د حجاب اړوند د شبهاتو جوابونه:(دويمه شبهه)

ژباړه او تحقيق: مولوي نورالحق مظهري

د شرعي حجاب مخالفین وايي: حجاب د عربو د جاهليت د زمانې د عاداتو څخه يو عادت دی ځكه چي په عربوكي حمايت د شرف او په حياء کي غلو ډېره وه له همدې امله به يې خپلي لوڼي د پيغور له وجهي ژوندۍ په خاورو كي پټولې نو يې د خپل پخواني تعصب او عار له مخي پر ښځو حجاب حتمي کړ او دا معلومه خبره ده چي اسلام د عربو ټول باطل رسمونه ناروا ګڼلي او بند کړي يې دي ځکه نو حجاب شاته تګ او تر نورو ټولنو شاته پاته کېدل دي.

ځواب: لومړی خو دا خبره غلطه ده چي اسلامي حجاب دي د جاهليت د وخت په عربو پوري وتړل سي ځكه چي هغوی د اسلام مخكي حجاب نه پې‍ژندی، ‌په دې خاطر دی چي الله پاك مسلمانانو ښځو ته د دې خطاب كوي چي تاسي په خپلو كورونو كي كښېنئ او د جاهليت د وخت تبرج او بې حجابي مكوئ.وَقَرْنَ فِى بُيُوتِكُنَّ وَلاَ تَبَرَّجْنَ تَبَرُّجَ الْجَـاهِلِيَّةِ الأولَى.( )

لكه چي د هغو ډېرو احاديث څخه چي په بد ګڼلو كي د تغيير لخلق الله راغلي دي له ورايه ښكاري چي د ورېښتيانو نښلول او كښل د اسلام مخكي په يهودي ښځو كي وو او دا هم مشهوره خبره ده چي بې حجابو ښځو به دغه كارونه كول خو د اسلام د راتګ سره  ورباندي بنديز ولګول سو؛ نو بې حجابي هم همداسي په دوی كي ناوړه عادت وو چي د اسلام په راتګ سره ورباندي بنديز ولګول سو.

دا صحيح خبره ده چي اسلام د عربو هغه بد او ناوړه عادتونه او اصطلاګاني باطلي كړي دي خو سره ددې يې د دوی هغه كارونه پر خپل ځای باندي پرېښودل چي ښه كارونه وه لكه:مېلمه پالنه، شجاعت، سخاوت او داسي نور....

او د دوی د ناوړه عادتونو څخه يو عادت دغه وو چي ښځي به په زينت كي، لڅ مخ، لڅه غاړه او لڅي ووږې (لكه اوس په بهرني هيوادونوكي) د كور څخه بهر وتلې نو الله پاك پر ښځه باندي حجاب فرض كړ تر څو ښځي ته لوړه مرتبه وركړي، د دې د عزت او كرامت ساتنه وكړي ‌او د دې څخه د فاسقانو او مغرضو انسانانو آزار بند كړي.

دويمه خبره دا ده چي كله مسلماني ښځي په خپلو هغه كالو باندي خوشالي وي چي اغوستل يې دوی د متخلفينو او شاتګپالو په ټولنه كي نه داخلوي نو د دې كار ضرر هغه خلګو ته څه شی دی چي په دې كار(يعني تخلف او شاتګپالني كي) مخ ته تللي دي؟ همدا راز چي كله مسلمانه ښځه خپل حجاب اغوندي او هيڅ ورڅخه په تنګه كيږي هم نه نو بيا د څه لپاره دغه خلګ په يوې شخصي او فردي قضيې كي دومره سره را ټول سويدي؟. 

د تعجب وړ خبره خو دا ده چي موږ يې اورو دغه خلګ چي شخصي حريت او آزادۍ ته نور خلګ را بولي او د هغه ستاينه كوي او هيچاته ددې اجازه نه وركوي چي د دوی ښځو ته دي څوك لاس وروړي خو خپله په نورو باندي د خپلي خوښي د لباس په اغوستلو د نورو خلګو په حريت كي مداخله كوي؟

نو اصلي خبره همدا ده چي دوی په مسلمانانو كي د فحشاء او بې حيايۍ د ډېرولو لپاره داسي پلانونه پر مخ باندي بيايي، كنه نو مسلماني ښځي نه تنها دا چي د خپل حجاب سره په عذاب ندي بلكي په ډېر شوق او لېوالتيا سره خپلي اسلامي جامې په تن كوي؛ ښځه چي مسلمانه وي هيڅ كله په داسي لباس باندي نه خوشاله كيږي چي په هغه كي دي ددې ستر نه وي موجود.

دا چي مسلمانه ښځه د خپل حجاب سره څومره ډېره مينه لري ‌دوی ته هم معلوميږي‌ خو په دې خاطر چي دوی دلته خپل اهداف لري نو د خپلو ناوړو كړنو لپاره داسي رنګ وركوي چي ګويا مسلمانه ښځه په خپل حجاب باندي نده خوشاله كنه نو چي دا اوس په اسلامي هيوادونو كي د حجاب په مسئله كي ټول پوښتنه وسي زه په دې باندي پوره باور لرم، چي 90 % په سلوكي مسلماني ښځي به د حجاب پلوي وكړي. 

له همدې كبله موږ وينو چي دغه فحاشان ددې لپاره چي مسلماني ښځي د بې حجابۍ سره آموخته او عادي كړي په پيسو باندي ځيني فاسدي او بدلمني ښځي په بازارونو كي په بې حجابۍ باندي را باسي‌ تر څو نوري ښځي يې وويني او د دوی څخه په متأثره كېدلو مسلماناني ښځي هم خپل حجاب ناديده ونيسي او لڅي وګرځي. 

تاسو ونه ليدل چي په همدغه زموږ اسلامي هيواد كي په بازارونوكي يې ښځي د مدني حركت په پلمه نيمه لڅي را ونه ايستلې؟ د حجاب د بدنامولو لپاره يي د نارينه وو پر سرو باندي بوغرۍ ورنكړې؟ په دې نامه  چي موږ د ښځو د حقوقو څخه دفاع كوو او پر ښځو باندي كورنی تشنج ختموو. 

خو اصلي خبره دا ده چي دغه كارونه ټوله دوی د همدې لپاره كوي چي زموږ د مسلمانو خويندو او ميندو د عزت او پت پړوني د دوی د سرونو څخه وغورځوي او مسلمانه ښځه هم د غربي اوكفري لنډغرو غوندي د نارينه وو د بازيو او سات تېريو  يوه آله جوړه كړي او بس.

لكه په رسنيزو چارو كي چي موږ د فحشاء او بې بندوبارۍ شاهدان يو ‌د باوري خلګو په وينا چي د حجاب او مسلمانو ښځو دښمنان د مسلمانو ښځو د بې حياء كولو لپاره د همدغه شيطاني چم او فريب څخه كار اخلي څو دانې ښځي يې پيدا كړيوي چي د دوی سره په ژونديو خپرونوكي اړيكي ونيسي، په ټلفن كي ورسره ټوكي ټكالي وكړي،‌ زمزې وړاندي كړي او ډول ډول بانډارونه وكړي ‌تر څو چي نوري مسلماناني ښځي يې واوري بيا ور څخه متأثري سي او د دوی غوندي كارونه وكړي. 

آن تر دې چي دغه د دوی ښځي ځي د نورو ښځو سره ويني هغوی دېته تشويقوي تر څو د راډيو سره اړيكه ونيسي او د نارينه وو سره د دوی په اصطلاح د زړه خواله وكړي، كنه نو زموږ مسلماني خويندي دومره د حياء او شرم څخه ډكي دي چي چاته د دروازې ترشا جواب نه وايي، د بيګانه خلګو سره په موټر كي نه سوريږي خو دغه بدبخته إنسان يې كرار كرار د شيطان په چم او مرسته  د ځان غوندي جوړوي.

راځودريمي خبري ته چي هغه دا وه چي دوی وايي: حجاب او مخ پټول انحطاط او شاته تګ دی او د ترقۍ مخي ته خنډ دی.

دوی ته بايد وويل سي چي پرمختګ او شاته تګ هر يو ځان ته سببونه او لاملونه لري، ‌د شرعي حجاب او اخلاقو دخيل ګڼل پكښې ښكاره او بربنډه تېروتنه ده‌ چي تنها هغه څوك په تېروځي او ورڅخه متأثره كيږي چي عقل او درك يې سم نه وي. 

او بيا كه حقيقت ته وګورو نو له ورايه به راته ښكاره سي چي پر مختګ او شاته تګ كله په لباس او كالو پوري تړاو درلودی چي اوس يې ولري؟  پرمختګ او شاته تګ او بدلون په هغه بحثونو، څېړنو او پلټنو باندي كيږي چي انسان يې په خپل عقل او فكر باندي كوي ‌په كالو او ظاهري بڼي پوري هيڅ كار نه لري.

سالمه عقل هم همداسي حكم كوي ځكه كه موږ د تاريخ په اوږدوكي وګورو په مادي لحاظ پرمختللي خلګ په هري ټولني او هر ډول جامه كي تېر سويدي او بيا اسلام خو په دې اړونده مسایلو كي خپل امتحان وركړی دی د نړۍ په سطحه  په مسلمانانو كي په مختلفو برخوكي پوهان پوهان خلګ پيدا سويدي او اوسنی مادي پرمختګ د هغوی د زحمتونو نتيجه ده.

په تېرو وختونوكي چي اسلامي خلافتونه او حكومتونه برحاله او قوي وه د هري ترقۍ او پرمختګ لپاره پرېمانه كارونه پكښې كېدل او په پوره پيمانه پكښې د وخت او زمان د اړتيا سره سم هر قسم فكري او عملي تكنالوژۍ ته پاملرنه كېدل، اختراعات،  انكشافات، څېړني، عصري او مدرني زده كړي، اقتصادي پرمختګ، دفاعي او ساتنيز منظم پلانونه او د انساني ژوند نور ډېر ضرورتونه په پراخه پيمانه پكښې موجود وه. 

هيڅ داسي بېلګه او نمونه څوك نسي وړاندي كولای چي د هغوی د وخت ترقي په بې حجابۍ كي وه بلكي د دې پر عكس هغوی اسلامي حجاب ته ژمن او پوره متعهد وه، داسي هم څوك نسي ثابتولای چي د اسلامي زبرځواكونو د ړنګېدلو او بيا د مسلمانانو د شاته تګ لامل حجاب وو، بلكي حجاب د اسلامي شعائرو څخه يو شعار دی چي د مسلماني ښځي د عزت، پت، شرافت او حياء د ساتني لپاره، او په ټولنه كي د فحشاء د خپرېدلو د مخنيوي په حكمت د الهي دستور په صفت مسلمان يې په عملي كولو باندي مكلف دی. 

‌د حجاب مراعات كول د هرچا خپله شخصي دنده هم ده چي هر څوك بايد په خپلي كورنۍ كي د حجاب په عملي كولو كي پوره جدي وي‌ او بيا چي هر حكومت ځان ته اسلامي وايي د هغه دغه ايماني او وجداني وظيفه ده چي په مسلمانانو كي په زوره حجاب عملي كړي، ځكه ځيني داسي انسانان تل په ټولنه كي موجود وي چي په مسلمانانو كي قصدا د اسلام شعائر كم رنګه كوي او په هره وسيله چي يې په توان كي وي مسلمانان د بې لارۍ او بې دينۍ لوري ته بيايي.

ترڅو وكولای سي مسلمانان د مستقيم مسير څخه واړوي، اسلامي فرهنګ او كلتور ورڅخه بيګانه كړي، ټولنه او اجتماع يې ور فاسده كړي، او د خپل فكر سره سم د خپلو پلان سوو شومو اهدافو لپاره مسلمانان وكاروي.

خلاصه دا چي د دوی دغه خبره سل په سلوكي بې بنياده ده ‌نه حجاب د عربو د جاهليت له عاداتو څخه دی او نه هم اسلام د دوی ټوله عادات رد كړيدي بلكي هغه عادات يې رد كړيدي چي بد او ناوړه عادات وه او دا خبره خو د حقيقت څخه دومره ليري ده چي د تعبير او مقايسې لپاره يې موږ هيڅه بېلګه نلرو چي اسلام دي حجاب منع كړی وي بلكي اسلام حجاب لا ټينګ كړی او مسلمانه ښځه يې پدې باندي مكلفه كړيده چي حجاب وكړي.

او نه هم د حجاب كول، انحطاط او شاته تګ دی، بلكي د حجاب كول د ښځو لپاره تر هري دنيوي پرمختيا ډېرمهم او اړين دی.

كه سړی دخپل عقل څخه كار واخلي، په ټولنه كي په غور او دقت سره وګوري نو په ډېره آسانه به ورته معلومه سي چي نن ډېری اخلاقي فسادونه د همدغه بې حجابۍ څخه پيدا سويدي په هري ټولني او قوم كي چي د حجاب پوره غم خوړل سوی وي ‌په هغوی كي د اخلاقي فساد كچه هم ډېره كمه وي. 

د 2016 ميلادي كال په كلني راپور كي چي په ټولنيزو شبكوكي د آزادو رسنيو لخوا خپور سوی دی داسي راځي:

د جنسي تېريو کلنی راپور …

• امريکا —————-/–• ۸۹.۲۴۱

• هندوستان ———–/–• ۲۱.۳۹۷

• برطانيه —————/–• ۱۵.۰۸۴

• ميکسيکو ————-/–• ۱۴.۰۷۸

• فرانسه —————-/–• ۱۰.۱۰۸

• جرمني —————-/–• ۷.۷۲۴

• پيرو ——————–/–• ۶.۷۵۱

• سويډن —————-/–• ۵.۹۶۰

• فلپاین ——————/–• ۵.۸۱۳

• روسيه —————–/–• ۴.۹۰۷

دا ټول هغه هيوادونه دي چي د ميرمنو د آزادۍ حقوق پکښې عملي سوي دي؛ دوی د ميرمنو آزادي نه بلکي هغوی ته د ورسېدلو آزادي غواړي داسي آزادي چي ښځه د کورني نظام نه محرومه او بازار ته د سکس سمپل په توګه عرضه کړي.

دا هغه شميرې دي چي د دوی لخوا كشف سوي دي ددې څو برابره هغه قضيې دي چي كشف سوي نه دي همدا راز دا هغه پيښي دي چي په زوره سويدي هغه چي د جانبينو په خوښه كيږي هغه ته خو دوی جنسي تېری نه وايي.

دا يې د ملحدانو بشري حقوق! وايي اسلام ښځو ته حقوق نه ورکوي؛ لعنت دې د خداى وي په داسې فاسدو حقونو...

منبع: المنبر ويب پاڼه

د حسد کوونکي اصل او حقيقت:

آيا پوهېږی چي حسد کوونکی څوک دی، آيا پوهېږی چي حسد څومره بد دی، آيا پوهېږی چي حسد کوونکی د چا ملګری او د چا انډيوال دی، او آيا پوهېږی چي حسد کوونکی د چا سره دښمني کوي؟
د دې لپاره چي حسد او حسد کوونکی ښه وپېژنی او ځانونه د حسد څخه وساتی لاندي څو کرښي ښه په غور ولولئ:
۱ – حسد کوونکی انسان د شيطان د لښکر غړی بلل کيږي ځکه چي لومړی هغه کس چي حسد يې وکړ شيطان وو چي د آدم عليه السلام سره يې حسد وکړ؛ ابن قيم رحمه الله فرمايي: فالحاسد من جند إبليس.[بدائع الفوائد] يعني حسد کوونکی د شيطان د لښکر څخه دی.
همداسي بل ځای وايي: لأن الحاسد شبيه بإبليس وهو في الحقيقة من أتباعه.[بدائع الفوائد] يعني حسد کوونکی د شيطان سره مشابه دی بلکي د هغه د پلويانو څخه دی.
۲ – حسد کوونکی انسان ځان د اهل کتابو سره مشابه کوي چي هغوی د مسلمانانو سره حسد کوی؛ الله تعالی فرمايي: وَدَّ كَثِيرٌ مِنْ أَهْلِ الْكِتَابِ لَوْ يَرُدُّونَكُمْ مِنْ بَعْدِ إِيمَانِكُمْ كُفَّارًا حَسَدًا مِنْ عِنْدِ أَنْفُسِهِمْ مِنْ بَعْدِ مَا تَبَيَّنَ لَهُمُ الْحَقُّ.[ سورة البقرة ۱۰۹]
ژباړه: خوښ لري ډېری د اهل کتابوڅخه دا چي تاسي واړوي (کفر ته) وروسته تر دې چي تاسي ايمان راوړی دی، په خاطر د حسد د دوی (ستاسي سره) وروسته تر دې چي دوی ته حق په وضاحت معلوم سوی دی.
۳ – د حسد کوونکي زړه ناروغ وي او نفس يې په فاسدو افکارو لړلی وي.
۴ – حسد کوونکی تل دښمني او غضب پالي.
۵ – حسد کوونکی تل تکبر کوي.
۶ – حسد کوونکی هيڅ وخت ستا لپاره خير نه غواړي بلکي ستا لپاره غم غواړي او ستا په مصيبت ډېر خوشحاله کيږي؛ الله تعالی د اهل کتابو په اړه فرمايي چي د مسلمانانو سره يې حسد کوی: إِنْ تَمْسَسْكُمْ حَسَنَةٌ تَسُؤْهُمْ وَإِنْ تُصِبْكُمْ سَيِّئَةٌ يَفْرَحُوا بِهَا.[آل عمران ۱۲۰] ژباړه: که تاسي ته نيکي ورسيږي ددوی بد راځي او که تاسي ته بدي ورسيږي نو دوی په خوشحاله کيږي.
۷ – حسد کوونکی تل ستا څخه شکايت کوي
۸ – حسد کوونکی ډېر بخيل وي.
۹ – د حسد کوونکي روح تل نا آرامه وي او زړه يې سکون نلري ځکه دی د نورو انسانانو په نعمتونو غمګين وي.
۱۰ حسد کوونکی د الله تعالی په قضاء نه وي خوشحاله او د الله تعالی پر حکمت نيوکي کوي؛ الله تعالي د يهودو په باره کي فرمايي چي د رسول الله صلی الله عليه وسلم سره يې حسد کوی: أَمْ يَحْسُدُونَ النَّاسَ عَلَى مَا آتَاهُمُ اللَّهُ مِنْ فَضْلِهِ.[النساء۵۴] بلکي دوی د خلګو سره د الله له لوري پر ورکول سوي نعمت حسد کوي.
۱۱ – حسد کوونکی تل د نورو خلګو مخ ته ستا عيبونه بيانوي، په بدو کارونو باندي تا مشهور کوي او ستا پر آبرو او عزت باندي بريد کوي.
۱۲ – حسد کوونکی د دې تر څنګ چي تا په بدو يادوي تا په داسي کارونو متهم کوي چي تا نه وي کړي دا ځکه چي دده زړه تور وي.
۱۳ – حسد کوونکی ستا نيمګړتياوي افشاء کوي تر څو خلګ درباندي وخندوي.
۱۴ – حسد کوونکی ستا په برياليتوب خوابدی کيږي او په ناکامۍ دي خوشحاله کيږي.
۱۵ – حسد کوونکی هيڅ وخت پر تا باندي باور نه کوي بلکي ستا هر کار ته د شک په سترګه ګوري.
۱۶ – حسد کوونکي ستا سره د الله تعالی پر نعمتونو بخالت کوي ځکه نو هيڅ وخت ستا څخه نه خوشحاله کيږي.
۱۷ – حسد کوونکی د نورو انسانانو تېروتني شميري خو خپل تېروتنو ته يې هيڅ پام نه وي.
۱۸ – د حسد کوونکي سره چي هر څومره ښه وکړې نه ورباندي معلوميږي ځکه نو هيڅ ځای ستا ښه يادونه نه کوي.
۱۹ – حسد کوونکی ځان د خلګو مابين ته ور اچوي او د خلګو په مينځ کي نفرت پيدا کوي تر څو خلګ سره وجنګوي او په ټولني کي کرکه پيدا کړي.
۲۰ – حسد کوونکی د مظلوم په لباس کي ظالم دی او د دوست په لباس کي دښمن دی. 
منبع: قصص القرآن الکريم والسنة النبوية.
ژباړه: مولوي نورالحق مظهري

متعصبينو ته د حال په ژبه د مبارزينو پيغام:

که څه هم تاسي په تخاطب نه ارزی ځکه تاسي د هغي ډلي انسانانو څخه ياست چي زړونه يې تعصب او حسد تور کړي وي، انساني بصيرت يې ځان ځانۍ ختم کړی وي، عقلاني ادراک يې نفساني خواهشاتو له مينځه وړی وي او ايماني نورانيت او روحانيت يې د مادياتو او جهالت تاريکيو ضعيف کړی وي خو د دې لپاره چي په خدمت کي د مسلمانو مبارزينو په جديت ښه پوه سی او د خپل تعصب، حسد او بخالت په اور کي نور هم وسوځی لاندي خبري دي درته ډالۍ وي:
۱ ـ تاسي خپل شيطنت کوئ موږ به خپل خدمت کوو.
۲ ـ تاسي خپل د درواغو ډُولونه او سورناګاني ږغوئ موږ به په نورمال ډول په خپل طبيعت مخ ته ځو.
۳ ـ تاسي خپله چاپلوسي او بوټ پاکي کوئ موږ به په هڅکه غاړه د خپل ولس او اسلامي نظام لپاره اصلاحي، فکري او فرهنګي کارونه پر مخ وړو.
۴ ـ تاسي په ټولنيزو رسنيو کي خپل پروپاګنډونه، تبليغات، انځورونه او پرتي نشر کوئ موږ به د خپلو تکړه علماؤ، ليکوالانو، استاذانو او زده کوونکو علمي مقالې او مطالب نشر کوو.
۵ ـ تاسي ځانونه د شيطانانو غوندي په درواغو، غيبتونو، تهمتونو او چغلګريو ستړي کړئ موږ به نه تنها دا چي ځانونه او ټولنه د داسي منفي کړنو څخه ساتو بلکي په وړاندي به يې د انبياؤ، مجاهدينو او داعيانو په څېر علني مبارزه کوو.
۶ ـ تاسي د شيطان، نفس، حربي کافر او داخلي منافق په څېر د ټولني فساد ته لېڅي را ونغاړئ موږ به د الله تعالی په مرسته د توحيد، تقوی، اخلاص او زغم په توره ستاسي تور لاسونه پرې کوو او ناوړه پلانونه به مو په نطفه کي خنثی کوو.
۷ ـ تاسي په ښو خلګو کي نفوذ وکړئ، هغوی دوکه کړئ او د انسي شيطانانو په څېر په هغوی ګناه او تېروتني وکړئ موږ به هغوی ته نېکي مشورې ورکوو او چي کوم شی د ځان لپاره غواړو هغه به د هغوی لپاره هم غواړو او په وړاندي به يې د خپل انساني او ايماني احساس له مخي د نصيحت، خير خواهۍ، ايثار او مهربانۍ پاليسی غوره کوو.
۸ ـ که تاسي د ژوند په هره برخه کي زموږ مشرانو، اسلامي نظام، خلګو، علماؤ او ټولنو ته ستونزي جوړوی موږ به د تېر پېر په شان په حکيمانه ډول ستاسي منفوري او دوه مخي څهرې بربنډي کوو او ټولي موخي به مو د خاورو سره خاوري کوو.
۹ ـ که تاسي زموږ په ټولنه کي مأيوسي، منفي ګرايي، انحرافات، خرافات او ګډوډي خپروی په دې باندي پوه سئ چي داسي به ناکامه کېږی لکه تر اوسه چي ناکامه سوي يی.
۱۰ ـ که تاسي هر څومره د خلګو د عنعناتو، احساساتو او کلچرونو څخه ناوړه استفاده وکړی هيڅ شی مو په لاس نه درځي او خپل ټول ارمانونه به د ځانه سره ګور ته وړی.
۱۱ ـ تاسي حضرت معاويه رضي الله عنه ښه پېژندلي يی چي فرمايي: كُلُّ النَّاسِ أَسْتَطِيعُ أَنْ أُرْضِيَهُ؛ إِلَّا حَاسِدَ نِعْمَةٍ؛ فَإِنَّهُ لَا يُرْضِيهِ إِلَّا زَوَالُهَا.[المجالسة وجواهرالعلم۶۵۷]
ژباړه: ټوله خلګ زه خوشحاله کولای سم مګر هغه څوک چي د نعمت له کبله حسد راسره کوي؛ ځکه هغه بېله دې چي هغه نعمت زوال سي په بل شي باندي نه خوشحاله کيږي.
تاسي نه خوشحاله کېږی ځکه نو موږ ستاسي د خوشحالۍ لپاره هڅي نه کوو بلکي ستاسي د شر څخه د مسلمانانو د ساتلو هڅي او کوښښونه کوو.
۱۲ ـ دا د مبارزينو د ښه توب او کمال نښه ده چي ستاسي غوندي سپک خلګ يې مخالف دي لکه شاعر چي وايي: لقد زادني حبا لنفسي أنني ـ بغيض إلى كل امرئ غير طائل.
ژباړه: یقينا چي د ځانه سره مي په دې خاطر مينه ډېريږي چي هر سپک او بې اعتبار انسان زما سره بغض او زما څخه کرکه کوي.
خير خواهي:
البته تر اوسه لا د توبې دروازه نده تړل سوې هر ګناهکار که د خپلي ګناه څخه په اخلاص توبه وکړي اميد سته چي الله تعالی به يې توبه قبوله کړي.
مولوي نورالحق مظهري

د دين لپاره مبارزه ارومرو يوه ورځ نتيجه ورکوي:

کله چي اسرائیلو پر غزې خپل هوايي او ځمکني ظالمانه بريدونه پیل کړه د اسرائيلو لومړي وزير بنيامین نتنياهو وويل: موږ به د حماس تر ختمېدلو پوري جګړه کوو او په زوره به خپل بنديان د حماس څخه خلاصوو؛ دا کټ مټ هغه خبره وه چي ۲۰۰۱ م کال کي د امريکا د هغه وخت ولس مشر جورج ډبليو بوش وکړه چي موږ د طالبانو سره هيڅ ډول خبري نه کوو بلکي طالبان به ارومرو بېله کوم شرطه اسامه موږ ته سپاري.
د تاريخ په اوږدو کي په نړۍ کي ډېرو لويو متکبرينو داسي خبري کړي دي لکه فرعون چي په خپل وخت کي موسی علیه السلام او دده قوم ته ويل: سنقتل أبنائهم و نستحيي نسآئهم و انا فوقهم قاهرون.[الاعراف۱۲۷] ژباړه موږ به د دوی اولادونو وژنو ښځي به يې ژوندۍ پريږدو او موږ پر دوی غښتلي يو.
خو د الله تعالی تصميم بيا بېل دی او هغه څه کوي چي خوښه يې وي هيڅوک يې مخه نسي نيولای ځکه نو امريکا يې هم ماته کړه او اسرائيل يې هم ماتي ته نژدې کړه او ددوی لومړنۍ سره کرښه يې په ماته کړه چي دا دی د حماس سره پر څلور ورځني اوربند او د بنديانو پر تبادله هوکړي ته ورسېدل.
موږ مسلمانان بايد تل پر خپل خالق الله تعالی باندي باور ولرو او هره کړنه دده د رضا لپاره سر ته ورسوو.
که فکري او فرهنګي مبارزه کوو او که نظامي مبارزه کوو په هري يوې کي بايد خپل نيت يواځي د الله تعالی رضا وګرځوو، استقامت وکړو، د ننګونو په وړاندي زغم ولرو او په هيڅ صورت کي ناهيلي نسو چي یقينا به مو مبارزه يوه ورځ نتيجه ورکوي.
مولوي نورالحق مظهري

د غزې په جګړه کي مسلمانانو ته د یهودو پيغورونه:

پر غزې باندي د يهودانو د بريد نژدې دي چي 50 ورځي پوره سي، په دې پنځوسو ورځو کي اسرائيلي يهودانو ډېري سختي بمبارۍ کړي چي په ترڅ کي يې په لسهاوو زره مسلمانان شهيدان کړي، په لسهاوو زره يې ټپيان کړي، په لکونو مسلمانان يې بې کوره کړي او د غزې ښار يې د خاورو سره خوري کړی؛ په مقابل کي يې د فلسطيني مجاهدينو مقاومت تر دې دمه د الله تعالی په نصرت ډېر ښه روان دی چي تر اوسه يې په سلهاوو اسرائيلي ټانکونه له مينځه وړي او ډېری يهودان يې وژلي دي خو پر اسلامي نړۍ لا هم چوپتيا حاکمه ده!
يواځي په يمن کي حوثيانو او په لبنان کي حزب الله د اسرائيلو لوري ته يو څو توغندي وار کړي دي نوره اسلامي نړۍ لاس تر زني په ننداره ورته ناسته ده.
د ترکيې ولس مشر يو څو لاپي وويشتلې، د ايران حکومت هم يو څو بغاري ووهلې او په ځينو اسلامي هيوادونو کي يو څه لاريونونه وسوه نوره خبره د اسرائيلو او فلسطيني مسلمانانو تر مينځ پرېښودل سوه.
دا چي اسلامي نړۍ د فلسطين په وړاندي کوم مسئوليت لري هر څوک په پوهيږي او د هر اسلامي هيواد نظام او ولس په خبر دی خو خبره د ضعف الايمان، بې غيرتۍ او غفلت ده؛ که ددې وړاندي مسلمانانو دېته ورته پېښو کي د خپلو مسلمانانو وړونو ننګه کړېوای نن به اسرائيلو د امريکا په ملاتړ په غزه کي نسل وژنه او صليبي جګړه نه کولای، که دوې لسيزي مخکي اسلامي نړۍ پر افغانستان او عراق ننګه کړېوای او د امريکا په وړاندي درېدلې وای نن به ټولي کفري نړۍ په داسي جرئت د مظلومو فلسطينيانو پر ضد د غاصبو اسرائيلو مرسته نه کولای، که عربي هيوادونو د امريکا له لوري د اسرائيلو د پلازميني په صفت د بيت المقدس پېژندنه په غيرت رد کړې وای او خپلي مالي او ديپلوماتيکي اړيکي يې د امريکا او اسرائيلو سره پرې کړي وای او که ترکيې، اردن، لبنان او نورو اسلامي هيوادونو هغه وخت د اسرائيلو سفيران د خپلو هيوادونو څخه  شړلي وای نن به اسرائيلو داسي تېره ښکر نه کولای!
څومره چي اسلامي نړۍ بې غيرته کيږي او چي څومره د اسلامي هيوادونو واکمنان د کفارو لپاره د غلامۍ تناوونه خپلي غاړي ته ور اچوي په هماغه کچه کفار جرئت پيدا کوي او پر مسلمانانو خپلو تېريو او بريدونو ته دوام ورکوي.
نن په عموم کي کفارو او بيا په خاصه توګه يهودانو دومره جرئت پيدا کړی دی چي پر ډېرو اسلامي هيوادونو خپل سياست او دبدبه په زوره تپي، د هغوی څخه په زوره تېل او پيسې اخلي او په خپله ګټه يې په زوره مځکه او فضاء په خپل واک کي اخلي چي د دې لپاره ډېري ښکاره بېلګي پر افغانستان او عراق د امريکا بريد وو او اوس پر غزې د اسرائيلو بريد دی؛ پر افغانستان او عراق د بريد لپاره ډېرو په نامه اسلامي هيوادونو خپله مځکه او فضاء د امريکايانو په اختيار کي ورکړه او اوس د فلسطين ډېرو ګاونډيو هيوادونو خپله مځکه او فضاء د امريکا په اخيتار کي ورکړېده ترڅو د دوی له لاري اسرائيلو ته مرسته ورسوي.
د اسلامي هيوادونو د بې غيرتۍ له کبله اسرائيلو دومره جرئت پيدا کړی دی چي نن په ټولنيزو رسنيو کي مسلمانانو ته پېغورونه ورکوي: ځيني يې مسلمانانو ته په خطاب کي وايي: موږ اوس د منځني ختيځ مشران يو او هيڅ داسي څوک نه وينو چي زموږ مخي ته دي ودريږي، ځيني يې عربو مسلمانانو ته په خطاب کي وايي: تاسي څو ميليونه ياست او موږ څو ميليونه يو ستاسي ډېري پيسې او ډېر بشري ځواک چېري دی؟، ځيني يې د غزې د ورانۍ انځورونه نشر کوي او د پوسخنده ورسره ليکي: مسلمانان بريالي دي، ځيني يې په غزه کي د منسوخ تورات د وېش او لوستلو ويډيوګاني نشر کوي چي ګويا موږ يهودان داسي بريالي يو او ځيني يې په خپل يهوديت افتخار کوي او حماس ته د داعش، خوارجو او تروريستيانو خطاب کوي.
په هر حال؛ نن اسلامي نړۍ لوی خوځښت او انقلاب ته اړتيا لري تر څو په ټولو اسلامي هيوادونو کي د افغانستان غوندي اسلامي نظام حاکم سي او مسلمانان خپل پخواني زور او برم ته بيرته را وګرځي کنه نو دغه بې غيرته ولس مشران، لومړي وزيران او باچاهان به مسلمانان نور هم د هلاکت او بربادۍ کندي ته ور ټېل وهي او د ځانونو غوندي اسلامي امت به ټوله د کفري نړۍ په غلامۍ کي را حصار کړي.
دا چي د هر اسلامي هيواد حکومت د هماغه هيواد د خلګو څخه جوړ دی ځکه نو د هر اسلامي هيواد خلګ په خپل هيواد کي د اسلامي نظام د پلي کولو مسئوليت لري او دا د هر مسلمان دنده ده چي لومړی په خپل هيواد کي په هر ډول چي کيږي اسلامي نظام حاکم کړي وروسته بيا په نړۍ کي د مسلمانانو تر مينځ يووالي او اتفاق ته کار وکړي.
که مسلمانان پر اسلام او اسلامي نظام سره راټول نسي او په خپلو هيوادونو کي سيکولاريزم او عياشۍ ته د پای ټکي کښې نږدي دا وخت يې نښه چي الله مکړه تر دې به لا د سخت او ستونزمن حالت سره مخامخ کيږي.
مولوي نورالحق مظهري

د حجاب په اړه د شبهاتو جوابونه:(لومړی شبهه)

ژباړه او تحقيق: مولوي نورالحق مظهري.

منبع: المنبر ويب پاڼه.

ځيني هغه مستشرقين چي بې حجابۍ او د ښځو مخ لڅوني ته دعوت ورکوي او هغه خلګ چي په عامو ځايونوکي په لڅ مخ او مزينوکالو باندي د ښځو د حضور غوښتونکي دي وايي :حجاب سختي ده خو دين آساني ده؛ د دوی هدف دا دی چي اسلام خو آسانه دين دی خو حجاب پر ښځو باندي سخت تماميږي، همدا راز د ښځي لپاره په حجاب باندي ګرځېدل زموږ په زمانه کي ډېرمشکل کار دی نو مصلحت دا دی چي ښځه بايد حجاب ونکړي.

جواب: ديني تعليمات او شرعي مكلفيتونه ټوله آسانه دي هيڅه سختي پكښې نسته؛ الله تعالی فرمايي: يُرِيدُ اللَّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ.[ البقرة:185]

ژباړه: الله پاک ستاسو لپاره د آسانۍ اراده لري نه د سختۍ.

همدا راز الله جل جلاله فرمايي:

وَمَا جَعَلَ عَلَيْكمْ فِى الدّينِ مِنْ حَرَجٍ.[ الحج:78]

ژباړه: الله پاک ستاسو په دين کي هيڅ قسم سختي پر تاسو نده ايښې.

 همدا راز الله جل جلاله فرمايي:

لاَ تُكَلَّفُ نَفْسٌ إِلاَّ وُسْعَهَا.[ البقرة:232]

ژباړه: هيڅ نفس دده تر توان لوړ نه مکلف کيږي.

دغه ټوله آيتونه په دې باندي تصريح كوي چي په شرعي احكامو او مسائلو كي آسانۍ او تخفيف ته حتمي اوضروري پاملرنه سوېده.

حضرت ابوهريرة رضي الله عنه د رسول الله صلی الله عليه وسلم څخه روايت كوي چي هغه وفرمايل:إن هذا الدين يسر، ولن يشاد الدين أحد إلا غلبه، فسدّدوا وقاربوا وأبشروا.[ صحيح البخاري 39]

ژباړه: يقينا چي دغه دين آساني ده هيچا پر ځان سخت ندی نيولی مګر دا چي دين ورباندي غالبه سوی دی نو ميانه روي وکړئ، ځانونه دين ته نژدې کړئ(يعني چي کوم کار پوره نسی کولای بيا هغه ته نژدې يې وکړئ) او زيری ورکړئ(يعني څوك چي عمل يې لږ وي خو دوامداره وي هغه ته زيری وركړئ ترڅو نا اميده نسي).

ابوموسی اشعري رضي الله عنه فرمايي: رسول الله صلی الله عليه وسلم چي به كله د ځينو كارونو لپاره صحابه يو ځای ته لېږل نو به يې ورته وفرمايل:بشروا ولا تنفروا، ويسروا ولا تعسروا.[ صحيح مسلم4622]

ژباړه: خلګو ته زيری ورکړئ او مه يې متنفر کوئ او آساني وکړی سختي مکوئ.

نو شارع چي الله پاك دی هيڅ كله  د مكلفينو د ځورولو اراده نه كوي او نه هم دوی په هغه شي باندي مكلف كوي كوم چي دوی يې طاقت او توان ونلري. 

نو بناءً هر هغه شی چي د الله پاك لخوا پر بندګانو باندي د تكليف په صفت وضع سوی وي هغه ارو مرو د دوی په قدرت او طاقت كي راځي.

حجاب د مصلحت خلاف نه دی:

راځو دې خبري ته چي دوی وايي په حجاب كي اوس مصلحت نسته نو بايد حجاب ونكړل سي.

موږ بايد په دې خبره باندي خپل سر خلاص كړو چي كله موږ مسلمانان د مصلحت نوم اخلو نو هدف مو ورڅخه شرعي مصلحت دی نه هغه چي نور بيګانه خلګ ورته په خپل فكر مصلحت وايي، او د شرعي مصلحت لپاره لاندي قوانين او ضوابط سته چي بايد مراعات كړل سي.

أ – مصلحت بايد په شرعي مقاصدو كي داخل وي ‌چي هغه ددين، نفس، عقل، نسل او مال ساتنه ده، هر هغه شی چي د دغو پنځو شيانو ساتنه كوي هغه ته شرعا مصلحت ويل كېدلای سي او هر هغه شی چي د دغه پنځو شيانو او يا د ځينو ساتنه نسي كولای هغه مصلحت نه بلكي فساد دی؛ او دا معلومه خبره ده چي حجاب هغه شی دی چي دغه پنځه واړه په پوره توګه ساتي او بې حجابي دغه پنځه واړه له مينځه وړي.

ب – مصلحت بايد د صحيح نقل سره په ټكرکي نه وي؛ نو بايد د قرآن او حديث سره په ټكر كي نه وي ځكه چي د شرعي مقاصدو پېژندل هغه وخت پوره كېدلای سي او د منلو وړ وي چي استناد او حواله يې شرعي تفصيلي دلائلو او احكامو ته وسي، او دلائل هغه وخت د اعتبار وړ وي چي د قرآن او سنت څخه اخيستل سوي وي.

مصلحت چي كله د قرآن او سنت سره په ټكر كي وي نو د دې څخه داسي لازميږي چي مدعٰي دي د دليل  سره په ټكر كي وي او دا باطله خبره ده. 

همدا راز مصلحت چي كله د قرآن او سنت سره په ټكر كي وي هغه ته ناوړه او فاسده رأيه ويل كيږي، او فاسده رأيه هيڅ قابل د قبول نده.

ج – همدا راز مصلحت بايد د اجماع سره د امت او شرعي قياس سره په ټكر كي نه وي كه په ټكر كي وي هغه ته مصلحت نسي ويل كېدلای او بايد مصلحت حساب نكړل سي.

د – مصلحت بايد داسي وي چي په هغه باندي تر ده  لوی او غټ مصلحت له مينځه ولاړ نسي كه ولاړ سي نو بيا هغه مصلحت ته هيڅ اعتبار نسته.

که موږ  د حجاب ليري کېدل مصلحت وبولو نو هغه داسي مصلحت دی چي د پورته اصولو سره په ټکر کي دی او چي د پورته اصولو سره په ټکر کي وي هغه نه مصلحت دی او نه هم ورته مصلحت ويل کېدلای سي.

او دا قاعده چي "المشقّة تجلب التيسير" يعني سختي د آسانۍ تقاضا كوي، معنا يې دا ده چي د مكلف لپاره هغه مشقت او سختي چي ځيني اوقات يې په تنفيذ كي د شرعي احكامو ويني په يوه نه بله طريقه د تخفيف او آسانۍ شرعي سبب كېدلای سي.

خو د دې قاعدې څخه بايد په داسي طريقه استنباط ونسي چي هغه د قرآن، سنت، اجماع او قياس سره په تناقض كي وي، ‌او يا هم د مصلحت تېر اصول له مينځه پكښې ځي، او يا هم تر هغه لوی مصلحت ورباندي خرابيږي.

ځيني هغه مصلحتونه دي چي په قرآن او سنت كي د هغو حكم صراحتا راغلی دی لكه: عبادات، سوداګاني او عقدونه په دغه قسم مصلحتونو كي الله پاك تنها د عزيمت پر بيانولو باندي اكتفاء نده كړې بلكي د هر حكم سره يې د اسانۍ جنبه او اړخ هم بيان كړی دی.

مثلا لمونځ؛ الله پاك فرض كړی دی د هغه لپاره يې اركان او أحكام هم ايښي دي، خو په بغل كي يې ورسره د آسانۍ احكام هم ايښي دي لكه لمونځ کول په ناسته او يا إشاره سره.

همدا راز د روژې د فرضيت تر څنګ الله پاك اساني او رخصت هم ايښی دی؛ لكه په سفر او ناروغۍ كي يې نه نيول. همدا راز په لمانځه كي الله پاك پاكي د بدن، ځای او كالو فرض كړېده خو تر څنګ يې دا آساني هم ايښې ده چي هر هغه نجاست چي ليري كول يې سخت وي معاف دی.

حجاب هم الله پاك پر ښځي باندي واجب كړی دی نارينه يې هم بېګانه ښځي ته د كتلو څخه منع كړی دی، بيا يې ښځي ته د دې رخصت وركړی دی چي د علاج، شاهدۍ او يا هم د محارمو سره د ملاقات په وخت كي خپل مخ لڅ كړي.

نو په هغي آسانۍ كي چي الله پاك د خپلو احكامو د عزيمت تر څنګ ايښې ده د مصلحتونو د ضوابطو او قوانينو سره يې هيڅ ټكر او ضديت نه راځي.

او دا خبره هم د كولو وړ ده چي هغه تخفيف چي د هغه په باره كي نص راغلی دی پر هغه باندي ډېروالی او زيادت هم نه دی روا؛ مثلا داسي نسي ويل كېدلای چي د جنګ د سختۍ له كبله دي د لښكر څخه د لمانځه كول ساقط سي او يا دي داسي وويل سي چي د اوس په وخت كي د ربا څخه د ځان ساتني د سختۍ له كبله دي هغه روا كړل سي. 

او يا دي هم داسي وويل سي چي په ځينوځاينوكي د حجاب د مراعات كولو د سختۍ له كبله دي ښځي ته بې حجابي روا كړل سي په دې دعوی چي دا خو ټولنيزه اړتيا ده. 

ځکه چي يو خو د اړتيا خبره يې غلطه ده، بل د الله پاك فرمان دی چي فرمايي: 

يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَى أَنْ يُعْرَفْنَ فَلَا يُؤْذَيْنَ وَكَانَ اللَّهُ غَفُورًا رَحِيمًا.[ الاحزاب 59]

ژباړه: ای پیغمبره! خپلو ميرمنو او لوڼو ته او د مسلمانانو ښځو ته ووايه چي خپل پړوني پر ځانونو باندي راتاو کړي دا به دې ته ډېره نژدې وي چي دوی و نه پېژندل سي نو دوی ته آزار نه رسول کيږي او الله تعالی بخښونکی او مهربان ذات دی.