اسلامي مبارز ته پيغام:(۲)

مبارزه وروره! ستا اساسي هدف بايد د اسلام، مذهب او نظام څخه دفاع وي او هيڅ ځای ددې هدف څخه تر شا نسې او ددغه درو واړو څخه په دفاع کي ميدان خالي نکړې.
اسلام ستا دين دی او ستا د ژوند چوکاټ او قانون دی ځکه نو دفاع يې ستا ايماني دنده ده او پر اسلام باندي د شبهاتو جوابول ستا مسئوليت دی.
په دې باندي بايد ته خپل سر خلاص کړې چي الله تعالی ته اسلام تر ټولو غوره دين دی او بېله اسلام څخه بل هيڅ دين الله تعالی ته د منلو نه دی الله تعالی فرمايي: إِنَّ الدِّينَ عِنْدَ اللَّهِ الْإِسْلَامُ.[آل عمران۱۹] ژباړه: يقينا الله تعالی ته غوره دين اسلام دی. همداسي فرمايي: وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ.[آل عمران۸۵] ژباړه: څوک چي بېله اسلام څخه بل دين وغواړي ګرسره  به ورڅخه قبول نسي.
د اسلام دين الله تعالی زموږ لپاره انتخاب کړی او موږ يې د هغه په پيروۍ باندي امر کړي يو الله تعالی خپل پيغمبر ته فرمايي: فَأَقِمْ وَجْهَكَ لِلدِّينِ حَنِيفًا.[الروم۳۰] ژباړه: خپل مخ پر دين باندي ثابت کړه پداسي حال کي چي د نورو ټولو اديانو څخه و دين ته د اسلام مائل وسې.
يعني ته او ستا پلويان بايد پر دين د اسلام ټينګ ولاړ وي او د دين په ساتنه کي استقامت ولري.
ځکه نو مسلمان ته تر هر شي دين لومړيتوب لري او د دين په ساتنه او غځولو کي بايد خپل ټول توان په کار واچوي.
مذهب ستا د دين لپاره ډېره ښه تشريح ده او داسي اصولي چوکاټ دی چي ته  يې په منلو سره د هر ډول نفسي غوښتنو او ديني انحراف څخه ساتل کېدلای سې ځکه نو دا ستا مسئوليت دی چي د خپل حنفي مذهب دفاع په خپلو لومړيتوبونو کي وګرځوې او د هر ډول افراط او تفريط څخه په ډډي کولو سره خپل مذهب د تشدد او خرافاتو څخه وساتې.
د افغانانو د بريا او يووالي راز د پاک حنفي مذهب په منلو او ساتلو کي دی ځکه نو ته بايد دغه راز د ځانه سره وساتې او هيڅ وخت چا ته اجازه ور نکړې چي ستا د مذهب خلاف شبهات وارد کړي او يا ستا د مذهب خلاف بل فکر ته ترويج ورکړي.
اسلامي نظام ستا د سياست او اقتدار سمبول او کور دی ځکه نو ته يې په سمبالولو او ساتلو کي ډېر لوی مسئوليت لرې او ددې لپاره چي اسلامي ټولنه د سياسي انحراف څخه وساتل سي ته يې بايد د نظام څخه دفاع وکړې او پر نظام باندي هر ډول شبهات په مسلکي ډول په علمي ژبه او پوره استدلال جواب کړې.
موږ مسلمانان د اسلام په ساتلو او غځولو مأمور يو خو د اسلام ساتل او غځول د اسلامي نظام په شتون کي ممکن وي ځکه نو د اسلامي نظام اقامه زموږ دنده ده او د اقامې وروسته يې سمبالول او ساتل په هره طريقه چي وي زموږ فريضه ده.
دوام لري...
مولوي نورالحق مظهري

روژه د برکتونو میاشت:

د رسول الله صلي الله عليه وسلم د امت سره دا د الله پاک لوی احسان دی چي دوی ته يې د روژې مبارکه مياشت ورکړېده او دا مبارکه مياشت لکه الله پاک چي په قرآن کي او رسول الله صلی الله عليه وسلم په خپلو احاديثو کي مبارکه بللې همداسي د برکتونو او ثوابونو څخه ډکه ده، موږ به په نوبت ددې مبارکي میاشتي ډډېر برکته ستاسي شريک کړو .

 لومړی برکت:

لومړی بركت ددې مياشتي دا دی چي الله پاک دا مياشته د عظيم عبادت روژې لپاره ځانګړې کړې او تر نورو مياشتو يې ددې رتبه لوړه کړې لکه الله پاک چي فرمايي: فَمَنْ شَهِدَ مِنْكُمُ الشَّهْرَ فَلْيَصُمْه.[ البقرة 185] ژباړ: څوک چي ستاسو څخه مياشت وويني نو حتما دي روژة ونيسي.

دا چي الله پاک دا میاشت دداسي عظیم عبادت لپاره ځانګړې کړه او د دغه عبادت وخت یې دغه میاشت وګرځوله دا خپله لوی برکت دی.

نو موږ باید ددې میاشتي قدر وپېژنو پدې میاشتي کي د عظیم عبادت ترڅنګ نور عبادتونه هم ډېر وکړو تر څو الله پاک مو د خپلو خاصو بندګانو څخه وګرځوي.

 دویم برکت:

بل برکت ددې مياشتي دا دی چي الله پاک پدې مياشتي کي قرآن عظيم الشأن نازل کړی دی هغه قرآن چي د انسان د دنيوي او اخروي سعادت لپاره اساسي قانون دی لکه څنګه چي الله پاک فرمايي: شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى وَالْفُرْقَانِ.[البقرة 185] ژباړه: د روژې مياشت هغه مياشت ده چي په هغې کي قرآن نازل سوی دی، هغه قرآن چي د خلګو لپاره هدايت دی او د لارښووني او د حق او باطل تر مينځ د توپير کولو لپاره نښي دي.

نو موږ مسلمانان چي څومره قرآن ته احترام لرو، هغه پر خپل ژوند باندي حاکم بولو او خپله هره ستونزه پر قرآن باندي آواروو؛ د روژې د مبارکي میاشتي احترام هم باید ولرو او چي په کومو کارونو یې سمه لمانځنه او حق آداینه کیږي هماغه کارونه وکړو. 

دوام لري...

مولوي نورالحق مظهري

اسلامي مبارز ته پيغام:(۱)

که ته پر شريعت برابر وې په دې مه خوابدی کېږه چي خلګ په تا بسې خبري کوي ځکه خلګو په پيغمبرانو او امامانو پسې هم خبري کولې او ممکن د خلګو خبري ستا د خدمت او تقوی په سبب را پورته سوي وي ځکه مشهور متل دی چي ميوه لرونکې ونه په ډبرو ويشتل کيږي.
او که تا د باطل په وړاندي مبارزه کول نو پوه سه چي د خلګو خبري ستا په وړاندي د باطل عکس العمل او غبرګون دی ځکه کله چي د حق آواز پورته سي باطل خپله چيغي وهي او رش جوړوي نو ددې پر ځای چي ته خوابدی وسې بايد خوشحاله وسې ځکه د حق لپاره د خدمت نتيجه هغه وخت ښکاره کیږي چي اهل باطل ستا په وړاندي په چیغو سي او تبليغات درپسې شروع کړي.
اهل باطل تل د اهل حق د خدمت په وړاندي غبرګون ښکاره کوي ځکه تر هغه وخته چي رسول الله صلی الله د دین لپاره دعوت شروع کوی هیچا بد ورباندي نه ويل بلکي په امین يې یادوی خو کله چي په پيغمبرۍ مبعوث سو او د دین لپاره یې دعوت پیل کړ بيا یې هماغه خلګ ټول دښمنان سوه او رسول الله صلی الله علیه وسلم یې په ساحر، کاذب، مجنون او نورو بدو نومونو متهم کړ.
اهل باطل د اهل حق چوپ کولو او ناهيلی کولو لپاره ډېر تاکتيکونه په کار اچوي چي يو تاکتيک یې منفي تبليغات او بدي خبري کول دي.
په دې باندي هم باید ته خوشحاله وسې چي اهل باطل هيڅوخت ستا سره ځان نه مخامخ کوي او که کله در سره مخامخ کیږي نو تا ته هيڅ نه وايي ځکه پر تا باندي دليل نلري، ځيني وختونه خو ستا مخ ته د شرم احساس کوي او په چاپلوسۍ دي تر ځان تېروي.
خو په دې باندي پوه چي باطل هر څومره رش جوړ کړي او چي هر څومره زورور وي يوه ورځ به ستا په وړاندي ماتي خوري ځکه د حق د بريالیتوب وعده الله تعالی کړېده او ددې لپاره لويه بېلګه د ا.ا.ا مجاهدين دي چي تقريبا ټولي نړۍ تبليغات او منفي خبري پسې کولې خو الله تعالی د ټولو چلينجونو سره سره برياليتوب ته ورسول او ټول مخالفين یې وشرمول.
دوام لري....
مولوي نورالحق مظهري

د نوروز د لمانځني پر حراموالي باندي دلائل:

ليکوال: مولوي نورالحق مظهري
1. د نوروز په لمانځلوکي د کفارو د نفسي غوښتنو متابعت دی، پداسي حال کي چي مسلمان د هغوی د نفسي غوښتنو د متابعت څخه صراحتا منع سوی دی.
الله جل جلاله فرمایي:وَلَئِنِ اتَّبَعْتَ أَهْوَاءَهُمْ مِنْ بَعْدِ مَا جَاءَكَ مِنَ الْعِلْمِ إِنَّكَ إِذًا لَمِنَ الظَّالِمِينَ.[البقرة 145]
ژباړه: که چيري (بالفرض) ته د دوی (کفارو) د نفسي غوښتنو متابعت وکړې وروسته تر دې چي تاته علم درکړل سوی دی نو يقينا پدې وخت کي ته د ظالمانو څخه يې.
وَلَا تَتَّبِعْ أَهْوَاءَهُمْ عَمَّا جَاءَكَ مِنَ الْحَقِّ لِكُلٍّ جَعَلْنَا مِنْكُمْ شِرْعَةً وَمِنْهَاجًا.[ سورة المائدة 48]
ژباړه: او ته متابعت ددوی د نفسي غوښتنو مکوه د هغه څه نه چي تاسو ته د حق څخه راغلی دی، ستاسو څخه هر يوه ته مي لاره او طريقه جوړه کړېده.
يَا أَيُّهَا النَّبِيُّ اتَّقِ اللَّهَ وَلَا تُطِعِ الْكَافِرِينَ وَالْمُنَافِقِينَ إِنَّ اللَّهَ كَانَ عَلِيمًا حَكِيمًا * وَاتَّبِعْ مَا يُوحَى إِلَيْكَ مِنْ رَبِّكَ إِنَّ اللَّهَ كَانَ بِمَا تَعْمَلُونَ خَبِيرًا [الأحزاب 1 – 2]
ژباړه: ای پيغمبره د الله څخه ووېريږه، د کافرانو او منافقينو پيروي مکوه يقينا چي الله پوه او حکمت والا دی، او د هغه څه متابعت وکړه چي تاته د الله له لوري د وحي په توګه راغلي دي يقينا چي الله پاک په هغه څه باندي ښه خبر دی چي تاسو يې کوی.
په پورته آیتونو کي الله پاک رسول الله صلی الله علیه وسلم ته خطاب کوي چي د کفارو د نفسي غوښتنو متابعت مکوه ستاسو لاره د هغوی د لاري څخه بېله ده یعني د مسلمانانو لاره بېله ده او د کفارو لاره بېله ده، دلته کڅه هم خطاب رسول الله صلی الله علیه وسلم ته دی خو حکم یې عام دی هر مسلمان ورباندي مکلف دی.
2 - د نوروز په لمانځلو باندي ځان دکفارو غوندي جوړول دي، او مسلمان صراحتا ددې څخه منع سوی دی چي ځان دي د کفارو غوندي جوړکړي.
الله جل جلاله فرمایي:
وَلَا تَكُونُوا كَالَّذِينَ نَسُوا اللَّهَ فَأَنْسَاهُمْ أَنْفُسَهُمْ أُولَئِكَ هُمُ الْفَاسِقُونَ.[ سورة الحشر19]
ژباړه: تاسو مه جوړيږئ په شان د هغو خلګو چي الله پاک يې هېرکړی دی نو دوی ځانونه هېرکړيدي، دوی هغه خلګ دي چي د الله د اطاعت څخه وتلي دي.
أَلَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلا يَكُونُوا كَالَّذِينَ أُوتُوا الْكِتَابَ مِنْ قَبْلُ فَطَالَ عَلَيْهِمُ الأَمَدُ فَقَسَتْ قُلُوبُهُمْ وَكَثِيرٌ مِنْهُمْ فَاسِقُونَ.[سوره الحديد]
آيا نه دی نژدې سوی هغه خلګو ته چي ايمان يې راوړی دا چي د دوی زړونه د الله د ذکر لپاره او د هغه حق څخه چي پر دوی نازل سوی دی ووېريږي، او د هغو خلګو په ډول نسي کوم چي دوی ته مخکي کتاب ورکړل سو، بيا پر دوی باندي زمانه اوږده سوه (يعني د دوی او أنبياؤ ترمينځ ډېره زمانه تېره سوه) نو د دوی زړونه کلک سوه او ډېری د دوی فاسقان دي.
په پورته آیتونو کي الله پاک مسلمانان د دې څخه منع کوي چي ځانونه دي د کفارو غوندي جوړ کړي.
3.  د نوروز په لمانځلوکي د کفارو لوري ته شوق او ميلان دی او الله پاک مسلمانان ددې څخه په ښکاره منع کړېده، فرق نلري که ميلان دوی ته په دوستۍ باندي وي، که د اسلام په هکله د دوی د خبرو په منلو باندي وي اوکه د دوی په کارونو باندي په خوشاله کېدلو باندي وي.
الله جل جلاله فرمایي:
وَلَا تَرْكَنُوا إِلَى الَّذِينَ ظَلَمُوا فَتَمَسَّكُمُ النَّارُ وَمَا لَكُمْ مِنْ دُونِ اللَّهِ مِنْ أَوْلِيَاءَ ثُمَّ لَا تُنْصَرُونَ.[هود113]
ژباړه: تاسو ميلان مکوئ هغوکسانو ته چي ظلم يې کړی(کافران سويدي) نو اور به مو مسه کړي، او تاسو لره بېله الله بل هيڅ دوست نسته بيا به ستاسو هيڅ نصرت ونسي.
پدې آیت کي الله پاک مسلمانان کفارو ته د شوق کولو او میلان کولو څخه منع کړيدي.
4. د نوروز په لمانځلوکي دکفارو سره مشابهت دی، او د هغه څخه رسول الله صلي الله عليه وسلم خپل امت منع کړی دی.
رسول الله صلی الله علیه وسلم فرمایي:
• عن عمرو بن شعيب عن أبيه عن جده : أن رسول الله صلى الله عليه و سلم قال ليس منا من تشبه بغيرنا لا تشبهوا باليهود ولا بالنصاري.[سنن ترمذي 2695]
ژباړه: عمرو بن شعيب د خپل پلار څخه هغه دده د نيکه څخه روايت کوي چي رسول الله صلی الله عليه وسلم وفرمايل: زموږ څخه ندی هغه څوک چي ځان د غير سره زموږ(چي کافران دي) مشابه کوي ، د يهودو او نصاراوو سره مشابهت مکوئ.
• عَنِ ابْنِ عُمَرَ قَالَ قَالَ رَسُولُ اللَّهِ -صلى الله عليه وسلم- « مَنْ تَشَبَّهَ بِقَوْمٍ فَهُوَ مِنْهُمْ ».[سنن ابي داود 4033]
ژباړه: هرڅوک چي ځان د يوقوم سره مشابه کړي دی د هماغه قوم څخه شمېرل کيږي.
په پورته احادیثو کي رسول الله صلی الله علیه وسلم مسلمانان د کفارو سره د مشابهت څخه منع کړیدي.

5. د نوروز ورځي پر لمانځلو باندي عملا د رسول الله صلي الله عليه وسلم لخوا بنديز لګېدلی دی: 

عَنْ أَنَسٍ قَالَ قَدِمَ رَسُولُ اللَّهِ -صلى الله عليه وسلم- الْمَدِينَةَ وَلَهُمْ يَوْمَانِ يَلْعَبُونَ فِيهِمَا فَقَالَ: مَا هَذَانِ الْيَوْمَانِ؟ قَالُوا كُنَّا نَلْعَبُ فِيهِمَا فِى الْجَاهِلِيَّةِ. فَقَالَ رَسُولُ اللَّهِ -صلى الله عليه وسلم- :إِنَّ اللَّهَ قَدْ أَبْدَلَكُمْ بِهِمَا خَيْرًا مِنْهُمَا يَوْمَ الأَضْحَى وَيَوْمَ الْفِطْرِ.

ژباړه: انس رضي الله عنه فرمايي: کله چي رسول الله صلي الله عليه وسلم مدينې منورې ته راغی، د مدينې خلګو دوې ورځي لمانځلې او په هغو کي يې لوبي کولې، رسول الله صلي الله عليه وسلم وفرمايل: دا کومي ورځي دي؟ دوی ورته وويل: موږ د جاهليت په وخت کي (يعني مخکي تر اسلام) دا ورځي لمانځلې او لوبي مو پکښې کولې. رسول الله صلی الله عليه وسلم ورته وفرمايل: الله پاک تاسو ته ددغه دوو ورځو په بدل کي دوې نوري ورځي چي تر دغه دوو ورځو ډېري ښې دي درکړي چي د لوی او کوچني اخترونو ورځي دي.

د رسول الله صلي الله عليه وسلم د حديث ددې جزء "قد ابدلکم بهما" له ورايه ښکاري چي د لوی او کوچني اخترونو ورځي د هغو دوو ورځو په بدل کي ورکول سويدي، معلومه خبره ده چي د بدل ورکولو وروسته، مبدل منه چي هغه پخوانۍ ورځي دي وروسته پر خپل حال باندي نسي پاته کېدلای. 

نو د نوروز او ميزان ورځي حرامي سوې پر ځای يې د لوی اوکوچني اخترونو ورځي کښيښودل سوې.

6. د نوروز د ورځي لمانځل صحابه کرامو غندلي او مسلمانان يې د لمانځلوڅخه وېرولي دي.

• عن عبد الله بن عمرو بن العاص _ رضي الله عنه _ قال: من بنى ببلاد الأعاجم وصنع نيروزهم ومهرجانهم  وتشـبه بهم حتى يموت وهو كذلك حشر معهم يوم القيامة. [ سنن البيهقي الكبرى: 9/234،]

ژباړه: د عبدالله بن عمروبن العاص رضي الله عنه څخه روايت دی چي هر څوک د کفارو په ښارونوکي بناء وکړي، د دوی نوروز او ميزان و لمانځي او د دوی سره ځان مشابه کړي ترڅو چي پر دغه حالت باندي مړ کيږي نو دغه سړی به د دوی سره حشر کيږي.

• عن عُمَرَ بْنَ الْخَطَّابِ رَضِىَ اللَّهُ عَنْهُ قَالَ : اجْتَنِبُوا أَعْدَاءَ اللَّهِ فِى عِيدِهِمْ.[رواه البخاري في تاريخه،والبيهقي]

ژباړه: حضرت عمر رضي الله عنه فرمايي: د الله پاک د دښمنانو د اخترونو څخه ځانونه وساتئ.

معلومه خبره ده چي " نوروز" د الله ددښمنانو اختر دی.

7. فقهاء کرامو د قرآن اوحديث څخه په استنباط د نوروز د ورځي لمانځل حرام بللی دی.

• قال المظهر: وفيه دليل على أن تعظيم يوم النيروز والمهرجان ونحوهما منهي عنه وقال أبو حفص الحنفي : من أهدى فيه بيضة لمشرك تعظيما لليوم كفر.[ فيض القدير شرح جامع الصغير]

ژباړه: مظهر ويلي دي: پدې خبره کي دليل دی پردې باندي چي د نوروز اوميزان د ورځو تعظيم منع سوی دی، ابوحفص حنفي ويلي دي: څوک چي د نوروز د تعظيم په نيت يوکافر ته يوه هګۍ ورکړي دی پدې باندي کافر سو.

• ويكفر بخروجه إلى نيروز المجوس والموافقة معهم فيما يفعلونه في ذلك اليوم وبشرائه يوم نيروز شيئا لم يكن يشتريه قبل ذلك تعظيما للنيروز لا للأكل والشرب وبإهدائه ذلك اليوم للمشركين ولو بيضة تعظيما لذلك اليوم.[مجمع الانهرفي شرح ملتقي الابهر- بحرالرائق- الفتاوي الهندية]

ژباړه: کافرکيږي په وتلو سره ونوروز ته د مجوسيانو اوپه موافقت باندي د دوی سره په هغه کارونوکي چي دوی یې پدې ورځ کي کوي. او کافرکيږي په رانيولو سره د يو شي د نوروز په ورځ کوم چي بله ورځ يې نه رانيوی. البته پخاطر ددې تعظيم د نوروز نه پخاطر د خوړلو او څيښولو، همدا راز کافرکيږي کافر ته په سوغات ورکولو پدې ورځ کي کڅه هم يوه هګۍ وي البته پخاطر د تعظيم ددې ورځي.

دنوروز لمانځل حرام دي کڅه هم د کافرانو او مجوسيانو په نيت باندي نه وي، ځکه چي د کافر سره پداسي شيانوکي مشابهت کول نيت نه غواړي، که په نيت باندي وي هغه خو علماء ليکي چي سړی ورباندي کافرکيږي او که بېله نيته وي نو حکم يې حراموالی دی.

د يادوني وړ ده چي دغه ليکنه په شريعت ورځپاڼه کي هم نشر سوېده.

د دين لپاره خدمت نه پټيږي:

د دين او اسلام لپاره خدمت داسي دی لکه کښت کول څوک چي يې د اصولو او شرايطو موافق وکړي ارومرو راشين کيږي او نتيجه ورکوي که يې څوک غواړي او که يې نه غواړي.
د دين لپاره خدمت هم همداسي دی څوک چي يې د اصولو سره سم وکړي ارومرو نتيجه ورکوي او په خلګو کي را ښکاره کيږي که يې مخالفين وغواړي او كه يې و نه غواړي.
ځکه نو د دين خادم بايد د لومړي سر څخه نتيجې او پايلي ته منتظر نسي بلکي په منظم ډول دي خپل خدمت کوي، که دده خدمت د الله لپاره په اخلاص باندي وو ارومرو يې الله تعالی نتيجه ښکاره کوي او د خدمت ريښې يې په ټولنه کي ټينګوي.
د الله تعالی د دين لپاره د خادمانو خدمت څوک پټولای هم نسي ځکه خدمت په خپله په ټولنه کي ځان را ښکاره کوي او د خدمت څخه متأثر سوي انسانان خپله خدمت ته شهرت ورکوي چي په نتيجه کي مخالفين او دښمنان مغلوب او ناهيلي کيږي او ورو ورو په ټولنه کي منفور او سپک ګرځي.
دا يقيني خبره ده چي د دين لپاره د خدمت مخي ته ستونزي پيدا کيږي خو ستونزي بايد هيڅ وخت د خدمت مخه و نه نيسي بلکي د ستونزي د پيدا کېدلو وروسته ددې تر څنګ چي د دين خادم به ستونزي هم آواروي بلکي خپله روحيه به نوره هم قوي کوي او د ثابت غره غوندي به د ستونزو په مقابل کي دريږي.
دا تجربو ښودلېده چي تقابل او تضاد د خدمت لپاره د تکامل او غور ذريعه ده ځکه نو بېله کوم تقابله خدمت ډېر ورو او سطحي وي خو د تقابل په وخت کي بيا ډېر چټک او دقيق وي ځکه نو د خدمت د پيل څخه بايد موږ متقابل او متضاد ته آماده ګي ونيسو تر څو مو خدمت ټکنی او نيمګړی نسي.
دا هم په ډاګه سوی حقيقت دی چي دين ته د خدمت په وړاندي اهل باطل تر ډېره وخته د پردې تر شا کار کوي او تل د اهل حق په وړاندي دوه مخيزه منافقانه سياست لوبوي ځکه نو ډېری وختونه د دين خدمت کوونکي په ناخبرۍ کي د ستونزو سره مخ سي له همدې امله دا ډېره مهمه ده چي د دين خادمان په ډېر تدبير او مهارت د پلان او ميکانيزم له مخي پر مخ ولاړ سي.
چي يو ځل د دين لپاره د خدمت مبادئ او اصول ټينګ سي بيا يې نو هيڅوک مخه نسي نيولای ځګه خدمت د زورو سيل حيثيت غوره کوي چي د خپل مخ څخه هر ډول موانع په خپل زور ليري کوي.
مولوي نورالحق مظهري

زموږ او د پخوانیو توپیر:

ژباړه: عون بن عبدالله رحمه الله فرمايي: ستاسو مخکي خلګو به د دنيا لپاره هغه شی ځانګړی کوی چي تر آخرت به يې اضافه سو او تاسو نن د آخرت لپاره هغه شی ځانګړی کوی چي تر دنيا مو اضافه سي.
يعني پخوانيو خلګو خپل کار او مال ټول د آخرت لپاره مصرفوی؛ کوم شی چي به د آخرت د مصرف څخه اضافه سو هغه به يې د دنيا لپاره مصرفوی ځکه آخرت د هغوی هدف وو او دنيا ته يې د ضرورت په سترګه کتل، خو تاسو بيا د هغوی پر عکس ياست خپل ټوله کار او مال د دنيا لپاره مصرفوی؛ کوم شی چي د دنيا څخه اضافه سي هغه بيا د آخرت لپاره مصرفوی ځکه ستاسو هدف او ټوله غم د دنيا ژوند ګرځېدلی دی نو له همدې امله مو د آخرت لپاره مصرف ضمني وي که تر دنيا کوم شی اضافه سو هغه د آخرت لپاره مصرفوی که اضافه نسو خو هيڅ شی د آخرت لپاره نه مصرفوی.

ښه وضاحت:
1 - د پخوا خلګو به لمانځه او عبادت ته پر دنيوي کار ترجيح ورکوله خو د اوس خلګ بيا کار ته تر لمانځه ترجيح ورکوي له همدې امله که د ځان سره د وخت محاسبه وکړو او هر لمونځ 15 دقيقې حساب کړو نو د 24 ساعته څخه موږ 1 ساعت او 15 دقيقې عبادت ته ورکوو نور 22 ساعته او 45 دقيقې کارونو، خوب او خوراک ته ورکوو دا يې زموږ انصاف او مسلماني؟!
2 - د پخوا خلګو به د الله په لاره کي دومره مال مصرفوی چي د خپل کار او کور تر مصرف به يې د الله په لاره کي ډېر لګښت کوی خو زموږ د زمانې خلګ د 100 څخه يو فيصد مال د الله په لاره کي بېله چندو، مرکو او ويلو نه مصرفوي دا يې هم د الله لپاره زموږ قرباني؟!
3 - د پخوا خلګو به د خپل فکر ډېره برخه د الله پاک په ذکر او د مسلمانانو د مصلحت لپاره کارول خو زموږ د زمانې خلګ بيا تل تنها د ځان په فکر کي وي نه يې الله هر وخت په ياد وي او نه يې د مسلمانانو په مصلحتونو باندي ځان ستړی کړی وي.
4 - د پخوا خلګو به د خپل هر مسلمان ورور سره د اړتيا په صورت کي فزيکي کومک هم کوی خو زموږ د زمانې خلګ بيا ددې پر ځای چي د مظلوم او لوېدلي انسان لاس ونيسي او اړتيا يې پوره کړي د هغه څخه د يادګارۍ فيلمونه او عکسونه اخلي.
5 - د پخوا خلګو به هر مسلمان د ځان دوست بلی او هر کافر به يې د ځان دښمن بلی خو زموږ د زمانې ځيني خلګ بيا کافر ته دوست او مسلمان ته دښمن وايي.
6 - د پخوا د خلګو د دوستۍ او انډيوالۍ معيار اسلام او تقوی وه خو زموږ د زمانې د خلګو د دوستۍ او انډيوالۍ معيار قدرت، پيسې، قوم، وطن، ژبه او واسطه ده.
7 - د پخوا خلګو به پر مسجد، مدرسې او ديني علم باندي تر بل هر شي ډېر مصرف کوی خو زموږ د زمانې خلګ بيا پر مسجد، مدرسې او ديني علم باندي تر بل هر شي لږ مصرف کوي..
8 - د پخوا خلګو به د ځانونو لپاره علماء او پوهان خلګ مشران ټاکل خو زموږ د زمانې ځيني خلګ بيا د ځانونو لپاره ناپوهان او ددين څخه ناخبره خلګ مشران ټاکي.
او داسي نور........
عون بن عَبْد الله ان من كان قبلكم كانوا يجعلون للدنيا ما فضل عن آخرتهم وانكم اليوم تجعلون لآخرتكم ما فضل عن دنياكم.[حلية الأولياء]
مولوي نورالحق مظهري

د حوت ۲۴ په مناسبت:

د تاريخ په اوږدو کي د اهل حق او اهل باطل تر مينځ خوار لويي خونړۍ شخړي او جګړې را مينځته سويدي دا ځکه چي اهل باطل کله ميدان ته را ووځي او د اهل حق په وړاندي د درېدلو اراده وکړي اهل حق بې تفاوته نسي پاته کېدلای او پر ځان باندي د اهل باطل حاکميت نسي زغملای له همدې امله کله چي کمونيستانو د نورمحمد ترکي په رهبرۍ پر سردارمحمد داود کودتا وکړه او په هيواد کي يې کمونيستي کفري نظام حاکم کړ د نورو سيمو غوندي د هرات ولايت مسلمان او مجاهد ساتونکي ولس هم پاڅون وکړ او د حوت په ۲۴ – ۲۵ – ۲۶ ورځو کي يې د کمونيستانو سره په کولنګ، بېلچې او لرګيو په ايماني جذبه خورا کلکه جګړه وکړه او د هراتيانو ايماني قوت او قرآني ولوله يې نړيوالو ته په ننداره کښېښودله، د هماغه پاڅون نتيجه وه چي د هيواد په ټولو برخو کي د منحوس کمونيستي نظام پر ضد افغانان را وپارېدل او کمونيستي نظام يې د اشغالګرو روسانو سره پړمخي نسکور کړ.
په ياد پاڅون کي چي درې ورځي يې دوام وکړ تقريبا پنځه ويشت زره افغانان په شهادت ورسېدل خو مقابل لوري يعني کمونيستانو ته هم خورا ډېر ځاني او مالي زيانونه واووښتل.
ياد پاڅون د کمونيستانو بربريت او مسلمانو افغانانو ايماني قوت په اثبات ورسوی او دا يې په ډاګه کړه چي افغانان بېله اسلامي نظامه بل هيڅ نظام نسي منلای او د هيڅ ظالم په وړاندي بې تفاوته نسي پاته کېدلای.
له بده مرغه چي د روسانو د وتلو وروسته د شهيدانو آرمانونه پوره نسوه بلکي د هغه وخت رهبرانو په خپل مينځ کي د جګړو په پيلولو هيواد د بل ناوړين خيټي ته ور واچوی خو الله تعالی نه خوښتل د شهيدانو ويني د تل لپاره هدر او بې فايدې پريږدي ځکه يې نو د څو لسيزو وروسته پر هيواد اسلامي نظام اسلامي امارت حاکم کړ او د زرګونو شهيدانو آرمانه يې پوره کړه.
يا الله همدا اسلامي نظام راته سمبال او تل پاتي ولره!
مولوي نورالحق مظهري

په اسلامي نظام کي مجاهده وروره!

ليکنه: مولوي نورالحق مظهري.

د اقتدار او مسئوليت وروسته د درو شيانو سره ډېر پام کوه:

۱ - د چوکۍ او قدرت سره؛ پام چي د چوکۍ او قدرت په فتنه کي واقع نسې او د غرور، تکبر او غفلت په سبب خيانت درڅخه ونسي!

چوکې خپله يو ډول نشه او باد لري چي ډېری خلګ يې نسي زغملای ځکه نو پر چوکۍ باندي د کښېناستلو وروسته يې اخلاق تغيير کوي، د ملګرو، دوستانو او عامو خلګو سره يې په چلند کي بدلون راځي چي په نتيجه کي د خيانت او درغلۍ ښکار سي.

د مسئوليت اخيستلو وروسته بايد ستا ټوله پام د الله تعالی په رضايت او د خلګو په خدمت کي وي، رسول الله صلی الله عليه وسلم فرمايي: مَا مِنْ أَمِيرٍ يَلِى أَمْرَ الْمُسْلِمِينَ ثُمَّ لاَ يَجْهَدُ لَهُمْ وَيَنْصَحُ إِلاَّ لَمْ يَدْخُلْ مَعَهُمُ الْجَنَّةَ.[صحيح مسلم۴۸۴۶]

ژباړه: نه دی يو امير چي د مسلمانانو د کار مشر سي بيا د دوی لپاره کوښښ او نصيحت نه کوي مګر دا چي د دوی سره به جنت ته نه داخليږي.

يعني هر څوک چي په يوه چاره کي د مسلمانانو امير سي بيا د دوی لپاره په خدمت کي کوښښ او د اصلاح لپاره يې نصيحت نه کوي دغه امير به د مسلمانانو سره جنت ته داخل نسي يعني مسلمانان به جنت ته داخل سي خو دی به د جنت څخه محروم وي.

په بل حديث کي فرمايي: مَا مِنْ وَالٍ يَلِي رَعِيَّةً مِنَ الْمُسْلِمِينَ فَيَمُوتُ وَهْوَ غَاشٌّ لَهُمْ إِلاَّ حَرَّمَ اللَّهُ عَلَيْهِ الْجَنَّةَ.[صحيح البخاري ۷۱۵۱]

ژباړه: نه دی يو مشر چي د مسلمانانو د يوې ټولۍ مشرتوب ورته وسپارل سي نو دی په داسي حالت کي مړ کيږي چي د هغوی سره يې خيانت کړی وي مګر دا چي الله تعالی به پر ده باندي جنت حرام کړي.

وروره! د اقتدار لپاره هيڅ وخت خپلو اخلاقو ته تغيير مه ورکوه ځکه ديني اخلاق ستا دوامداره پاليسي ده او اقتدار لنډمهالي نشه او د مسلمان لپاره د خدمت کولو يوه وړوکې کړکۍ ده، ديني اخلاق د نورو انسانانو سره د تعامل ثابت چوکاټ دی خو چوکۍ لنډمهالي صلاحيتونه او د رعيت لپاره ستړيا ده او ديني اخلاق ستا شخصيت دی خو چوکۍ لنډمهالي مسئوليت دی.

۲ – د مال او پيسو سره ډېر اختياط کوه؛ ممکن په مسئوليت کي تا ته د پيسو د ساتني او توزيع صلاحيتونه درکړل سي چي ته يې بايد خطر ته ډېر متوجه وسې تر څو خدای مکړه د مال او پيسو په فتنه کي واقع نسې.

رسول الله صلي الله عليه وسلم فرمايي: فَوَاللَّهِ مَا الْفَقْرَ أَخَافُ عَلَيْكُمْ، وَلَكِنْ أَخْشَى عَلَيْكُمْ أَنْ تُبْسَطَ الدُّنْيَا عَلَيْكُمْ كَمَا بُسِطَتْ عَلَى مَنْ كَانَ قَبْلَكُمْ، فَتَنَافَسُوا فِيهَا كَمَا تَنَافَسُوهَا وَتُهْلِكَكُمْ كَمَا أَهْلَكَتْهُمْ.[المعجم الکبيرللطبراني ۱۳۵۱۸] ژباړه: زما دي په الله قسم وي چي زه پر تاسي باندي د فقر څخه نه وېرېږم بلکي زه پر تاسي باندي د دنيا د پراخۍ څخه وېرېږم لکه پر هغه امتونو باندي چي پراخه سوه چي ستاسو مخکي تېر سوي دي نو تاسي به داسي شوق پکښې وکړی لکه هغوی چي کړی وو او تاسي به داسي هلاک کړي لکه هغوی چي يې هلاک کړيوه.

او په حجة الوداع خطبې کي رسول الله صلي الله عليه وسلم وفرمايل: فاتقوا الدنيا. ددنيا څخه ځانونه وساتئ.

تل په الله جل جلاله باندي پناه وغواړه چي د مال د فتنې څخه دي وساتي او د پيسو په عيش او عشرت کي راګير نسې.

۳ – د ښځو سره ډېر احتياط وکړه؛ ممکن په مسئوليت کي د ښځو سره مخامخ سې يا دي د کار په ساحه کي ښځي راسي نو کوښښ وکړه چي د ښځو د مکر، فريب او جاذبې څخه ځان وساتې تر څو ددوی په فتنه کي واقع نسې.

رسول الله صلی الله عليه وسلم فرمايي: مَا تَرَكْتُ بَعْدِي فِتْنَةً أَضَرَّ عَلَى الرِّجَالِ مِنَ النِّسَاءِ.[صحيح البخاري ۵۰۹۶] ژباړه: ما د ځان وروسته داسي ازمايښت ندی پرې ايښی چي د نارينه وو لپاره دي ډېر تاواني وي تر ازمايښت د ښځو. 

همداسي په حجة الوداع کي رسول الله صلی الله عليه وسلم وفرمايل: واتقوالنساء فإن اول فتنة بني اسرائيل کانت في النساء. يعني ځانونه د ښځو د فتنې څخه وساتئ، په بني اسرائيلو کي لومړی فتنه د ښځو وه.

د ښځو فتنه داسي لويه او خطرناکه ده چي په تاريخ کي يې ډېر غټ غټ خلګ او لوی علماء ښکار سويدي ځکه نو بايد د ډېر عمق څخه په دقت ورته وکتل سي او په لوی الله باندي ددوی د فتنې څخه پناه وغوښتل سي.

دا هم په ياد ولره چي ځيني وختونه د اسلام دښمنان د مال او ښځو څخه په استفاده غواړي اسلامي نظام او په اسلامي نظام کي پاک خلګ بدنام کړي چي ددې لپاره په تاريخ کي ډېري بېلګي او نمونې شتون لري ځکه نو بايد موږ په هر ځای او هر ګړی ورته هوښيار او زيرک وسو.

هغه کسانو ته چي په دين کي ډلي ټپلي جوړوي:

ژباړه: د عمر بن خطاب رضي الله عنه څخه روايت دی چي رسول الله صلی الله عليه وسلم عائشې رضي الله عنها ته وويل: ای عائشې! کومو کسانو چي خپل دين پرېښود او ډلي ډلي سوه هغوی د بدعت، نفسي غوښتنو او د دې ملت د ګمراهۍ خاوندان دي؛ ای عائشې د هر ګناهکار لپاره توبه سته بېله نفسي غوښتونکو او بدعتيانو څخه د دوی لپاره توبه نسته، زه د دوی څخه بېزاره يم او دوی زما څخه بېزاره دي.
په دې خاطر چي اسلام ټوله يو دين او يو کور دی او مسلمانان بايد هميشه ټول سره په اتفاق او اتحاد وي رسول الله صلی الله عليه وسلم هغه کسان چي د نفسي غوښتنو او بدعتونو پر اساس په دين کي ډلي او فرقې جوړوي د دين پرېښودونکي بللي، هغوی يې د نفسي غوښتنو تابع، بدعتيان او ګمراهان بللي او د دوی څخه يې د ځان د بېزارۍ تر څنګ د دوی لپاره سخت عذاب هم بيان کړی دی چي د دوی توبه نه قبليږي.
الحمدلله چي اوس زموږ ملت د يوه دين او يوه مذهب په چوکاټ کي پر يوه امير باندي سره راټول دی کوم کسان چي د دې ملت څخه ځان جلا کوي او د نفسي غوښتنو او سياسي انحراف پر اساس ډلي ټپلي جوړوي هغوی د دې حديث مصداق دي او الله تعالی به ډېر سخت عذاب ورکوي.
عَنْ عُمَرَ بْنِ الْخَطَّابِ رَضِيَ اللَّهُ عَنْهُ أَنَّ رَسُولَ اللَّهِ صلى الله عليه وسلم قَالَ لِعَائِشَةَ يَا عَائِشَةُ إِنَّ الَّذِينَ فَارَقُوا دِينَهُمْ وَكَانُوا شِيَعًا إِنَّهُمْ أَصْحَابُ الْبِدْعَةِ وَالأَهْوَاءِ وَأَصْحَابُ الضَّلالَةِ مِنْ هَذِهِ الأُمَّةِ يَا عَائِشَةُ إِنَّ لِكُلِّ صَاحِبِ ذَنْبٍ تَوْبَةً غَيْرَ أَصْحَابِ الأَهْوَاءِ وَالْبِدَعِ لَيْسَ لَهُمْ تَوْبَةٌ أَنَا مِنْهُمْ بَرِيءٌ وَهُمْ مِنِّي بُرَآءُ.[السنة لإبن أبي عاصم 4]
مولوي نورالحق مظهري

امام ابوحنيفه رحمه الله او ځيني مخالفين يې:

ژباړه: د فضل بن موسی السيناني څخه پوښتنه وسوه: ته د هغو کسانو په اړه څه وايې چي په امام ابوحنيفه رحمه الله پسې خبري کوي؟ هغه ورته وويل: امام ابوحنيفه رحمه الله دوی ته داسي علم راوړ چي دوی په پوهيږي او نه په پوهيږي او دوی ته يې هيڅ شی پرې نه ښودل نو ځکه دوی حسد ورسره وکړ.
يعني امام ابوحنيفه رحمه الله دومره علم حاصل کړ چي په ځيني علم يې دوی پوهيږي خو په ځيني نور بيا نه پوهيږي نو ځکه دوی پر همدغه علم حسد ورسره کوي او بدي خبري پسې وايي.
له بده مرغه په هره زمانه کي ښه علماء د امام ابوحنيفه رحمه الله غوندي محسود وي او ځيني نور کسان پر علم حسد ورسره کوي.
دا ډېر ناوړه عادت دی او یو ډول د الله تعالی پر تقسيم باندي نیوکه ده، موږ هر یو باید د داسي کړني څخه ځان وساتو.
فقد سئل الفضل بن موسى السيناني: ما تقول في هؤلاء الذين يقعون في أبي حنيفة؟ قال: إن ابا حنيفة جاءهم بما يعقلونه وبما لا يعقلونه من العلم، ولم يترك لهم شيئا فحسدوه.[الطبقات السنية في تراجم الحنفية]
مولوي نورالحق مظهري

څومره ښه خبره یې کړې ده!

ژباړه: له ځانه سره مي پدې خاطر مينه زیاته کړېده چي له هر بې کاره انسان څخه کرکه لرم.
دا د انسان د ښه توب نښه ده چي کله یې د بې کاره او بدو انسانانو څخه کرکه وسي ځکه که دی هم بد انسان وای نو هیڅ وخت يې له بدو انسانانو کرکه نه کېدل ولي چي هر انسان د ځان غوندي انسانانو ته تمايل لري.
د پورته خبري څخه په استنباط داسي ويلای سو چي د ښو خلګو څخه کرکه د انسان د بدۍ او فساد نښه ده ځکه د ښو خلګو څخه بد وړل د انسان پر بدوالي باندي لوی دليل دی.
لقد زادني حبا لنفسي أنني * بغيض إلى كل امرئ غير طائل.[دیوان الحماسه للتبریزی]
مولوي نورالحق مظهري

رسول الله صلی الله عليه وسلم څو ځلي خپل سر خريلی دی؟

کوم شی چي د سيرت په کتابونو کي راځي: رسول الله صلی الله څلور ځلي خپل سر خريلی او يا يې هم د هجرت په مده کي درې ځله خپل سر خريلی دی.
په جمع الوسائل کتاب کي راځي: رسول الله صلی الله عليه وسلم په  د هجرت په کلونو کي د حديبيې په کال، په کال کي د عمرې د قضاء او په کال کي د حجة الوداع سر خريلی دی؛ يعني درې ځله يې خريلی.
او په سبل الرشاد کتاب کي د زاد المعاد په حواله راځي: رسول الله صلی الله عليه وسلم خپل مبارک سر ګرسره څلور ځلي خريلی دی.
فَإِنَّهُ صَلَّى اللَّهُ عَلَيْهِ وَسَلَّمَ لَمْ يَحْلِقْ رَأْسَهُ فِي سِنِي الْهِجْرَةِ إِلَّا عَامَ الْحُدَيْبِيَةِ ثُمَّ عَامَ هِجْرَةِ الْقَضَاءِ ثُمَّ عَامَ حَجَّةِ الْوَدَاعِ .[جمع الوسائل في شرح الشمائل]
قال ابن القيم رحمه الله تعالى في زاد المعاد: لم يحلق صلى الله عليه وسلم رأسه الشريف إلا أربع مرات. [سبل الهدى والرشاد، في سيرة خير العباد، ج 2 ص 18]

مولوي نورالحق مظهري