د روژې مياشتي صالح اعمال به څنګه ساتو؟

د هر نيک عمل د کولو وروسته د هغه عمل ساتل ډېر مهم دی ځکه که عمل و نه ساتل سي نو هغه عمل ضائع او خراب سو انسان ته يې هيڅ ګټه نه رسيږي الله تعالی فرمايي: يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَلَا تُبْطِلُوا أَعْمَالَكُمْ.[محمد۳۳].
ژباړه: ای مؤمنانو د الله تعالی اطاعت وکړئ، د رسول اطاعت وکړئ او خپل عملونه مه باطلوئ.
يعني خپل عملونه په ګناهونو باندي مه باطلوئ ځکه په ګناه باندي د انسان صالح اعمال له مينځه ځي لکه په حديث شريف کي چي راځي: إِيَّاكُمْ وَالْحَسَدَ فَإِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ.[سنن ابي داود۴۹۰۵].
ژباړه: ځانونه د حسد څخه وساتئ ځکه حسد نيکۍ داسي خوري لکه اور چي بوټي خوري.
همداسي په حديث کي راځي: عن حذيفة، عن النبي صلى الله عليه وسلم قال: قذف المحصنة يهدم عمل مائة سنة.[مساوئ الأخلاق للخرائطي۷۰۳]
ژباړه: حذيفه رضي الله عنه د رسول الله صلی الله عليه وسلم څخه روايت کوي چي ده وفرمايل: پر پاکي ښځي تهمت ويل د انسان د سلو کلونو عملونه خرابوي.
همداسي په حديث کي راځي: إِنَّ رَسُولَ اللَّهِ عَلَيْهِ السَّلامُ كَانَ يَقُولُ: اتَّقُوا عَلَى حَسَنَاتِكُمْ، وَلا تَنْسَلَّ مِنْكُمْ كَمَا يَنْسَلُّ الْمَاءُ مِنْ يَدِ أَحَدِكُمْ، قَالُوا: بِمَاذَا يَا رَسُولَ اللَّهِ؟ قَالَ: بِالاغْتِيَابِ.[الجامع في الحديث لإبن وهب۳۴۱]
ژباړه: رسول الله صلی الله عليه وسلم ويل: خپلي نيکۍ وساتئ او ستاسي څخه دي په ناخبرۍ کي نه ځي لکه اوبه چي ستاسي د لاس څخه ځي، صحابه وو وويل: په څشي باندي نيک اعمال زموږ د لاسه څخه ځي يا رسول الله؟ رسول الله صلی الله عليه وسلم وفرمايل: په غيبت کولو باندي.
يعني که تاسي د نورو مسلمانانو غيبت وکړی نو ستاسي نيک اعمال به ورسره له مينځه ځي.

لکه د ګناه څخه په ځان ساتني چي د انسان صالح اعمال ساتل کېدلای سي پر نيکو اعمالو په استقامت باندي هم نيک اعمال د ضائع کېدلو څخه ساتل کېدلای سي.
علماؤ  فرمايلي دي: که څوک په لاندي پنځو شيانو کي استقامت وکړي ارومرو به يې مخکني نيک اعمال قبول سي او په را روان وخت کي به د نورو نيکو اعمالو توفيق ورته په نصيب سي:
۱ – استقامت د الله تعالی پر توحيد او يووالي.
۲ – استقامت پر عباداتو او طاعاتو.
۳ – استقامت پر اخلاص او حسن نيت.
۴ – استقامت د وينا او عمل پر يووالي؛ يعني لکه په خوله چي ښه خبري کوي په عمل کي هم ښه کارونه وکړي.
۵ – استقامت د ظاهر او باطن پر يووالي؛ يعني لکه په ظاهره چي انسان ځان له ګناه څخه ساتي په باطن کي هم ځان د ګناه څخه وساتي.
نو مسلمان بايد خپل ټول صالح اعمال د کولو څخه وروسته وساتي تر څو ضائع نسي او د ثواب څخه يې محروم نسي.
مولوي نورالحق مظهري