپل منافقت ته دوام ورکړ او د وخت اسلامي نظام يې د ګڼو ننګونو سره مخ کړ.
د رسول الله صلي الله عليه وسلم په زمانه کي ډېرو منافقينو ظهور نسو کولای خو کله چي رسول الله صلی الله عليه وسلم وفات سو ځينو يې سر راپورته کړ او د وخت حاکم اسلامي نظام پر ضد يې بغاوت وکړ چي لويه بېلګه يې د زکات څخه انکار وو او بيا ارتداد وو.
د رسول الله صلی الله عليه وسلم په زمانه کي ځينو خلګو لکه اسد او غطفان قبيلو زکاتونه په اخلاص نه آداء کول چي همدې خبري ته په قرآن شريف کي هم اشاره سوېده: وَمِنَ الْأَعْرَابِ مَنْ يَتَّخِذُ مَا يُنْفِقُ مَغْرَمًا وَيَتَرَبَّصُ بِكُمُ الدَّوَائِرَ عَلَيْهِمْ دَائِرَةُ السَّوْءِ وَاللَّهُ سَمِيعٌ عَلِيمٌ.[التوبة98] ژباړه: ځيني د اعرابو هغه کسان دي چي د الله په لاره کي مال مصرفول تاوان ګڼي او ستاسي لپاره آفتونو ته انتظار کوي، پر دوی باندي به بد آفت وي او الله تعالی اورېدونکی او باخبر دی.
په تفاسيرو کي راځي چي دغه آيت د دوی په باره کي نازل سو چي په اخلاص يې زکات نه ورکوی، کله چي ابوبکر رضي الله عنه خليفه وټاکل سو دوی وړانديز ورته وکړ چي زموږ څخه زکات معاف کړي خو ابوبکر رضي الله عنه د دوی خبره و نه منل او زکات يې ورته معاف نه کړ هغه وو چي د خپل قوم پر يوه سړي طليحة الاسدي باندي راټول سوه چي هغه د پيغمبرۍ دعوه کړېوه چي هغه بيا د خالد بن وليد رضي الله عنه سره په جګړه کي ماتي وخوړل او بيرته مسلمان سو.
مؤرخينو ليکلي دي چي دا د منافقينو په دسيسه يو لوی سياسي ارتداد وو چي هدف يې د اسلامي نظام دړي وړي کېدل او د عربو ټوټه ټوټه کېدل وو تر څو اسلامي نظام ړنګ سي او يا هم لږترټږه د پرمختګ مخه يې ونيول سي خو الله تعالی د ابوبکر رضي الله عنه او نورو صحابه وو په قوي ايمان او جديت سره دا دسيسه شنډه کړه.
بايد ووايو چي د دين څخه د مسلمانانو اړول د منافقينو لوی هدف دی چي هم يې د رسول الله صلی الله عليه وسلم په زمانه کي د لاس ته راوړلو کوښښ کوی او هم يې د صحابه وو په وخت کي کوی؛ دا ځکه چي د مسلمانانو د يووالي او اتحاد محور يواځي دين دی تر څو چي دوی پر دين سره راټول وي هيڅ وخت يې په مينځ  کي تفرقه او درځ نه راځي خو که د دين څخه واووښتل بيا به يې په مينځ کي هر ډول طبقاتي توپيرونه، ژبني تبعيضونه، قومي شخړي او سيمه ايز وېشونه راځي چي په نتيجه کي به د هر ډول قوي او خپلواک نظام څخه محروم وي؛ چي دا ترخه تجربه مو د اسلامي خلافتونو له ړنګېدلو څخه بيا تر اوسه په خپلو حواسو او ذائقو ليدلې او څکلې ده.
د ابوبکر رضي الله څه وروسته چي حضرت عمر رضي الله عنه خليفه سو بيا هم منافقين آرام نه وه ناست خو د حضرت عمر رضي الله عنه الهي رعب پر دوی غالب سوی وو ځکه يې نو په چټکۍ او زغرده کوم کار نسو کولای.
د حضرت عمر رضي الله عنه د شهادت پلان هم دوو منافقينو جوړ کړ او امکانات يې د ابولؤلؤ مجوسي په لاس ورکړ تر څو چي يې عمر رضي الله عنه په شهادت ورسوی.
د تاريخ په کتابونو کي راځي: هرمزان د فارس د حاکمانو څخه يو حاکم وو کله چي مسلمانانو ګير کړ نو ده په ښکاره د حضرت عمر رضي الله عنه مخ ته ايمان راوړ خو په اصل کي يې د حضرت عمر رضي الله عنه وژلو ته فرصت جوړوی ځکه نو ډېر وختونه د حضرت عمر رضي الله عنه څخه نه جلا کېدی هغه وو چي زهرجن خنجر يې جوړ کړ او د ابولؤلؤ مجوسي په لاس يې ورکړ هغه حضرت عمر رضي الله عنه ورباندي شهيد کړ، دويم منافق د حيرې اوسېدونکی جفينة نصراني وو چي سعد بن ابي وقاص رضي الله عنه مدينې منورې ته را لېږلی وو تر څو مسلمانانو ته ليکل او لوستل ور زده کړي خو هغه بدمرغه د هرمزان سره په ګډه د حضرت عمر رضي الله عنه د شهادت پلان جوړ کړ.
د اوږد تاريخ په پاڼو کي دا يوه وړوکې بېلګه ده؛ خو که موږ تاريخ وګورو دا به راته ثابته سي چي د هر مسلمان رهبر په وژلو، متهم کولو او ضعيف کولو کي د منافقينو لاس دی په خاصه توګه هغه منافقين چي اصليت يې يهودي وي ځکه يهودان بيا په شيطنت، منافقت او دسيسه جوړولو کي خورا ډېره لويه سابقه لري.
دوام لري....

در مورد بحث و مناظره:

در موضوع مناظره و استدلال رتبه علمی، درجه درک، لیاقت تخاطب جانب مقابل شرط و ضروری میباشد زیرا با اشخاص نافهم، بدزبان، منکر مطلق مناظره و استدلال هیچ معنی و هیچ فایده ی ندارد چونکه اینها از همان گروه سفسطه خواه هستند که مثبت و منفی را در دیده محدود خود حصر کرده اند و همیشه در سنگر انکار نشسته اند و در مقابل هر سخنی که مخالف خواهشات نفسانی او باشد میگوید: قبول نمی کنم، نمی پذیرم، برای من قابل قبول نیست و I don't accept it.

این قسم مردم در اصل اهلیت مناظره و بحث را ندارند و هیچ عاقل وقت گرانبهای خویش را در بحث باچنین مردم ضایع نمی کند.

استدلال و مناظره باکسی نتیجه میدهد که دارای عقل سالم بوده، درک قوی دارد، قوه انفعال و تأثر در مقابل حق را دارد، دارای طبیعت سالم انسانی که عبارت از حلم و بردباری باشد تنها به حواله دلیل و و جود شبهات مسلم در جهت مخالف قرار گرفته باشد.

چونکه در بحث نیاز به تفاسیر و تعبیرات واژه ها است بناء به استثناء دین و اسلام در موارد دیگر نیاز به وحدت دین است چونکه با اختلاف دین تعبیرات و تعریفات مختلف میشود که در هیچ صورت توافق صورت نمی گیرد.

مثلا اگر ما روی واژه مساوات صحبت بکنیم در بین کافر و مسلمان امکان بحث نیست چونکه تفسیر مساوات در اسلام و کفر متفاوت است.

و سخن مهم اینکه جانب مقابل متعصب نباشد زیرا تعصب انسان را گونگ، کر و کور میکند که در نتیجه هیچ حقیقت را نمی بیند.

و سخن آخری اینکه جانب مقابل صاحب جوش منفی و جذبات نفسانی نباشد زیرا جوش هوش را از بین میبرد و جذبات نفسانی انسان را در ورطه هلاکت میاندازد.

مولوی نورالحق مظهری

نور به مدرسې او پوهنتونونه سره يو وي:

لکه څنګه چي په اصل کي بايد د مدرسو او پوهنتونونو ترمينځ واټن او فاصله نه وي د اسلامي امارت د حاکميت څخه بيا تر اوسه پوري پر همدې باندي کار روان دی چي څنګه د مکاتبو، پوهنتونونو او مدرسو ترمينځ واټن له مينځه ولاړ سي او هر يوه ته د اسلامي ښوونيز مرکز په سترګه وکتل سي؟ د دې هدف لپاره د نظام او وزارتونو په کچه ډېر ښه د پام وړ چټک ګامونه پورته سوي دي.

د دې لپاره چي موږ په خپل علمي ډګر کي ځانونه تکامل او بسايني ته ورسوو دا لازمه ده چي علمي مرکزونه د کميت او کيفيت په برخو کي پياوړي کړو او د ديني او عصري علومو په نوم د علومو او مراکزو ترمينځ واټن له مينځه يوسو تر څو مو د الله تعالی د رضايت او خپل وطن، خلګو او نظام ته د خدمت لپاره هڅي نوري هم چټکي سي او پوره نتيجه ورکړي.

د ديني او طبيعي دواړو علومو زده کول د مسلماني ټولني اړتيا ده ځکه نو د همدغه علومو ترمينځ يا د هغو د ښوونځايونو تر مينځ درځ او واټن ته په اسلام کي هيڅ ځای نسته بلکي ټول بايد د زده کړو مرکزونه وبلل سي او د هر ډول پرمختګ لپاره يې کوټلي ګامونه پورته سي.

دا انځور چي وينی په فراه ولايت کي د 16 ديني مدرسو د پګړۍ تړلو د ګډي غونډي چي د فراه ولايت په مرکزي عيدګاه کي جوړه سوې وه د يوې برخي انځور دی چي د فراه ولايت لوړو زده کړو مؤسسې استاذان او محصلين پکې ښکاري؛ د فراه ولايت لوړو زده کړو مؤسسې استاذانو او محصلينو په ياده غونډه کي په ډېره لوړه کچه ګډون کړی وو او پر يوه پرده يې چي د ځانونو سره يې راوړې وه په دري ژبه داسي ليکلي وه: اتحاد وهمفکري مدرسه و پوهنتون محصول جهاد است. يعني د مدرسې او پوهنتون فکري يووالی د جهاد نتيجه ده؛ وروسته يې بيا په پښتو ژبه ليکلي وه: دين مو اسلام، مذهب مو حنفي،  سياست مو امارت، عزت مو جهاد او بريا مو اتفاق دی.

که د ديني مدرسو او پوهتونونو تر مينځ روابط همداسي دوام وکړي نو ډېر ژر به ان شاء الله د مدرسو او پوهنتونونو تر مينځ د پخوا څخه راپاتي منفي واټنونه ختم سي او ټولو ته به يواځي د علمي مرکزونو او انسان جوړوني  اساسي ځايونو په سترګه وکتل سي.

د اسلام د ابتداء څخه بيا د مسلمانانو د زبرځواکۍ او امپراطورۍ تر ختمېدلو پوري په تعليمي برخه کي د مدرسو، مکتبونو او پوهنتونونو وېش نه وو بلکي په يوځای کي هم مهاله ټوله علوم درسېدل له همدې کبله موږ وينو چي د هغه وخت مسلمان طبيبان، د رياضي، کيميا، بيولوژي او نورو علومو پوهان او مخترعين د دغو علمي برخو تر څنګ ديني علماء هم وه همداسي ډېری ديني علماء د دې ترڅنګ چي په ديني علومو کي يې ډېر مهارت درلودی په طبيعي علوم کي هم پوره رسېدلي وه.

په اسلام کي علمي برخي نه دي وېشل سوي او نه هم د يوې برخي لپاره د خاص موقعيت او يونيفورم شتون ضروري دی هرڅوک کولای سي په هره برخه کي زده کړي وکړي البته د شرائطو او امکاناتو په لحاظ د ځينو علمي تجربو او مهارتونو لپاره د يوځای ځانګړي کول هغه بېله خبره ده.

نو لکه علمي برخي او رشتې چي مشترکي دي زموږ د زده کړي ځايونه هم بايد مشترک وي، د کومو شيانو له وجهي چي د مدرسو، مکتبونو او پوهنتونو وېش او تقسيم راغلی دی هغه شيان بايد له مينځه يوسو او هر مسلمان د ديني او طبيعي علومو د زده کولو كوښښ وكړي.

زه پدې باور يم چي د ټولو علومو د زده کولو لپاره بايد يوځای وي که يوځای نسي کېدلای نو ټول هغه منفي باورونه او کړني دي له مينځه يووړل سي چي په سبب يې د مدرسې، مکتب او پوهنتون وېش راغلی دی.

په مدرسه، مکتب او پوهنتون درو واړو کي بايد زموږ بچيان په ديني او عصري علومو وروزل سي او داسي خلګ اسلامي ټولني ته وړاندي سي چي په اسلامي عقيدې پاخه، په اسلامي اعمالو سمبال، په اسلامي اخلاقو ښايسته او په عصري علومو پوره ماهر وي.

مدرسه، مکتب او پوهنتون که نومونه او عنوانونه يې مختلف دي خو معنون او محتوی يې بايد يو شی وي چي هغه د ديني او طبيعي علومو زده کول دي او بس.

يقيني خبره ده چي زموږ اوسنی حاکم اسلامي نظام د مدرسې، مکتب او پوهنتون تر مينځ د واټن کمولو ډېر کوښښ کوي ځکه نو ټول ولس بايد په دې مهمه چاره کي د نظام سره ودريږي او هر ډول همکاري ورسره وکړي.

مولوي نورالحق مظهري

https://chat.whatsapp.com/JYUzaGcwWR642f1eJi3lvn

آيا په هيواد کي سياسي اطمينان سته؟

ليکنه: مولوي نورالحق مظهري.

لومړی به راسو دې ته چي سياسي اطمينان څشی ته وايي؟ اطمينان خپله په معنی سره د آرامۍ، سکون، آسودګۍ او امنيت سره راځي او سياست په معنی سره د نګهبانۍ، حکومتولۍ او حکومت سره راځي؛ نو د سياسي اطمينان مجموعه معنی داسي کولای سو چي سياسي اطمينان يعني د حکومتولۍ په هره برخه کي آرامي او امنيت.

که لومړی د دنيا شرايطو ته وګورو بيا د څو لسيزو راپدې خوا د امارت تر راتګ پوري حالاتو ته ځير سو دا به راته ثابته سي چي اوس په هيواد کي په پوره توګه سياسي اطمينان وجود لري ځکه مرکزي، مقتدر، متحد، خپلواک او متعهد نظام چي د سياسي اطمينان لپاره شرط دی اوس الحمدلله په هيواد کي حاکم دی او د هر هغه چا لپاره چي په هيواد کي د نورو افغانانو غوندي ژوند کول غواړي هر اړخيزه امنيت قائم دی.

که د هيواد خارجي پاليسۍ ته وګورو نن د هيواد خارجي پاليسي په تمامه معنی د افغانانو لپاره پر حکمتونو، مصلحتونو او اميدونو باندي ولاړه ده ځکه سره د دې چي نړيوال حاکم نظام په رسميت نه پېژني بيا هم نظام توانېدلی دی چي د شرعي مدارات له لاري هغوی د اسلامي امارت په وړاندي په ديپلوماتيکي ډګر کي ډېر تنازل ته اړ کړي او په اصطلاح تر خپلو ډېرو سرو کرښو تېر سي آن تر دې چي ځينو هيوادونو خو هغه دی د افغانستان سفارتونه او قونسلګرۍ امارت ته سپارلي دي او دا به مو هم اورېدلي وي چي ځينو هيوادونو د افغانستان څخه د تښتېدلو کسانو د تحريک کولو او مرستي کولو څخه لاس اخيستی دی؛ دا ټوله سياسي پرمختګونه او په خپل ډول کي بې مثاله نوښتونه دي.

که د هيواد داخلي سياست ته کتنه وکړو پدې به مو ډېر ژر سر خلاص سي چي د اوسني نظام سياست د اشخاصو پر آندونو، فکرونو او ليدلورو باندي ندی بناء بلکي د اسلامي سياسي نظام دوې مهمي ځانګړتياوي چي د منابعو او هدف للهيت دی په پام کي نيول سوي دي او ټولي چاري د توان سره سم د همدغه دوو خصوصيتونو په چوکاټ کي تر سره کيږي.

دا هم په نقل او تجربې دواړو ثابته ده او سالم عقل يې هم مني چي اسلامي سياسي نظام د انسانانو د ټولو برخو د تأمين او په ټولو برخو کي د اطمينان او تسکين ضمانت کوي البته چي څوک په پوه سي او ځان ورته تسليم کړي؛ خو له بده مرغه چي نن پر انسانانو نفسي غوښتني او په ځان باندي منفي باورونه غالبه سوي دي ځکه نو هر شي ته د ځانه څخه تعريف جوړوي او د ځان څخه حکم ورباندي کوي او تر دې لا د تعجب وړ خبره دا ده چي انسانيت او بشريت يواځي په ځان کي منحصر ګڼي له همدې امله په هيڅ شي باندي نه خوشحاله کيږي او په داسي سرټمبګۍ، سادګۍ او کوټه فکرۍ مبتلاء وي چي د دنيوي ژوند څخه يې خوب او خيال جوړ کړی وي او غواړي چي لس انچه شی تر پنځه انچه سوري وباسي.

که څوک په دې باندي سر خلاص كړي چي افغانستان مسلمان هيواد دی، څو لسيزي يې په نا آرامۍ او ستونزو کي تېري کړي دي، حقوق دا نه دي چي ته يې غواړې بلکي حقوق هغه دي چي ستا د دين محدوديت ته په کتو او د هيواد حالاتو ته په پام تا ته رسيږي او د حکومتولۍ معنی دا نده چي ټول رعيت دي په نظام کي رسمي دندي ولري؛ بيا به هيڅ کله په شعوري ډول د هيواد د سياسي حالاتو څخه سر و نه ټکوي او هيڅ ځای به ځان ته د حاکم نظام په خلاف د سياسي مبارزې اجازه ور نه کړي.

دا هم شرعي مسئله ده او هم د سالم عقل فيصله ده چي د يوه اسلامي او جوړ نظام په شتون کي هيڅوک داسي سياسي فعاليت نسي کولای چي هغه دي د نظام مخالف يا اپوزيسيون جوړ سي ځکه له يوې خوا په نظام او رعيت کي اختلافات پيدا کيږي او له بلي خوا سياسي ثبات له مينځه ځي چي په نتيجه کي نظام د لنډمهالو او اوږدمهالو ننګونو سره مخامخ کوي؛ نو که څوک سياسي اطمينان په دې باندي تعبيروي چي هر څوک دي د حاکميت تر لاسه کولو لپاره د سياسي فعاليت اجازه ولري دا کار ناشونی دی او د تاريخ په اوږدو کي د داسي کار څخه اسلامي نړۍ ډېر تاوانونه ليدلي چي لويه بېلګه يې زموږ هيواد افغانستان دی؛ که د ظاهر شاه په وخت کي ګڼ شمېر سياسي ګوندونو ته د فعاليت اجازه نه وای ورکول سوې ظاهري شرايطو ته په کتو داسي ويلای سو چي ممکن هيواد د څو لسيزو خونړيو حالاتو سره نه وای مخامخ سوی.

په دې خاطر چي موږ مسلمانان يو ځکه مو نو هرڅه بايد د اسلام په چوکاټ کي د ننه وي؛ په اسلام کي هر څوک مکلف دی چي په خپل وخت کي د حاکم اسلامي نظام مرسته او کومک وکړي او د اسلامي اصولو په غوښتنه په اسلامي نظام کي د کار کوونکي او يا د اسلامي نظام تر حاکميت لاندي د رعيت په صفت خپل آرام ژوند ته دوام ورکړي.

د اسلامي نظام تر چتر لاندي د هري مفکورې انسان ژوند کولای سي لکه مسلمان، نصراني، يهودي، مجوسي او داسي نور البته په دې خاطر چي په اسلام کي هر انسان ته د هغه د استعداد او ارزښت سره سم حق ورکول سوی دی او اسلامي نظام په مځکه کي د اسلامي احکامو د پلي کولو دنده لري نو ځکه هر چا ته هغه حق ورکوي کوم چي اسلام ورکړي وي او د احکامو په اجراء کي هغه کړني ترسره کوي کومي چي اسلام د اسلامي حاکمت صلاحيت او مسئوليت ګرځولی دی له همدې امله اسلامي نظام د الهي منابعو په استناد، الهي موخي ته د رسېدلو او د عدالت پياده کولو لپاره د ديني مقدساتو د ارزښت ساتلو، شرعي حدودو جاري کولو، د مکافات او مجازات عملي کولو، د بغاوت او شرارت مخنيوی کولو، په ټولنه کي د طبقاتي توپير له مينځه وړلو او په هر اړخيز ډول د مځکي پرمخ د ژوند منظم کولو لپاره د اړتيا سره سم عملي اجراآت کوي چي ممکن د ځينو انسانانو پر شخصي مزاج و نه لګيږي او يو ډول د نا امنۍ يا نا آرامۍ احساس وکړي چي دا خپله د همدغه انسانانو نيمګړتيا ده نظام يې په وړاندي هيڅ مسئوليت نه لري.

د منکراتو څخه مخنيوی او د ښو کارونو عملي کول تنها د نظام غوښتنه نده بلکي د اسلام غوښتنه ده له همدې امله يې اسلامي نظام په هکله ډېر ټنيګار کوي او نوعيت ته يې په کتو ممکن ځيني وختونه د زور د تعميل څخه هم کار واخلي چي دا د ناامنۍ سبب نه بلکي د امنيت سبب کيږي ځکه څومره چي په مځکه کي منکرات ختميږي په هماغه کچه يې په مقابل کي انسانانو او نورو ژويو ته امنيت او آرامي ورکول کيږي.

ځيني خلګ حريت او آزادي په بې بندوبارۍ تعبيروي او حکومت ته د يوه سهامي شرکت په سترګه ګوري ځکه نو وايي: موږ بايد په هر څه کي آزاد وسو کنه نو زموږ سياسي اطمينان راڅخه اخيستل سوی دی همداسي په نظام کي هر چا ته برخه ورکول سي کنه نو دا نظام ټول شموله ندی؛ دوی يا د آزادۍ او سياست په معنی نه پوهيږي او يا يې د غربيانو او بې دينه انسانانو په تفسير پېژني کنه نو داسي فکر به يې د ځانه سره نه پالی.

ځوک چي مسلمان وي او په اسلامي هيواد کي اوسيږي هغه بايد په تمامه معنی په سياسي ډګر کي د خپل اسلامي نظام پلوي وکړي او دا خبره زموږ د خيټي څخه نده راوتلې بلکي د اسلام د مبارک دين همدغه غوښتنه ده او څوک چي مسلمان نه وي خو په اسلامي هيوادونو کي اوسيږي هغه کولای سي د حاکم اسلامي نظام څخه هغه حق وغواړي کوم چي اسلام ورته ورکړی وي خو هيڅ کله د مسلمان سره مساوي کېدلای نسي او نه هم د مسلمان په نوم ژوند کولای سي ځکه په اسلام کي د اهل ذمه، مستأمن او غيرمسلمان تجار لپاره خپل اصول او اساسات سته چي له مخي يې د اسلامي نظام تر چتر لاندي د هر غير مسلمان انسان ژوند تأمين کېدلای سي.

د اسلامي نظام د رهبرۍ لپاره محدود وخت ټاکل، د رهبر د انتخاب لپاره ټولټاکني کول، د هر کس مشورې او نيوکي ته اعتبار ورکول، هر څوک په نظام کي برخمن ګڼل او د غير مسلمانو هيوادونو په قوانينو يا کړنو استناد نيول هغه شيان دي چي نه تنها دا چي په اسلام کي ثبوت نه لري بلکي هيڅ ارزښت نه لري او هيڅ وخت په اسلامي هيوادونو کي د قوي اسلامي نظام په جوړېدلو کي مثبت نه تماميږي.

په آخره کي د تذکر لپاره يوځل بيا وايو: دا چي په هيواد کي د هر چا لپاره هراړخيز امنيت قائم دی، اسلامي ارزښتونه خوندي دي، د هيواد داخلي او بهرنی سياست د هيواد د ملي مصالحو سره سم پر مخ ځي، د هيواد پيسې ورځ تر بلي ارزښت پيدا کوي، اقتصاد ورځ تر بلي پياوړی کيږي، مالي بوديجه مو د داخلي منابعو څخه برابريږي، بغاوتونه شتون نه لري، نظام ورځ تر بلي معياري او مسلکي کيږي، ودانيز او انکشافي کارونه په جديت سره دوام لري، د تعليم په برخه کي د هيواد مصالحو ته په پام کوټلي ګامون پورته کيږي، د لوړو زده کړو په ډګر کي ظرفيتونه او کيفيتونه ورځ تر بلي ارتقاء کوي، د نشه ايزو توکو مخه نيول کيږي، په نشه باندي روبدو کسانو ته د هيواد په تاريخ کي لومړی ځل دی چي ځانګړې پاملرنه کيږي، اړمنو سوالګرو ته معاشونه ټاکل کيږي او په عامه توګه د هيواد پر امنيتي، اقتصادي، فکري، فرهنګي او ټولنيزو زيربناو په لويه کچه کار کيږي دا خپله د نورو برخو تر څنګ په سياسي برخه کي هم د اطمينان او ثبات لپاره لوی دليل دی او که دغه سياسي ثبات او سکون نه وي نو څه به وي؟.

د حجاب اړوند د شبهاتو جوابونه:(يوولسمه شبهه)

د حجاب مخالفین وايي: بې حجابي او مخ لڅونه د ښځي حق دی او حجاب پر دې باندي ظلم دی؛ د اسلامي حجاب د مخالفينو په ګمان بې حجابي د ښځي حق دی هغه حق چي اوس ټولني ورڅخه اخيستی دی همدا راز خود خواه، قديمي اوكوټه فكره سړيو ځيني سلب كړی دی؛ د دوی په باور حجاب پر ښځي باندي ظلم دی او د دې د حق سلبول دي.

جواب: د دغه خلګو په جواب كي بايد وويل سي: لومړی خبره دا ده چي حجاب داسي حكم ندی چي هغه دي د ټولني او يا سړي لخوا ايښوول سوی وي چي په عملي كولو يې پر ښځه باندي ظلم راسي او ښځه دي د هغه څخه د خلاصون لپاره هڅه اوكوښښ وكړي لكه په اروپا او غربي هيوادونوكي چي د ښځي او خاوند تر مينځ داسي قضيې او پيښي مينځ ته راځي؛ بلكي حجاب هغه حكم او قانون دی چي د ښځي رب او خالق ورباندي فرض كړی دی هيڅه مسلمانه ښځه د دې واك نه لري چي د حجاب پر فرضيت او مهموالي دي د الله پاك سره مقابله وكړي او نه هم د حجاب په منلوكي دې لره اختيار سته بلكي دا يې په منلو باندي مكلفه ده.

په سورة الأحزاب 36 آيت كي الله جل جلاله فرمايي: 

وَمَا كَانَ لِمُؤْمِنٍ وَلاَ مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَا لاً مُّبِينًا.[الأحزاب:36]

يعني د مسلمان او مسلماني لپاره د دې حق نسته چي كله يې الله او يا د الله رسول په هكله فيصله وكړي نو دوی دي په منلوكي اختيار ولري او هر څوك چي د الله او د هغه د رسول نافرماني وكړي نو هغه په ښكاره ګمراهۍ باندي بې لاري سوی دی.

نو د حجاب په شمول په هيڅ اسلامي حكم كي مسلمانانو ته دا نه روا كيږي چي دوی يې په كولو كي اختيار ولري بلكي هر كار چي الله پاك يې انسان په كولو باندي مكلفه كړی وي بايد سر ته يې ورسوي.

بله خبره دا ده چي دوی حجاب ته ظلم وايي، حجاب پر ښځي باندي زورواكي او تيری بولي دا خپله د دې خبري ښكارندويي كوي چي دوی د اسلام په هكله پوره معلومات نه لري او نه هم اسلامي ارزښتونه ورته پوره معلوم دي كنه نو د حجاب له امله هيڅه ستونزه مينځته نه راځي؛‌ ځكه حجاب كومه نوې خبره نده بلكي په زمانه كي د رسول الله صلی الله عليه وسلم حجاب فرض كړل سوی دی، په هماغه زمانه كي په پوره توګه نافذ او عملي سوی دی او د هغه وخت څخه را پدې خوا هغه دی تر14 پيړيو ډېر وخت په مسلمانانو كي پاته سوی دی او هيڅ مسلمان دا خبره نه كوي چي په زمانه كي د رسول الله صلی الله عليه وسلم او يا هم په هغو زمانو كي چي د حجاب پر كولو باندي پوره پابندي وه ښځه دي د حجاب له وجهي مظلومه واقع سوې وي او يا دي هم په ټولنه كي حجاب ته د ظلم او تيري په سترګه كتل سوې وي؛ بلكي د حجاب په شمول د اسلامي شعائرو سپكاوی او په مسلمانانو كي يې كم رنګه كېدل د هغه وخته څخه راپيل سويدي چي په مسلمانانو كي بې دينۍ لاره موندلې او يا هم د ځينو عياشو او جاهلو خلګو په واسطه د اسلام په نامه كوم ناوړه كارونه سوي دي؛ او په رښتيا چي كوم ظلمونه اوس د ځينو مسلمانانو لخوا پر ښځو باندي كيږي پدې كي د اسلام نقصان نه دی بلكي د هغه خلګو نقصان دی چي ظلم کوي ځكه دوی د خپلي سپېڅلي عقيدې څخه فاصله نيولې، اسلامي او ديني تعليماتو ته يې شاه ګرځولې، د دې پر ځای چي د خپل ژوند د سمون معيار اسلامي شريعت وګرځوي د نورو بيګانه خلګو په فرهنګ او كلتور پسې روان دي، زده كړي كوي خو ادب او تربيې ته پاملرنه نه كوي، هر يو د دې كوښښ كوي چي داسي زده كړي وكړي چي په مټ يې سرمايه او دنيا لاس ته راوړي او د اسلامي خواخوږۍ په هدف او ټولني ته د مثبت خدمت په موخه زده كوونكي د ګوتو په شمېر دي.

معلومه خبره ده چي هره ټولنه دومره د خپل دين څخه واټن ونيسي نو د بې حجابۍ په شمول نور ډېر داسي كارونه به وكړي چي هغه په شريعت كي حرام او ناروا وي او په دنيا او آخرت كي د دوی لپاره رسوايي او شرمنده ګي وي.

د مسلمانانو لپاره د سم ژوند او پاكي زمانې نمونه د رسول الله صلی الله عليه وسلم وخت دی چي د ښځي حجاب هم وو، مسلمانانو ته د هراړخيز اخلاقي او روحي پاك ژوند زمينه هم برابره وه او مسلمانان په خپل وخت كي پرمختللي، متمدنه او مترقي ټولنه پېژندل كېدل.

او ډېره جالبه خبره دا ده چي حجاب ته هغه خلګ د ظلم په سترګه ګوري کوم چي حجاب نه کوي؛ په کومي ټولني کي چي حجاب کيږي هلته حجاب ته د ظلم په سترګه نه کتل کيږي او نه هم ښځي حجاب کول پر ځان باندي ظلم بولي بلکي مسلماني ښځي په خپله خوښه او په ډېري لېوالتيا سره حجاب کوي.

که موږ په نړۍ کي په هغو خلګو کي چي حجاب سم پېژني يوه سروې وکړو زه باوري یم چي قاطع اکثريت به د حجاب په پلوۍ رأیه ورکوي ځکه حجاب د ښځي لپاره شرف دی، حجاب د ښځي لپاره عزت دی، حجاب د ښځي لپاره ارزښت دی، حجاب د ښځي لپاره سکون دی او حجاب د ښځي لپاره محافظ دی.

ما چي څومره فکر کړی دی د حجاب سره هغه خلګ يا هغي ښځي مخالفت کوي چي په هغوی کي بالکل حجاب نسته او يا د حجاب په پوره ارزښت خبر ندي؛ ددې ساده مثال داسي دی لکه د افغانانو پیراخ کالي او په نورو هیوادونو کي د خلګو تنګ پتلون؛ ممکن ډېری خلګ د افغانانو په لباس پوري وخاندي او دا یوډول سادګی وبولي خو که په خوند او ارزښت يې پوه سي هیڅ کله به بيا نه تنها داچي سپکاوی به يې ونکړي بلکي خپله به يې هم په تن کړي.

ددې خبري ژوندی شاهد ما په خپلو سترګو ليدلی دی موږ په 1380هـ ش کال کي د طالبۍ په دوره کي په ایران کي د تهران په پرديس ولسوالۍ کي د يوه ايراني سره کار کوی؛ د هغه به زموږ کالي ډېر خوښېدل، زموږ د کالو به يې ډېر صفت کوی او ويل به يې که دلته زموږ په ځای کي رواج وای ارومرو به موږ هم آغوستلای ځکه ستاسي په کالو کي سړی ډېر هوسا دی او ټول حرکات په ښه آسانۍ سره تر سره کولای سي.

مولوي نورالحق مظهري

که اسلامي نظام نه وي نو څه به کيږي؟

۱ – که اسلامي نظام نه وي نو د انسانانو دنيوي ژوند به د انساني شرافت او بشري ارزښت پر اصولو برابر پر مخ ولاړ نسي.
۲ – که اسلامي نظام نه وي نو د انسانانو ژوند به د قيامت تر ورځي د اختلافاتو او ګډوډيو څخه ډک وي.
۳ – که اسلامي نظام نه وي نو د مسلمانانو او اسلام عزت به خوندي نه وي.
۴ – که اسلامي نظام نه وي نو د اسلام د ساتني او غځوني لپاره به جهاد، فتحي او مؤثر دعوتونه ختم سي چي ورسره به کفار، اهل باطل او شرير انسانان د مځکي واک په اختيار کي واخلي او پر عامو انسانانو به د ژوند کړۍ ورځ تر بلي سخته سي.
۵ – که اسلامي نظام نه وي نو شرعي احکام او حدود به معطل سي چي په نتيجه کي به د مځکي څخه برکتونه او مشروع سهولتونه پورته سي.
۶ – که اسلامي نظام نه وي نو د يتيمانو، کونډيانو، غريبانو او بې وزلو انسانانو پالنه او غور به څوک وکړي.
۷ – که اسلامي نظام نه وي نو د شرعي حکمي مراسمو لکه حج، روژه او زکات سرپرستي به څوک وکړي؟
۸ – که اسلامي نظام نه وي نو د ظالمانو څخه به د مظلومانو حق څوک واخلي او د زورواکانو مخه به څوک ونيسي؟
۹ – که اسلامي نظام نه وي په حاکميت او تسلط کي به اهليت څنګه عملي سي؟
۱۰ – که اسلامي نظام نه وي د خلګو فزيکي، فکري، عقيدوي، اقتصادي او سياسي امنيت به څوک خوندي کړي؟
ځکه نو په هره زمانه کي د مځکي پر مخ د اسلامي نظام شتون ضروري او لازم دی؛ اوس چي الله تعالی زموږ په هيواد کي اسلامي نظام حاکم کړی دی هر يو يې بايد په پوره سمبالولو او ساتلو کي د خپل توان سره سم برخه واخلي.
ژباړه: زه وايم: د دين او دنيا نظام مقصود دی او دغه مقصود بېله شتون څخه د امام په لاس نه راځي، که موږ د امام ټاکل و نه منو نو دا به د قيامت تر ورځي د اختلافاتو او ګډوډۍ لامل سي، که د خلګو لپاره اطاعت کېدونکی امام نه وي نو د اسلام عزت به له مينځه ولاړ سي، که امت فاتح امام ونلري نو جنګونه او منظرې به بندي سي او د راتلونکي او تلونکي پر مخ به لاري پرې سي، که کومه زمانه د امام څخه خالي وي نو په هغه وخت کي به احکام تعطيل سي او يتيمان به خوار سي او د بيت الله حج به څوک نسي کولای، که ائمه، قاضيان، باچاهان او واليان نه وي نو ناواده ښځي به په نکاح نه ورکول کيږي او د يتيمانو سرپرستي به نه کيږي او که باچا نه وي نو په خلګو کي به ګډوډي جوړه سي او ځيني به ځيني نور وخوري.
فأقول نظام أمر الدين والدنيا مقصود ولا يحصل ذلك إلا بإمام موجود لو لم نقل بوجوب الإمامة لأدى ذلك إلى دوام الاختلاف والهرج إلى يوم القيامة لو لم يكن للناس إمام مطاع لانثلم شرف الإسلام وضاع لو لم يكن للأمة إمام قاهر لتعطلت المحاريب والمناظر وانقطعت السبل للوارد والصادر لو خلا عصر من إمام لتعطلت فيه الأحكام وضاعت الأيتام ولم يحج البيت الحرام لولا الأئمة والقضاة والسلاطين والولاة لما نكحت الأيامى ولا كفلت اليتامى لولا السلطان لكانت الناس فوضى ولأكل بعضهم بعضا.[تهذيب الرياسة وترتيب السياسة ج1 ص 8]
مولوي نورالحق مظهري

د اسلامي نظامونو په وړاندي د منافقينو دسيسې:(لومړی برخه)

ليکوال: مولوي نورالحق مظهري.

په دې خاطر چي اسلامي نظام په مځکه کي د الله تعالی دين پياده کوي، د حقيقي سياسي اسلام نماينده ګي کوي، د ظالمانو د ظلم مخه نيسي او د هر ډول فساد مخنيوی کوي ځکه نو هر اهل باطل يې په وړاندي دريږي او د حاکم کېدلو مخه يې نيسي او که اسلامي نظام حاکم وي بيا يې د توسعې او بقاء پر ضد دسيسې جوړوي تر څو يې ړنګ کړي.

اهل باطل د عقيدې، عمل او سياسي ليدلوري په لحاظ ډېر دي خو د اسلامي نظام لپاره تر ټولو ډېر خطرناک يې منافقين دي کوم چي ځانونه د اسلام يا تقوی په لباس کي ښکاره کوي خو اصالت يې بل ډول وي له همدې امله الله تعالی مسلمانان د دوی سره په احتياط کولو باندي امر کوي او فرمايي: هُمُ الْعَدُوُّ فَاحْذَرْهُمْ.[المنافقون: ۴] ژباړه: دوی دښمنان دي نو احتياط ورسره وکړئ. يعني منافقين ستاسي دښمنان دي ځکه نو تاسي مأمور ياست چي د دوی سره ډېر احتياط وکړئ او د دوست په سترګه مه ورته ګورئ تر څو مو دوکه نکړي او د ستونزو سره مو مخامخ نکړي.

منافقين دوه ډوله دي: عقيدوي منافق او عملي منافق لکه امام ترمذي چي د حسن بصري رحمه الله په حواله فرمايي: النفاق نفاقان: نفاق التكذيب ونفاق العمل.[سنن ترمذي۳۶۳۲] ژباړه: نفاق پر دوه ډوله دی: د تکذيب نفاق او د عمل نفاق.

د تکذيب نفاق هغه وي چي څوک په ښکاره ايمان راوړي خو په اصل کي يې ايمان نه وي راوړی بلکي کافر وي او د عمل نفاق هغه دی چي ايمان يې راوړی وي خو کارونه د منافق کوي لکه په احاديثو کي چي ځيني نښي د عملي نفاق ذکر سوي دي.

د تاريخ په اوږدو کي دواړي ډلي د اسلامي نظامو په وړاندي خطرناکي تمامي سوي دي په خاصه توګه عقيدوي منافقين چي د رسول الله صلی الله عليه وسلم د زمانې څخه بيا زموږ تر زمانې  پوري يې تل عموما د مسلمانانو پر ضد او بيا يې په خاصه توګه د اسلامي نظامونو پر ضد ناوړه کړني ترسره کړيدي چي موږ يې په څو کتګوريو کي په لاندي ډول ذکر کوو:

د رسول الله صلی الله عليه وسلم په زمانه کي منافقين: 

د رسول الله صلی الله عليه وسلم په زمانه کي د يهودو او عربو منافقينو تل د دې کوښښ کوی چي رسول الله صلی الله عليه وسلم او مسلمانانو ته ستونزي جوړي کړي او د دوی نوی تأسيس سوی اسلامي نظام ړنګ کړي او يا يې هم لږ تر لږه د توسعې او پرمختګ مخه ونيسي؛ منافقينو به په دين کي شبهات پيدا کول، مسلمانان به يې پر دين باندي بې باوره کول، د مسلمانانو په مينځ کي به يې بې اتفاقي خپرول، په مسلمانانو کي نيک خلګ به يې په بدو کارونو متهم کول آن تر دې چي خپله پر رسول الله صلی الله عليه وسلم او دده پر کورنۍ به يې هم تهمتونه ويل او ټول هغه کارونه به يې کول چي د اسلام او مسلمانانو په تاوان تمامېدل؛ د بېلګي په ډول:

۱ – کله چي رسول الله صلی الله عليه وسلم د تبوک غزوې ته آمادګي نيول او صحابه يې وتلو ته امر کړه منافقينو د دې ترڅنګ چي ځانونه يې د جهاد څخه کښل او د تللو څخه يې ډډه وکړه بلکي نور مسلمانان يې هم د جهاد څخه راګرځول او کوښښ يې کوی چي مسلمانان د رسول الله صلی الله عليه وسلم د امر مخالفت وکړي؛ الله تعالی د دوی په اړه فرمايي:

فَرِحَ الْمُخَلَّفُونَ بِمَقْعَدِهِمْ خِلَافَ رَسُولِ اللَّهِ وَكَرِهُوا أَنْ يُجَاهِدُوا بِأَمْوَالِهِمْ وَأَنْفُسِهِمْ فِي سَبِيلِ اللَّهِ وَقَالُوا لَا تَنْفِرُوا فِي الْحَرِّ قُلْ نَارُ جَهَنَّمَ أَشَدُّ حَرًّا لَوْ كَانُوا يَفْقَهُونَ.[التوبة۸۱]

ژباړه: خوشحاله سوه پاته سوي کسان په ناستي سره د دوی وروسته تر رسول الله صلی الله عليه وسلم او دوی بد وګڼل چي په خپلو مالونو او ځانونو د الله تعالی په لاره کي جهاد وکړي او دوی وويل: په ګرمۍ کي مه وځئ ورته ووايه چي د جهنم اور ډېر ګرم دی که دوی پوهيږي.

دلته منافقين خپله هم جهاد ته نه تلل او د مسلمانانو په منځ کي  يې نفاق ته هم لمنه وهل تر څو هغوی هم د دوی غوندي جهاد ته ولاړ نسي ځکه يې نو ورته وويل: په ګرمۍ کي مه وځئ.

۲ – کله چي رسول الله صلی الله عليه د تبوک غزوې د وتلو اراده وکړه نو جد بني قيس ته يې ويل: څنګه يې د بني الاصفر قوم سره جنګ کولو ته؟ هغه ورته وويل: يارسول الله ته پوهېږې  چي زه د ښځو ډېر شوقي يم نو که زه جنګ ته درسره ولاړ سم ممکن د ښځو په فتنه کي ولوېږم او دين به مي خراب سي؛ مفسرينو ليکلي دي چي دا سړی منافق وو په دې ډول يې د جهاد څخه ځان کښووس او رسول الله صلی الله عليه وسلم ته يې درواغ ويل؛ الله تعالی يې په اړه دا آيت نازل کړ: وَمِنْهُمْ مَنْ يَقُولُ ائْذَنْ لِي وَلا تَفْتِنِّي أَلا فِي الْفِتْنَةِ سَقَطُوا وَإِنَّ جَهَنَّمَ لَمُحِيطَةٌ بِالْكافِرِينَ.[التوبة۴۹]

ژباړه: ځيني د دوی(د منافقينو څخه) هغه څوک دی چي وايي: ما ته اجازه( د پاتي کېدلو) راکړه او په فتنه کي مي مه اچوه، خبر اوسه چي دوی په فتنه کي لوېدلي دي او يقينا چي جهنم پر کافرانو باندي راګرځېدلی دی.

دې منافق ددې ترڅنګ چي خپله جهاد نه تلی نور مسلمانان يې هم د جهاد نه تللو ته هڅول او هغوی ته يې هم د عذر او ګناه نقل ورکوی.

۳ – کله چي رسول الله صلی الله عليه وسلم د تبوک غزوې د تللو اراده وکړه څو منافقين د يوه يهودي چي سويلم نومېدی په کور کي سره راټول سوه تر څو مسلمانان د کفارو سره د جګړې څخه را وګرځوي؛ کله چي رسول الله صلی الله عليه وسلم په خبر سو طلحه بن عبيدالله رضي الله عنه يې د څو نفرو سره ور واستوی او امر يې ورته وکړ چي د سويلم کور وسوځوي او راټول سوي خلګ پسي واخلي؛ طلحه بن عبيدالله رضي الله عنه دا کار وکړ او منافقين ټول و تښتېدل.

دا د مسلمانانو پر ضد د منافقينو د دسيسو څخه يوه دسيسه وه ترڅو په مسلمانانو کي وېره خپره کړي، د دښمن څخه يې ووېروي او د جهاد کولو څخه يې را وګرځوي.

۴ – کله چي رسول الله صلی الله عليه وسلم د تبوک غزوې ته تلی حضرت علي رضي الله عنه يې د لنډ وخت لپاره په مدينه منوره کي د خليفه په حيث پرېښودی دلته نو منافقينو په خپل منافقت پيل وکړ او آوازه يې ګډه کړه چي رسول الله صلی الله عليه وسلم علي رضي الله عنه په دې خاطر د ځانه سره نه بيايي چي زړه يې  نه غواړي او د هغه تلل ورباندي سخت تماميږي؛ علي رضي الله عنه راغی او رسول الله صلی الله عليه وسلم ته يې ويل: يا رسول الله ځيني خلګ وايي: ته ځكه ما دلته پرېږدې چي زما په تللو نه يې خوشحاله او زما تلل پر تا باندي سخت تماميږي، رسول الله صلی الله عليه وسلم ورته وويل: آيا ته نه خوشحاله کيږې چي ته زما سره داسي سې لکه هارون عليه السلام د موسی عليه السلام سره؛ يعني کله چي موسی عليه السلام د طور غره ته تلی نو هارون عليه السلام يې تر خپل راتګ پوري د ځان نماينده وټاکی؛ زه هم تر خپل راتګ پوري تا خپل نماينده ټاکم؛ حضرت علي رضي الله عنه په دې باندي خوشحاله سو او د منافقينو د نفاق پلان شنډ سو.

د لته منافقينو غوښتل د رسول الله صلی الله عليه وسلم او دده د صحابه وو تر مينځ اختلاف او بې باوري پيدا کړي ترڅو دده ملګري دده د امر مخالفت وکړي او په خپل مينځ کي سره اخته سي او د کفارو سره جګړه کول ورڅخه پاته سي.

۵ – کله چي رسول الله صلی الله عليه وسلم صحابه د خيراتونو او صدقاتو ورکولو ته تشويق کړه عبدالرحمن بن عوف رضي الله عنه څلور زره ديناره د صدقې لپاره راوړه؛ منافقينو وويل: دا خو يې د رياء لپاره راوړي دي؛ او چه کله بل صحابه دوه پيمانې خورما  د صدقې لپاره راوړه منافقينو وويل: الله او د هغه رسول ستا دغه پيمانې ته هيڅ ضرورت نه لري.

د منافقينو هدف دلته دا وو چي مسلمانان د خيراتونو د ورکولو څخه را وګرځوي ځکه يې نو پر ډېر مال ورکوونکي او لږ مال ورکوونکي دواړو نيوکي وکړې، يو يې په ريا متهم کړ او د هغه بل صدقه يې بې ارزښته وګڼل؛ الله تعالی ددوی په رد کي دا آيت نازل کړ: الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِي الصَّدَقَاتِ وَالَّذِينَ لَا يَجِدُونَ إِلَّا جُهْدَهُمْ فَيَسْخَرُونَ مِنْهُمْ سَخِرَ اللَّهُ مِنْهُمْ وَلَهُمْ عَذَابٌ أَلِيمٌ.[التوبة۷۹]

ژباړ: هغه منافقان چي عيب وايي پر خيرات ورکوونکو د مؤمنانو په خيراتونو کي او د هغه کسانو عيب وايي چي دوی نسي موندلای مګر د خپل کوښښ په اندازه الله تعالی به ددوی د مسخرو عذاب ورکوي او ددوی لپاره سخت عذاب دی.

منافقانو پر هغو مؤمنانو هم بد ويل چي ډېر خيرات يې ورکړی وو او پر هغو مسلمانانو يې هم بد ويل چي د لږ خيرات يې ورکړی وو ځکه دا د منافق عادت دی چي په هر شي کي پلمه او فاسده خبره پيدا کوي؛ الله تعالی ددوی دغه کار وغندی او دوی مؤمنانو ته رسوا کړه.

۶ – کله مسلمانان د تبوک غزوې ته د روميانو سره جګړې ته روانېدل ځينو منافقينو ورته ويل: تاسي پر روميانو د عربو ګمان کوی چي جګړې مو ورسره کولې؟ هدف يې دا وو چي مسلمانان و وېروي او د روميانو سره د جګړې څخه يې را وګرځوي.

۷ – کله چي رسول الله صلی الله عليه وسلم په مدينې منورې کي د اسلامي نظام بنسټ کېښودی او مهاجرين او انصار يې سره وړونه کړه د منافقينو دغه حالت نه خوښېدی نو ددې لپاره چي د مسلمانانو مينځ کي بې اتفاقي راولي مسجد ضرار يې جوړ کړ خو الله تعالی دوی رسوا کړه او رسول الله صلی الله عليه وسلم يې مسجد وران کړ.

۸ – منافقينو ددې لپاره چي د رسول الله صلی الله عليه وسلم شخصت داغداره کړي او دده مبارکه کورنې بدنامه کړي د مشهور منافق عبدالله بن ابی بن سلول په دسیسه يې پر عائشې رضي الله عنها تهمت ولګوی ځکه تهمت لګول هم د فکري جګړې څخه برخه ده چي تل يې کفار او منافقين د مسلمانانو او بيا اسلامي نظامونو پر ضد کاروي؛ خو الله تعالی د عائشې رضي الله عنها پر پاکۍ قرآن نازل کړ او منافقين يې رسوا کړه.

لنډه دا چي په زمانه کي د رسول الله صلی الله عليه وسلم منافقينو ډېر کوښښونه وکړه تر څو د صحابه وو تر مينځ اختلافات پيدا کړي، د رسول الله صلی الله عليه وسلم د اطاعت ارزښت په صحابه وو کي کم کړي، د مسلمانانو دښمنان پر دوی باندي را وپاروي، انصار او مهاجرين، اوس او خرزج سره وجنګوي او ددوی ترمينځ قومي جګړې پيل کړي؛ دا ټول ددې لپاره چي په مدينې منورې کي د اسلامي نظام مخنيوی وکړي.

په هره زمانه کي بايد مسلمانان په خاصه توګه د اسلامي نظام مشران د منافقينو مکر او فريب ته متوجه وسي او ددوی په چاپلوسۍ، خوړمالۍ، خوږو خبرو او ظاهري دوستۍ دوکه نسي تر څو خدای مکړه تسلط، نفوذ او اقتدار يې له مينځه يو نسي.

دوام لري....

زموږ د واټساپ ګروپ لينک

زړونه څلور ډوله دي:

ژباړه: د ابو سعيد رضي الله عنه څخه روايت دی چي رسول الله صلی الله عليه وسلم وفرمايل: زړونه څلور ډوله دي: يو خالي/پاک زړه دی چي په هغه کي د څراغ غوندي شی دی چي ځليږي، بل پوښ سوی زړه دی چي پوښ يې ټينګ پر راتاو سوی دی، بل سرچپه يا سرنګون زړه دی او بل کوږ/ دوه مخی زړه دی؛ هغه زړه چي پاک دی هغه د مسلمان زړه دی چي د نور څراغ يې پکښې روښانه دی، هغه زړه چي پوښ لري هغه د کافر زړه دی، هغه زړه چي سرچپه دی هغه د منافق زړه دی چي يوځل شی پېژني بيا ورڅخه انکار کوي او هغه زړه چي کوږ يا دوه مخی دی هغه داسي زړه دی چي په هغه کي ايمان او نفاق دواړه سته؛ د ايمان مثال يې داسي دی لکه واښه چي پاکي اوبه يې خپلي خوا ته کشوي او د نفاق مثال يې داسي دی لکه دانه چي چرک او وينه يې خپلي خوا ته کشوي نو هر کشول چي ورباندي غالبه سي نو هغه حالت پر زړه باندي غالبه کيږي. [مسند احمد بن حنبل 11145]
وضاحت: يعني هغه زړه چي د کفر، منافقت، او روحاني امراضو د چټليو څخه پاک دی هغه د مسلمان زړه دی چي په هغه کي حسد، بغض، بخالت، تکبر، غرور، ځانځاني، جهالت او نور منفي شيان شتون نلري ځکه نو هغه تل روښانه وي او د مسلمان وجود ته يې ګټه رسيږي ځکه زړه د بدن باچا دی که اصلاح او ژوندی وو بدن به هم ورسره اصلاح او ژوندی وي او که خراب او مړ وو بدن به هم ورسره خراب او مړ وي.
هغه زړه چي پوښ سوی دی او په پوښ کي کلک تاو دی هغه د کافر زړه دی چي په کفر باندي دومره کلک سوی او تور سوی دی چي ايمان او تقوی هيڅ لار ورته نسي پيدا کولای مګر دا چي الله تعالی يې په خپل فضل سره سپين او نرم کړي.
هغه زړه چي سرچپه يا سرنګون دی هغه د منافق زړه دی چي حق يې پېژندلی وي بيا يې ورڅخه انکار کړی وي ځکه منافق خو په ښکاره حق مني خو د پردې شاته بيا انکار ورڅخه کوي؛ ددې سړي زړه چپه دی ځکه د زړه تصرف يې معکوس دی؛ د دې پر ځای چي دده د زړه په سبب په بدن کي اصلاح راسي فساد راغلی او د دې پر ځای چي په خپل زړه باندي حق ته تسليم سي باطل ته تسليم سوی دی.
او هغه زړه چي کوږ دی يا دوه مخه لري هغه د هغه چا زړه دی چي په زړه کي ايمان او نفاق دواړو ته ميلان لري يعني نه سم مؤمن وي او نه هم سوچه کافر وي چي دې مرحلې ته ځيني د ضعيف ايمان مرحله وايي يا د عملي نفاق مرحله وايي چي د دوام په صورت کي ممکن سوچه کفر يا عقيدوي نفاق ته مفضي سي؛ په داسي مرحله کي نو زړه د دوو کشوونکو حالتونو تر مينځ وي که د تقوی او ښو کارونو په سبب د ايمان حالت ورباندي غالبه سو نو زړه به يې پاک او صفا سي او د ده څخه به پوره مسلمان جوړ سي او که د ګناهونو او سرغړونو په سبب د نفاق حالت ورباندي غالبه سو بيا به سم کافر يا سم منافق سي.(نعوذ بالله)
الله تعالی دي زموږ ټولو مسلمانانو زړونو صاف او پاک وګرځوي تر څو مو د زړه د اصلاح په سبب بدنونه هم اصلاح سي او د الله تعالی د مخلصو بندګانو څخه وګرځو.
مولوي نورالحق مظهري

د حجاب اړوند د شبهاتو جوابونه:(لسمه شبهه)

د حجاب دښمنان وايي: د زينت ښكاره كول يو عادي كار دی کتونکی ورته هيڅ توجه نه كوي؛ دوی دعوه كوي چي د زينت هغه ښكاره والی چي ښځه ورباندي پټه او لڅه ښكاري نارينه نه را پاروي پداسي حال كي چي نارينه د هغي ښځي په ليدلو سره چي پوره حجاب يې كړی وي او ټوله بدن يې ورباندي پټ وي را پارول كيږي نو ځكه د دوی د شخصيت د پېژندلو او تعقيبولو اراده ورسره پيدا كيږي ځكه چي هر ممنوع شی خوندور وي؛ نو دلته چي ښځي خپل ځان د حجاب په مټ پټ كړی دی او نور خلګ يې ځان ته د کتلو څخه منع كړيدي خود به د نورو خلګو سره د دې د ليدلو شوق پيدا كيږي.

جواب: د دغه خلګو په جواب كي بايد وويل سي چي كه په رښتيا داسي وي چي د زينت ښكاره كول دي يوه عادي خبره سي كتل دي ځان ته نه راجلبوي او زړونه دي ځان ته نه راكشوي نو بيا د څه شي لپاره او د چا لپاره دوی خپل زينت ښكاره كوي؟ او په څه خاطر د آرايش توكي او سامانونه اخلي؟ او ولي په آرايشگاه كي د ځان د جوړولو لپاره پيسې مصرفوي ‌او په څه خاطر د موډ او فيشن پسې ځغلي؟. 

معلومه خبره ده چي دا ټوله تكليفونه او مصارف خوشي او بې څه ندي بلكي د يوه هدف او موخي لپاره دي او بېله دې څخه چي د ځان د ښايست د مطرح كولو او ځان ته د خلګو د پام را اړولو لپاره دي وي بل هيڅ دليل ورسره نه جوړيږي.

څنګه دي د زينت ښكاره كول يوه عادي خبره سي پداسي حال كي چي دا منل سوی حقيقت دی چي څومره ميرمن ځان ښايسته كوي همدومره د خاوند رغبت او شوق هم ورته كيږي! او دا هم مشهوره خبره ده چي خواړه د رنګه خوړل كيږي چي څومره د خوړو رنګ سم وي همدومره د انسان اشتهاء ورته كيږي كڅه هم خوند يې سم نه وي.

بله خبره دا ده چي د نارينه او ښځي تر مينځ جاذبيت او يو بل ته ميلان يو فطرتي شی دی چي په تېرېدلوسره د زمانې تغيير نه كوي ځكه چي په وينه كي د كوچنيو پټو غدو څخه آزاد سوي هورموني افرازات ګرځي او راګرځي په وينه كي جريان كوي او پر اعصابو اومغزو باندي په تأثير كولو سره په هر جنس يعني په نر او ښځه كي د دوی شوق او طبيعي غريزه را پورته كوي.

بلكي هرجزء د هر جسم څخه توپير او تمييز لري د خپل مشابه جزء څخه په بل جنس كي مثلا اجزاء د بدن د نارينه توپير او فرق لري د اجزاؤ څخه د بدن د ښځي؛ پدې خاطر دی چي ښځينه صفات او ځانګړتياوي د ښځي په جسم ، ‌شكل، اخلاق، افكار او ميلونو كي له ورايه ښكاري لكه چي د نارينه صفات د هغه په بدن، هيیت، ږغ، كارونو او ميلونوكي له ورايه ښكاري. 

او دا هغه فطري او طبيعي قاعده ده چي د كومي ورځي څخه الله پاك انسان پيدا كړی دی تغيير يې ندی كړی او تر قيامته پوري به هم تغيير و نكړي.

نو د نارينه او ښځي مثال لكه د آرت او برق د لاينونو په څېر دی چي كله يې سره وجنګوې شارټي كوي؛ نارينه او ښځه چي كله په يو بل كي ځيني محرك علائم ويني او كوم باطني او ياقوي ظاهري مانع هم نه وي ارومرو يې جنسي غريزه راپورته كيږي.

الله پاك جنسي عادت په بشري نفس كي ايښی دی دا د الله تعالی د اسرارو څخه يو سر او د الله د لويو حكمتونو څخه يو حكمت دی. 

الله پاك جنسي علاقه مندي د هغو لويو شيانو څخه ګرځولې ده چي عقل، نفس او روح ټوله تمايل ورته كوي او هغه روحي، حسي او بدني غوښتنه ده؛ پدې خاطر دی چي انسان جنسي مقاربت په ډېري لېوالتياسره كوي.

او كه يو څوك د معمول او فطرت پر خلاف داسي وي چي يوه بې حجابه او لڅ سرې ښځه چي ځان يې ښه سره جوړ كړی وي او په ښكاره يې د زينت او ځان جلبولو ډېر شيان لګولي وي پر ده باندي تېره سي او دی ورته وګوري خو هيڅ پاملرنه ورته ونكړي او نه هم تحريك سي پداسي حال كي چي هيڅ معنوي او قوي ظاهري مانع هم نه وي د ډاكټرۍ له نظره دغه سړی د مزاج د يخوالي په ناروغۍ باندي اخته دی؛ هغه ناروغي چي د طبابت له نظره بايد معالجه كړل سي.

نو هيڅ كله د ښځي لڅ ګرځېدلو او د كور څخه بهر د زينت ښكاره كولو ته په عادي نظر نسي كتل كېدلای او هيڅكله يې موږ معمولي كار نسو بللای.

بله خبره چي په زغرده د دوی د دغي مدعٰي پر درواغ والي باندي دلالت كوي دا ده چي كه موږ وګورو د زنا، همجنس بازۍ او نورو جنسي پيښو لوی مقدار د هغو ښځو سره وي چي دوی نيم لوڅي ګرځي او خپل زينت هر چاته ښكاره كوي؛ او په دومره كچه باندي د جنسي انحرافاتو پيښي مستقيما پر دغه ډول د ښځو تر وتلو پوري تعلق نيسي هغه حالت چي هيڅ قسم فضيلت او شرافت پكښې نسته.

بلكي ډېري جنسي ناروغۍ لكه ايډز په لويه كچه په هغو هيوادونو كي پيدا كيږي چي په هغو كي بې حجابي او جنسي بې بندوباري ډېره وي او په همدغه هيوادونو كي د نورو هيوادونو په  نسبت د هغه روحي ناروغيو ګراف ډېر لوړ وي چي انسان تر ځان وژني پوري رسوي.

ښه كه په بهر كي د زينت ښكاره كول يو عادي كار وای بيا نو دا دومره ناخوالي او جنسي ناروغۍ د كومه سوې؟ او په فحاشو هيوادونو كي د ښځو ويلګردي او د دوی د ويلګردۍ په سبب هرج او مرج د څه لپاره دی؟.

او دا چي دوی وايي محجبې ښځي ته د انسان پاملرنه ور اوړي او بې حجابي ښځي ته نه ور اوړي؛ نو دوی ته ويل كيږي چي ګوری! د محجبې ښځي مثال د هغه تړلي اوكت كتاب دی چي ته يې تنها پوښ ته كتلای سې ولي پر محتوياتو باندي يې علم نسي راوستلای.

ډيری ځل داسي پيښيږي چي انسان دي وكت او تړل سوي كتاب ته په دقت باندي وګوري او په اړه دي ډېر فكر هم وكړي خو په محتوياتو باندي يې هيڅ علم نسي راوستلای او نه هم ور څخه متأثره كېدلای سي او نه يې هم په اړه افكار ورباندي اغيز كوي.

د محجبې ښځي پوښ هم د دې حجاب دی چي داخلي اخلاق، او محتويات يې پكښې پټ دي د حجاب نور ته يې هر بدكتونكی نااميده او شرمېدلی پاتيږي او يوه ذره يې په داخل باندي نه خبريږي.

ولي بې حجابه ښځه مثال د هغه خلاص كتاب لري چي خلګ يې لاس پر لاس كوي او سترګي يې ليكه پر ليكه او صفحه پر صفحه ګوري او د محتوياتو څخه یې عقلونه متأثره كيږي او تر هغه يې خلګ نه پسې پريږدي ترڅو چي د پاڼو ځلا يې نه وي وركه سوې نو پاڼي يې كږي وږي سي بلكي څيري سي آخر ور څخه داسي زوړ كتاب جوړ سي چي څوك يې د خپل وړوكي كور د وړوكي كتابتون مخي ته هم نه ايږدي.

د بې حجابي او باحجابي ښځي مثال د ښاري او خصوصي ټګسۍ دی بې حجابي ښځي په خپل لاس ځان داسي جوړ كړی وي چي هر څوك يې د ښايست څخه استفاده كوي، د خپل ناوړه نظر جراثيم او گرځونه ورباندي غورځوي، هر بدمرغه كتونكی يې په هكله ډېر ناوړه او بې ځايه فكرونه كوي آن تردې چي ځيني يې د ښكار كولو په نيت ځوروي هم؛ خاوند او سرپرست يې تنها د ډريور غوندي دېخوا او هغي خوا ته بيايي او مصارف ورباندي کوي خو استفاده يې د نورو ورسره شريكه وي.

خو محجبه ښځه د هغي خصوصي ټكسۍ حيثيت لري چي تنها مالك يې ورڅخه استفاده كولای سي او تنها مالك يې دی چي د ټولو ځانګړتياوو څخه يې پوره ګټه پورته كولای سي او د هر فاسد او ناوړه نظر څخه داسي محفوظه وي چي هر بدكتونكی يې پر كتلو باندي نا اميده او شرميدلی پاتيږي او د هيچا د بدنظر نښان نه ګرځي او نه يې هم د ښكار په نيت څوك تعقيبوي.

ځکه ښاري ټيکسي چي پر لاره باندي تيريږي هر څوک ورته لاس ورکوي ځکه طمعه ورته لري او د دې غوښتنه لري چي ماته به ودريږي او تر خپل هدف پوري به مي ورسوي خو شخصي ټيکسي ته هيڅوک لاس نه ورکوي ځکه چي طمعه نه ورته لري او پدې باندي يې ښه سر خلاصيږي چي دغه موټر د نورو خلګو د انتقال لپاره ندی بلکي د شخصي استفادې لپاره دی.

د بې حجابي او باحجابي ښځي مثال داسي دی لكه د بي پوښه او پوښ لرونكي شيرينۍ چي بې پوښه هر چاته مضره او تاواني وي آن تر دې چي د خپل مالك يې لا هم ورڅخه بد كيږي ولي پوښ لرونكي شيريني مرغوبه، مطلوبه او هر چاته د منلو وړوي، خوړل يې لذت او ګټه لري او ساتل يې طمع او اميد.

منبع: المنبر ويب پاڼه

ژباړه او زيادت: مولوي نورالحق مظهري

په فراه ولايت کي په خپل ډول کي لومړی فرهنګي ابتکار:

د فراه ولايت د اطلاعات او فرهنګ رياست په نوښت، نورو رياستونو په همکارۍ او په فراه ولايت کي د موجوده کتاب پلورنځيو په ګډون د لومړي ځل لپاره د دريو ورځو لپاره د کتابونو نندارتون جوړ سو.

په فراه ولايت کي د کتاب نندارتونونو جوړېدل په خپل ډول کي لومړی نيک اقدام دی چي د ځوانانو، محصلينو، زده کوونکو او د کتاب مينوالو ته جوړيږي.

که د کتاب ګټو او فوائدو ته پاملرنه وکړو دا به راته ثابته سي چي د کتاب نندارتون ډېري ګټي لري او جوړول يې د خپلي ټولني لپاره ډېر لوی خدمت دی.

د داسي نندارتونونو په ذريعه موږ خپلي ټولني او د علم مينوالو ته ښه خدمت کولای سو او د لاندي نتائجو هيله ورڅخه کيږي:

1 – د کتاب نندارتون د دې سبب جوړيږي د کتاب لوستلو او مطالعه کولو فرهنګ ترويج پيدا کړي چي په نتيجه کي محصلين، زده کوونکي او د کتاب مينوال د کتاب لوستلو او مطالعه کولو ته هڅول کيږي چي ګټه يې هر چا ته معلومه ده.

2 – د کتاب نندارتون له لاري ښه او ګټور کتابونه په ټولنه کي مشهور کيږي چي په رانيولو يې د علمي ودي تر څنګ ارومرو فرهنګونه او فکرونه اصلاح کيږي او مثبت انګېرنه د منفي انګېرني ځای نيسي.

3 – د کتاب نندارتون له لاري د کتابونو ارزښت عمومي کيږي، د تجارتي بازار برخه ګرځي او هر لوستونکی ممکن د مطالعې لپاره ځان ته د خوښي کتاب برابر کړي.

4 – د کتاب نندارتون که د ښه ترتيب او کنټرول سره پرانيستل سي د نورو ګټو تر څنګ کتاب پلورونکو او پېرېدونکو ته اقتصادي ګټه هم لري ځکه د پلورونکو ډېر کتابونه پلورل کيږي او پېرېدونکو ته په کمه بيه په لاس ورځي.

موږ ټوله بايد د داسي پرځای کارونو په ترسره کولو کي د يوبل سره مرسته او کومک وکړو ترڅو مو کتاب د ژوند برخه وګرځي او مطالعې ته تشويق سو او په علمي برخه کي د نيمګړتياوو د ورکولو ترڅنګ علمي ابتکارات هم وزېږوو.

د فراه ولايت د اطلاعات او فرهنګ رياست او نورو مربوطه رياستونو څخه مننه کوو چي تل يې د خپل ولس په فرهنګي او فکري برخو کي لاس نيوی کړی او هغوی ته يې مؤثري خپروني وړاندي کړي دي.

مولوي نورالحق مظهري

د عربي هيوادونو حاکمان او د اسرائيلو سياسي کمینونه:

په ايکس یا ټويټر کي يو يهودي د ايدي کوهين په نوم ليکي: هر عربي زعيم که پر خپل منصب د پاته کېدلو اراده لري بايد د اسرائيلو اطاعت وکړي او په اسرائيلو کي امنيت، استقرار او آبادۍ ته ژمن وسي کنه نو ډېر ژر به د منصب څخه ګوښه کيږي؛ نوموړی يهودي وايي: تر پنځوس ډېر کلونه کيږي چي بشار اسد او پلار يې زموږ د شمالي پولو ساتنه کوي.
که څه هم دا په مجازي نړۍ کي ظاهرا د يوه کس خبره ده خو که حقيقت ته سړی وګورو ددې خبري رښتیاوالی ورته ثابتیږي ځکه د غزې په موضوع کي د عربي هيوادونو د حاکمانو مرګونی سکوت، د اسرائيلو سره د ځينو عربي هيوادونو مرستي او حماس ته د ځينو ګوت څنډني ددې خبري لپاره ښکاره دلائل دي.
پر عربي هيوادونو د اسرائيلو دغه باداري او بابېړی د عربي هیوادونو د اختلافاتو او عیاشیو تر څنګ د امریکا او اسرائیلو سیاسي کمين ته د دوی د لوېدلو نتيجه ده چي اوس د امريکا بېله مشورې او د اسرائيلو بېله رضايته هيڅ کار نسي کولای.
موږ مسلمانان بايد تل ځانونه د کفارو او نورو دښمنانو د سياسي کمينونو څخه وساتو ځکه د نظامي کمين په نسبت د سیاسي کمين څخه وتل ډېر ګران دی.
مولوي نورالحق مظهري

د حجاب اړوند د شبهاتو جوابونه:(اتمه شبهه)

د حجاب مخالفين وايي: د ښځو لخوا حجاب، د نارينه وو د جنسي طاقت هلاک کوونکی دی؛ دوی وايي: جنسي طاقت په انسان كي ډېر لوی او خطرناكه طاقت دی چي مهم والي ته يې په کتو هغه بايد هلاكت او نابودۍ ته پرې نه ښودل سي بلکي په هره طريقه چي وي بايد پوره كړل سي؛ د جنسي طاقت ډېر خپه كول او بندول په انسان كي د فكري انفجار لامل كيږي چي انسان دې ته مجبوركيږي چي پر ښځو باندي د خپل جنسي طاقت د پوره كولو لپاره حمله وكړي.‌ 

د حجاب مخالفين وايي: معلومه خبره ده چي حجاب د ښځي ښايست پټوي چي له امله يې ځوانان د جنسي شهوت د ډېر بندښت او نه پوره كېدلو له وجهي نژدۍ ده چي ليونيان سي او دېته اړ ايستل  سي چي پر ښځو باندي دي د خپل جنسي طاقت د ډېروالي له وجهي حمله وكړي او يا دي هم ددې سبب سي چي ځوانان دي د ښځو غصب كولو او تښتولو ته مخه كړي.

دوی وايي: ددې مشكل علاج دا دی چي ښځي حجاب ونكړي تر څو ځوانان وكولای سي دوی ته په كتلو سره خپل بند شهوت آزاد كړي تر څو يې سترګي مړې او طبيعت يې سوړ سي او د جنسي طاقت د ډېروالي له کبله د دوی د فكري  انفجار پېښي را كمي سي.

جواب: د دوی په جواب كي بايد وويل سي چي لومړی خو ستاسي دا خبره سل په سلو كي غلطه ده ځكه دكتلو او نظر په مطلقي آزادۍ كي چي انسان دي ددې حق ولري چي هر شي ته وګوري هغه كه بدوي او كه ښه وي‌ د انسان لپاره ډېري تباهۍ او بربادۍ دي؛ ددې تر څنګ چي د اسلامي او اخلاقي اصولو څخه پكې لويه سرغړونه ده د انسان پر مخ د اخلاقي فساد لويي دروازې را پرانيزي او د زنا، لواطت، جنسي انحرافاتو په شمول ټولنيز فسادونه او ډول ډول جرمونه ور څخه پيدا كيږي.  

سترګي چي كوم ځای د جنسي غوښتني پر بنسټ هدف وټاكي د همدغي غوښتني پر بنياد انسان ددې هڅه او كوښښ كوي چي په جنسي رابطې باندي هغه هدف ته ځان ورسوي چي په نتيجه كي انسان د يوه حيوان غوندي بې بندوباره او د نفس د ناوړه غوښتنو غلام جوړيږي چي بيا نو نور په انسان كي انساني شرافت اوكرامت نسي پاته كېدلای بلكي د يو مست بې بندوباره حيوان حيثيت غوره كوي چي بيا انسان د ځان لپاره د هيڅ قسم فضيلت او شرافت دعوه نسي كولای  نه هم د اشرف المخلوقات په صفت پر مځكه باندي د الله نماينده ګي كولای سي او نه هم په دنياكي د نورو مخلوقاتو د ژوند د سمون لپاره مثبت كارونه سرته رسولای سي.

څومره ښكلې، جامع او تجربه سوې خبره زموږ ګران پيغمبر صلی الله عليه وسلم  پدې هكله كړېده او فرمايلي يې دي: النظرة سهم من سهام إبليس مسمومة فمن تركها من خوف الله أثابه جل و عز إيمانا يجد حلاوته في قلبه.[ المستدرك علي الصحيحين7875]

يعني ناوړه كتل يوغشی دی د غشو څخه د شيطان، مسموم او زهرجن دی هر چا كه د الله له ويري پرېښودی الله پاك به داسي ايمان ورته وركړي چي خوند او لذت به يې په خپل زړه كي ومومي.

همدا راز په بل حديث كي فرمايي: 

العينان تزنيان واليدان تزنيان والفرج يصدق ذلك أو يكذبه.[ مسنداحمدبن حنبل8520]

ژباړه: سترګي زنا کوي لاسونه زنا کوي عورت يې تصديق او يا تکذيب کوي.

نو د هر اخلاقي فساد پيل د كتلو او نظركولو څخه كيږي نو لكه د اخلاقي فساد څخه چي هر څوك بايد ځان وساتي همداسي د كتلو او نظركولو څخه هم بايد ځان وساتي.

نو بېګانه ښځو ته كتل د ځوانانو حق نه بلكي د ځوانانو لپاره منع او حرام کار دی .

ستاسو بله خبره چي سل په سلوكي غلطه ده دا ده چي تاسو بېګانه ښځو ته كتل د جنسي شهوت پوره كېدل ګڼی؛ پداسي حال كي چي دكتلو په آزادۍ او بې بندوبارۍ باندي شهوت نسي پوره كېدلای بلكي شهوت را پورته كيږي او بيا نيمګړی پاتيږي چي دغه حالت يو قسم روحي او جسمي ناروغي د انسان لپاره پيدا كوي او انسان د روح او جسم په لحاظ په تزلزل، نا آرامۍ او وسوسې كي غورځوي چي انسان ته ډېر خطرناكه حالت دی.

هوكې قدرمنو لوستونکو!

زموږ ګران پيغمبر صلی الله عليه وسلم د ناوړه كتلو تاوان هغه وخت بيان كړی دی چي هغه وخت نه لابراتوار وو، نه اكسري وه نه التراساوند وو او نه هم نور تشخيصوي طبي اسباب چي دا خپله د اسلام پر حقانيت او د رسول الله صلی الله عليه وسلم پر صداقت او رښتینولۍ باندي د نورو دلائلو څخه يو دليل دی؛ رسول الله صلی الله عليه وسلم هغه وخت ناوړه او حرام كتلو ته زهرجنه او مسمومه غشي ويلې ده، هوكې زهرجنه اومسمومه غشي؛ كومه چي د انسان په بدن كي يې لګېدل د انسان لپاره د مرګ او يا هم مزمني ناروغۍ سبب جوړيږي؛ څوارلس سوه كاله وروسته د نړۍ پوهان او متخصص ډاكټران پدې باندي اعتراف كوي چي حرام كتل د انسان لپاره ډېر مضر دي.

داكتر(حسين الراشدي) چي د سعودي په هيواد كي په يو روغتون كي د هډوكو د جراحۍ متخصص دی پدې موضوع كي يې لويه مقاله ليكلې ده وايي: موږ داسي ويلای سو چي د بدن هيڅ داسي غړی او عضو نه پاتيږي چي هغه ته دي د حرام كتلو د زهرو څخه تاوان و نه رسيږي؛ ‌په ځينو اعضاؤ كي يې تأثير ډېر وي او په ځينو كي لږ وي‌ خو ټوله اعضاؤ ته د ناوړه كتلو د زهرو تأثير رسيږي آن تر دې چي ځيني ناوړه تأثيرات تر ديرشو كالو پوري د انسان په بدن كي پاتيږي. 

موږ به د هغو منفي تأثيراتو څخه چي د حرام كتلو له وجهي د انسان په بدن كي پيدا كيږي ځيني هغه مهم ذكر كړو چي انسان ورسره ډېر ګرفتاره كيږي.

1. د ناوړه كتلو له وجهي چي د انسان په وينه كي د جنسي هورمونونو فعاليت ډېريږي، حرارت د بدن او فشار يې لوړيږي له كبله يې په خولې، بغلونو او پښو كي بد بوی پيدا كيږي چي دغه بوی كله كله د لنډ مهال لپاره وي او كله كله تر ډېره وخته پوري پاتيږي آن تر دې پوري چي ځيني وخت ورسره نور خلګ هم په عذابيږي.

2. د ناوړه كتلو له وجهي چي په جنسي هورمونونوكي كوم تغيرات راځي له امله يې هغه پوستي منفذونه چي خوله او غوړ ورڅخه را وځي غټيږي په ځانګړي توګه د لاسو په ورغوو، لاندني برخي كي د پښو، دكونټو مينځ او تر بغلو لاندي د دغو برخو منفذونه ډېر غټيږي چي په نتيجه كي ورڅخه ميكروبي التهابات چي Sinus Pilonida  (ساينوس پايلونيدا) ورته وايي پيداكيږي، همدا راز په مخ كي ورڅخه ځيني اوقات داسي التهابونه پيداكيږي چي سبب ده ACNE ياځواني دانو د راختلوجوړیږی.

3. كوم خلګ چي حرام كتل ډېركوي او په دوی كي دغه جنسي هيجان ډېر را پورته كيږي او د جنسي هورمونونو فعاليت يې په وينه كي ډېريږی دغه كار يې يو د هغو اسبابو څخه جوړېدلای سي چي د هغو څخه د نيم سر درد او يا Migrain  نیمسری پيدا كيږي چي ډېره خطرناكه ناروغي ده.

4. د بد نظر او بد كتلو څخه انسان ته د بندونو درد پيدا كيږي په خاصه توګه د لويو بندونو لكه ځنګون، ورون، ملا او داسي نور.... چي د همدغه هورمونونو د ډېر فعاليت له وجهي انسان ورسره لاس او ګرېوان كيږي؛ شايد د دې لامل دا وي چي هغه مايعات چي په بندونوكي دي او بندونه د التهاب څخه ساتي هغه به وچيږي په دې خاطر دی چي په غربي نړۍ كي دغه ناروغي ډېره ده ځكه چي هلته ډېری خلګ د ورځي څو ځله د جنسي هورمونونو د لوړ فعاليت سره مخامخ كيږي. 

نوموړی ډاكتر وايي: پر جنابت باندي ويدېدل هم د بندونو د ناروغيو سبب كيږي ځكه چي هلته هم ياد مايعات وچيږي؛ پدې خاطر دی چي طريقه د رسول الله صلی الله عليه وسلم داسي وه چي يا به يې د جنابت وروسته غسل كوی او يا به يې هم اودس كوی پر جنابت باندي بېله غسله او يا اودسه نه ويدېدی.

5. بد نظر او كتل پر زړه باندي ناوړه تأثير ايږدي او مختلفي د زړه ناروغۍ ورڅخه پيدا كيږي.

6. بد نظر د انسان پر بولي سيستم باندي ډېره ناوړه اغېزه لري او مختلفي ناروغۍ ورڅخه پيدا كيږي لكه: د پروستات، مثانې او كليو التهاب چي له كبله يې مختلفي صحي ستونزي ور څخه را پيدا كيږي.

له همدې كبله چي بد نظر او كتل د انسان لپاره ډېر تاوانونه لري په اسلام كي د هغه څخه منع راغلې او انسان ته په هغه باندي د مبتلا كېدلو څخه د مخنيوي لاري چاري ښوول سويدي مثلا: شرعا سړی د دويم ځل كتلو څخه و هغي ښځي ته منع سوی دی چي لومړی ځل يې ورته په ناپامۍ كي او يا پدې ګمان چي شايد د ده شناخته وي كتلي وي ځكه امكان سته چي په دويم ځل كتلو باندي يې شهوت را پورته سي او پورته ناوړه حالت ورته عارض سي.

همدا راز ښځي ته د دې لارښوونه سوېده چي د كور څخه بهر دي خپل زينت نه ښكاره كوي او د نارينه وو پر ټولۍ دي پداسي حالت كي نه تيريږي چي عطر او خوشبويي يې وهلې وي ځكه د دې احتمال سته چي نارينه دي د دې د زينت د ليدلو له وجهي په ياد سوي آفت باندي مبتلا سي، ‌شهوت يې را پورته سي او په وينه كي يې د جنسي هورمونونو فعاليت ډېر سي چي په نتيجه كي په ناروغيو باندي اخته كيږي.

آن تر دې چي هغي ښځي ته چي قصدا خپل زينت بېګانه خلګو ته ښكاره كوي او د خوشبويي او عطرو سره پر بېګانه خلګو باندي تيريږي د زانيې نوم وركول سوی دی ځكه چي د دې څخه دغسي حالت ښكاره كېدل د دې سبب جوړيږي چي نارينه دي په زنا باندي اخته سي.

همدا راز په اسلام كي د بېګانه ښځو سره د خلوت او يوځای والي او د هغوی سره د اختلاط څخه د همدې هدف لپاره ممانعت راغلی دی او نارينه ته د دې اجازه نده وركول سوې چي بېګانه ښځو ته لاس وروړي او يا دي هم مصافحه ورسره وكړي.

همدا راز اسلام د انسان څخه د شهوت د را پورته كېدلو د تاوان د مخنيوي په حكمت داسي لاري چاري بيان كړيدي چي په عملي كولو يې د پورته تاوانونو څخه ساتل كېدلای سي.

مثلا: كله چي خاوند د خپلي ښځي څخه د مقاربت غوښتنه وكړي ښځه بايد د هغه غوښتني ته (كه كوم شرعي ممانعت نه وو)  غاړه كښيږدي ځكه چي پدې وخت كي د ښځي نافرماني پداسي حال كي چي خاوند يې اراده ولري او جنسي هورمونونو يې په وينه كي فعاليت پيل كړی وي د دې سبب كيږي چي خاوند دي د يادو ناروغيو سره مخ سي.

همدا راز كه يو سړی په ناڅاپي توګه د شهوت د را پورته كېدلو سره مخامخ كيږي ډېر ژر بايد د هغه څخه د په سمه طريقه د خلاصون هڅه وكړي مثلا په بې اختياره توګه د كور څخه بهر يوې ښځي ته ګوري او جنسي حركت ورته پيدا كيږي شرعا دا سړی كله چي خپل كورته راځي بايد د خپلي ميرمني سره همبستري وكړي تر څو جنسي حرارت يې كښيني او په يادو ناروغيو باندي د اخته كېدلو څخه وساتل سي.

او كه زمنيه ورته برابره نه وه بيا دي غسل وكړي او بدن دي پرېوي تر څو د بدن حرارت يې كښيني او په يادو ناروغيو باندي د اخته كېدلو څخه وژغورل سي.

او څوك چي مجرد وي د هغه لپاره دا لازمه ده چي د لومړي سره څخه د دې حالت د را پورته كېدلو څخه ځان وساتي هغه پداسي طريقه چي خپلي سترګي دي كنټرول كړي او د بد نظر او كتلو څخه دي ډډه وكړي او ځان دي داسي جوړ كړي چي هر كله يو ځل ور څخه كتل كيږي د دويم ځل كتلو څخه دي ځان وساتي. 

او بل مجرد سړی دي روژه ونيسي ځكه د روژې په نيولو باندي يې نفس ضعيفه كيږي او جنسي ميلان يې نه را پورته كيږي او هغه څوك چي د نكاح پركولو باندي توان ولري هغه خو دي نكاح وكړي تر څو په واسطه يې د جنسي انحراف څخه وساتل سي همدا راز اودس كول د جنسي حرارت په كمولو كي ډېره مرسته كوي په خاصه توګه په هغه حالت كي چي حرارت يې را پورته سوی وي.

د اوس په وخت كي چي بې حجابي ډېره سوېده او په هر ځای كي انسان د بد كتلو د زهرجنو غشو سره مخامخ كيږي علماء فرمايي ډېره ښه خبره دا ده چي كله د كار څخه او يا د بازار څخه كور ته راځي غسل وكړي تر څو چي بدن يې د زهرجنو كتلو د تاثيراتو څخه پاك سي.

د حجاب مخالفينو او د پورته شهبې واردوونکو ته بايد ووايو چي دا څومره تبعيض آميزه خبره ده چي تاسو واياست ښځي دي د نارينه وو لپاره حجاب نه كوي!؛ يعني د دې لپاره چي نارينه ورته وګوري او خوند ورباندي واخلي؛ دا څومره خطرناكه او غير معقوله خبره ده! ښځه تنها د دې لپاره نده پيدا سوې چي نارينه ورڅخه ګټه پورته كړي، ښځه د الله پاك مستقل مخلوق دی او الله پاك ورته ډېر حقوق وركړيدي، داسي نسي كېدلای چي نارينه بېلاري كيږي او د خپل نفس تابع ګرځي تاوان به يې ښځه وركوي؛ د خپلي ميرمني او مينځي څخه بغير انسان د بلي هيڅي ښځي څخه جنسي ګټه نسي پورته كولای؛ نو ښځه به ارومرو حجاب كوي كه نا اهله نارينه د جنسي جوش له كبله مري هم به ښځه خپل حجاب نه پسې پريږدي‌ ځكه نارينه ته دغه ستونزه په خپل لاس پېښه سوېده ولي هغه وقايوي كارونه نه كوي كوم چي اسلام ورته ښوولي دي؟ ولي داسي ناوړه كار ته لاس اچوي؟ آيا دی عقل نه لري؟ عاقل سړی هيڅ وخت ځان د جنسي فكر نه قرباني كوي او هيڅ كله بد كتلو ته زړه نه ښه كوي.

بله خبره چي د دغه خلګو د دې شبهي پر بطلان دلالت كوي دا ده چي كه د دوی خبره صحيح وای يعني د بې حجابۍ په سبب په ځوانانو كي جنسي پېښي كمېدلای او د ښځو ځورول وركېدلای نو په كفري او غربي هيوادونوكي به چي بې حجابې پكښې خپل اوج ته رسېدلېده دغسي پېښي نه كېدلای، د هغوی ځوانان او نارينه به په جنسي شهوت باندي ماړه سوي وای او هلته به د ښځو د ځوروني او غصب كولو مخه نيول سوې وای سره ددې چي هلته دا ټولي پېښي په ډېره لويه  پيمانه باندي كيږي.

 يو كتاب چي د "الجريمة في أمريكا" په نامه باندي ياديږي هغه كي راځي: په هرو شپږو دقيقو كي په امريكا كي  د جنسي ځوروني يوه  پېښه د قوت او سلاح په زور باندي را منځته كيږي په  1978ميلادي كال كي يولك  او اوه څلوېښت زره او درې سوه نه اتيا پېښي رامنځته سوي دي او دا شميره په  ،‌1987ميلادي كال كي دوه لكه  او اوه ويشت زره او اوه سوه او څلور شپېته پېښو ته ختلې ده.

نو !!! كه چيري د بې حجابۍ په راتللو كي خير وای او جنسي پېښي كمېدلای په غرب كي به كمي سوي وای هغه دی ورځ تر بلي لا پكښې ډېږي،‌ عجيب او غريب كارونه پكښې كيږي. 

بله خبره دا ده چي جنسي غريزه په نارينه او ښځه كي الله پاك د ډېرو حكمتونو پر بنياد پيدا كړېده چي يو حكمت يې د انساني نسل بقاء او دوام دی؛ د دې لپاره يې نده پيدا كړې چي دوی ورباندي ځان تباه او برباد كړي او د هغې په سببيت خپل انساني ارزښت تر پوښتني لاندي راوړي او دا معلومه خبره ده چي د بې حجابۍ په حالت كي او پداسي حالت كي چي ښځي دي نيم لوڅي وګرځي دغه غريزه په نارينه وو كي آرامه نسي پاته كېدلای او داسي پاروونكي حالت ته د يوه طبيعي حالت په سترګه نسي كتل كېدلای بلكي جنسي غريزه د داسي منظر په ليدلو باندي را پورته كيږي چي نتيجه به يې هغه وي كوم چي مخكي ذكر سوه؛ يعني د انسان د ظاهري او باطني ژوند تباهي او بربادي به يې پايله او نتيجه وي.

الله دي مو د داسي حالت څخه وساتي او الله دي زموږ ټولنه يوه سوچه اسلامي ټولنه وګرځوي تر څو ټولي ناخوالي زموږ د مينځ څخه وركي سي.

په آخره كي ددې خبري كول غواړم:كوم خلګ چي دغسي پوچه او بې بنياده خبره كوي چي د بې حجابۍ په خپرولو باندي جنسي پېښي كميږي او يا جنسي تنده ورباندي ماتيږي دوی به د هغو خلګو څخه وي چي ځانونه يې خصيان كړيوي او شهوت يې د بيخه څخه قطعه سوی وي نو دوی جنسي پارونه بيخي نه پېژني او يا به هم دوی په هغي ناروغۍ باندي اخته سوي وي چي په سبب يې د انسان جنسي ميلان بيخي له منځه ځي.

منبع: المنبر ويب پاڼه.

ژباړه او تحقيق: مولوي نورالحق مظهري