کله چي دی زما په خبره او فتوی خبر سو د خښم څخه پورته سو او کښه سو او ويې ويل: آيا زه به پر علماؤ خپلي خبري تېروم! آيا دی زما خبره باطله بولي! زه تر ټولو خلګو په احاديثو ښه خبر يم. او داسي نوري اوتي بوتي يې وويلې.
وروسته يې عوام خلګ زما پر ضد را وپارول، خلګو زما سره ډېره لويه شخړه وکړه، پر ما يې ډېر بد وويل او زه يې په وژلو او وهلو باندي و ګواښلم.
کله چي زه دده په غبرګون خبر سوم نور مي هم دده په اړه خلګو ته جواب ورکړ او ډېري نوري خبري مي وکړې او کله چي دغه سړي د باطلو احاديثو روايت ته دوام ورکړ او پر رسول الله صلی الله عليه وسلم يې پر درواغ ويلو اصرار وکړ ما يې پر ضد بله فتوی ورکړه چي دغه سړی بايد د مسلمان حاکم لخوا په درو باندي ووهل سي.
کله چي دا سړی زما په نوي فتوی خبر سو نور يې هم زما په نسبت سختي ډېره سوه او په خلګو کي يې زما په اړه ډېره لويه کرکه را وپارول چي په نتيجه کي خلګو زما په پر ضد ډېر لوی شور جوړ کړ چي په همدغه مسئله کي ما کتاب تصنيف کړ چي نوم يې دی " تحذير الخواص من أکاذيب القصاص" یعني د قيصه کوونکو د درواغو څخه د خواصو خبرداری.
[تحذير الخواص من أکاذيب القصاص ص۱]
درس: دلته امام سيوطي رحمه الله د رسول الله صلی الله عليه وسلم څخه په دفاع کي او د شريعت په ساتنه کي نه د چا څخه وېرېدلی او نه يې هم د چا مراعات کړی آن تر دې چي د خلګو خبري او ګواښونه يې هم ګاللي خو د باطل په وړاندي يې سر نه دی ټيټ کړی تر داسي اندازې چي په دې موضوع کي يې مستقل کتاب تصنيف کړی.
مولوي نورالحق مظهري
هیچ نظری موجود نیست:
ارسال یک نظر