هوښيار انسان او د هغه عيبونه:

ژباړه: د هوښيار انسان څخه د خپل نفس عيب پټ نه پاتې کېږي، ځکه د چا څخه چې د خپل نفس عيب پټ وي د نورو ښېګڼې هم ورڅخه پټې پاتې کېږي او تر ټولو ستره سزا د انسان لپاره دا ده چې خپل عيب ورڅخه پټ وي؛ ځکه څوک چې خپل عيب و نه پېژني هغه خپل عيب نه شي پرېښودلای او څوک چې د خلکو ښېګڼې و نه پېژني هغه به هيڅکله له هغو څخه ګټه پورته نه کړي او د نوي شروع کوونکې لپاره تجربې څومره ګټورې دي!.

د هوښيار انسان څخه د ده عيب ځکه پټ نه پاتې کيږي چې هوښيار انسان په ځان کې د عيبونو ګمان کوي او هيڅ کله ځان ورته جامع الکمالات يا د عيبونو څخه پاک نه ښکاري له همدې هميشه په ځان عيبونه ويني او د خپلو عيبونو د اصلاح لپاره کار کوي؛ د چا څخه چې خپل عيبونه پټ شوه د هغه څخه به ارومرو د نورو خلکو ښېګڼې او نېکۍ پټيږي ځکه هغه ټولې نېکۍ په ځان کې راټولي ويني او پر نورو انسانانو بد ګمانونه کوي له همدې امله ځان ورته معصوم او د کمالاتو څخه ډک ښکاري او نور خلک ورته ګناهکار او نيمګړي ښکاري.

که څوک غواړي خپل عيیونه اصلاح کړي او د نورو انسانانو له ښېګڼو څخه ګټه پورته کړي نو په خپلو عيبونو دې ځان خبر کړي او د نورو انسانانو ښېګڼي دې و ويني او تر دې لا مهمه خبره دا ده چې په ژوند کې د تجربو د لاسته راوړلو لپاره دې د نورو انسانانو د تجربو څخه استفاده وکړي ځکه هوښيار انسان په ژوند کې هيڅ وخت ځان د استفادې څخه بې پروا او مستغني نه ګڼي.

والعاقل لا يخفى عليه عيب نفسه لأن من خفى عليه عيب نفسه خفيت عليه محاسن غيره وإن من أشد العقوبه للمرء أن يخفى عليه عيبه لأنه ليس بمقلع عن عيبه من لم يعرفه وليس بنائل محاسن الناس من لم يعرفها وما أنفع التجارب للمبتدى.[روضة العقلاء:22]
مولوي نورالحق مظهري

هوښيار انسان د هيچا سپکاوی نه کوي:

هوښيار انسان د هيچا سپکاوی نه کوي؛ ځکه چې څوک چې د واکمن سپکاوی وکړي هغه به خپل دنيا خرابه کړي، څوک چې د نېکو انسانانو سپکاوی وکړي هغه به خپل دين خراب کړي، څوک چې د خپلو(ديني) وړونو سپکاوی وکړي هغه به خپل عزت له منځه يوسي او څوک چې د عامو خلکو سپکاوی وکړي هغه به خپل ساتنه له منځه يوسي.

کوښښ وکړئ چې د هيڅ مسلمان سپکاوی بلکې د هيڅ انسان سپکاوی ونکړئ ځکه د مسلمان په اخلاقو او اعمالو کې بايد هيڅ ډول سپکاوی ځای و نه لري؛ سپکاوی نه تنها دا چې اخلاقي نيمګړتيا ده بلکې تاوان يې خپله سپکاوي کوونکې انسان ته رسيږي.

والعاقل لا يستحقر أحدا لأن من أستحقر السلطان أفسد دنياه ومن استحقر الأتقياء أهلك دينه ومن استحقر الإخوان أفنى مروءته ومن استحقر العام أذهب صيانته.[روضة العقلاء – ابن حبان 22]
مولوي نورالحق مظهري
https://t.me/isalamimaqali

سرمايه دارانو ته د مال په خاطر عاجزي مه کوئ:

ژباړه: د ابراهيم بن عبدالله بن مسعود څخه روايت دی چې هغه وفرمايل: څوک چې شتمن او سرمايه دار ته ځان ټيټ کړي(عاجزي وکړي) او د هغه د تعظيم لپاره او په خاطر د طمعي د هغي ګټي چې د شمتن لخوا راځي ځان عاجز کړي نو د عزت دوه درېيمه برخه او نيم د دين به يې له منځه لاړ شي.

يعني څوک چې د مال لاس ته راوړلو يا ګټي حاصلولو لپاره د شتمن انسان تعظيم کوي او ځان يې مخي ته عاجز نيسي په سبب به يې د انسان دوه پر درېيمه برخه يعني ډېري عزت او وقار او نيمه برخه د دين له منځه لاړ شي؛ چې په دې کار سره به د انسان عزت او ديانت دواړه کم شي.

عَنْ إِبْرَاهِيمَ بْنِ عَبْدِ اللهِ بْنِ مَسْعُودٍ، قَالَ: وَمَنْ خَضَعَ لَغَنِيٍّ وَوَضَعَ لَهُ نَفْسَهَ إِعْظَامًا لَهُ، وَطَمَعًا فِيمَا قِبَلَهُ ذَهَبَ ثُلُثَا مُرُوءَتِهِ، وَشَطْرُ دِينِهِ.[شعب الايمان 7882]
مولوي نورالحق مظهري

په محرم الحرام مياشت کې څه وکړو؟

په دې مياشتې کې هيڅ ځانګړی مصيبت يا ځانګړې خوشحالي نشته تنها په شريعت کې دومره ثابت دي چې د دې مياشتي د نهمي او لسمي ورځې روژه ثواب لري او که د چا څخه د نهمي ورځې روژه پاتي شي بيا دې د لسمي او يوولسمي ورځې روژه ونيسي.

دا مياشت لکه د ځانګړي خوشحالۍ مراسم چې نه لري، د ځانګړي مصيبت او غم مراسم هم نه لري نو ځکه دا مياشت بايد د نورو مياشتو په څېر عادي وګڼل شي او چې کوم کارونه په نورو مياشتو کې روا دي په دې مياشتي کې هم روا دي.

په دې مياشت کې لکه د مصيبت مراسم جوړول چې ګناه ده د مصيبت مراسمو ته ورتلل هم ګناه ده ځکه نو بايد موږ د ډېر احتياط څخه کار واخلو او په داسي مراسمو کې ګډون ونکړو.

دا شرعي مسئله ده چې هر شی بېله الله د بل چا لپاره نذر شي يا د بل چا پر نوم ذبح شي د هغه شي خوړل  نه دی روا ځکه نو په دې مياشت کې چې کوم خلک د بندګانو په نوم ذبح يا نذر کوي بيا يې د خيرات په نوم پر خلکو وېشي د داسي خوړو خوړل شرعا نه دی روا موږ بايد ځان ورڅخه وساتو.
مولوي نورالحق مظهري

د ديپلوماتيکي پرمختګ پيل:

په جهان کې د نظامونو تر منځ هميشه اړیکي پر رسمي پېژندلو ولاړي وي، د کومو هيوادونو تر منځ چې سیاسي رسميت وي د هغوی تر منځ اړیکي هم پراخي او هراړخيزي وي او چې رسميت نه وي هلته بيا اړیکي هم محدودي او مقيدي وي.

د روسيې هيواد لخوا د اسلامي امارت په رسميت پېژندل يو ستر سياسي بريالیتوب دی، الله تعالی دي وکړي چې زموږ هيواد ته ګټور تمام شي او د بشري اصولو او انساني ضوابطو پر اساس دواړه هيوادونه د يو بل سره ښه تعامل او تودې اړيکي وپالي.

د روسيې دا اقدام نورو هيوادونه ته دا پيغام ورکوي چې که نړيوال غواړي په افغانستان کې خپلي مشروعي ګټي خوندي کړي يا د افغانانو سره بشري خواخوږي وپالي نو يواځي يو غوراوی لري چې هغه د اسلامي امارت په رسميت پېژندل دي.

غوره خبره خو دا وه چې د رسميت پيل اسلامي هيوادونو بيا ګاونډي هيوادونو کړی وای خو اوس چې روسيې دغه غيرت وکړ هيله مند يو چې نور هغه هيوادونه چې ځانونه خپلواک بولي د روسيې پر پلونو پښې کښيږدي او داسي غيرتي اقدام وکړي.

د هيوادونو لپاره د افغانستان اسلامي امارت په رسميت پېژندل يوه آزموينه ده چې د دوی خپلواکي او استقلال په ډاګه کوي او انساني اصولو ته د دوی پر پابندۍ دلالت کوي.

مولوي نورالحق مظهري

برکتناکه او بې برکته سودا:

ژباړه: حکيم بن حزام د رسول الله صلي الله عليه وسلم څخه روايت کوي چې هغه وفرمايل: پلورونکی او پېرېدونکی په اختيار باندي دي تر څو چې سره جلا شوي نه وي که دوی په خپلي سودا کې رښتيا وويل او د خپلي سودا عيب يې بيان کړ نو د دوی په سودا کې به برکت واچول شي او که يې درواغ وويل او د خپلي سودا عيب يې پټ کړ نو د سودا څخه به يې برکت پورته شي.

يعني کله چې دوه نفره سودا سره وکړي تر څو چې دوی په بدن باندي سره بېل شوي نه وي تر هغه وخته پوري دوی په خپلي سودا کې اختيار لري که يې صحيح کوي او که يې لغوه کوي خو چې کله بيا سره جلا شوه بيا نو سودا واجبه سوه لغوه کولای يې نه شي.

همداسي څوک چې په خپلي سودا کې رښتيا ووايي او عيب يې مشتري ته بيان کړي نو الله پاک به يې په سودا کې برکت کښيږدي خو که يې په سودا کي درواغ وويل او عيب يې د مشتري څخه پټ کړ نو د سودا څخه به يې برکت هم پورته شي.

عَنْ حَكِيمِ بْنِ حِزَامٍ عَنِ النَّبِىِّ -صلى الله عليه وسلم- قَالَ: الْبَيِّعَانِ بِالْخِيَارِ مَا لَمْ يَتَفَرَّقَا فَإِنْ صَدَقَا وَبَيَّنَا بُورِكَ لَهُمَا فِى بَيْعِهِمَا وَإِنْ كَذَبَا وَكَتَمَا مُحِقَتْ بَرَكَةُ بَيْعِهِمَا.[صحيح مسلم 3937]

مولوي نورالحق مظهري

حاجیانو صاحبانو ته پيغام:

ګرانو حجاجو کرامو د حج مبارک سفر او بيرته د راستنېدلو مبارکي درته وايم، الله تعالی مو تر سره کړي مناسک او عبادات په خپل دربار کې درڅخه قبول کړه.

تاسې ته معلومیږي له یوې خوا د مال بې ځایه مصرف د الله تعالی نه خوښيږي ځکه په حدیث شريف کې راځي: عَن أبي هُرَيرة قال: قال رَسُول اللهِ صَلَّى الله عَلَيه وَسَلَّم: لا يحب الله إضاعة المال.[مسندالبزار8463] ژباړه: د ابوهريره رضي الله څخه روايت دی چې رسول الله صلی الله عليه وسلم وفرمايل: الله تعالی د مال ضايع کول نه خوښوي، د بلي خوا د اميرالمؤمنين حفظه الله امر دی چې د حج په مراسمو کې بې ځايه لګښتونه مه کوئ. له همدې امله بايد کوښښ وکړئ چې د حج څخه ستاسي راتګ په ساده او عادي مراسمو کې تر سره شي او د بې ځايه لګښتونو څخه ځان وساتئ تر څو د الله تعالی د خوښي خلاف کار درڅخه و نه شي، د امیرالمؤمنین حفظه الله د فرمان بې اطاعتي و نه شي او د ناوړه کار رواج کوونکې درڅخه جوړ نه شي.

مولوي نورالحق مظهري

داسي فکر مه کوه!

۱ ـ داسي فکر مه کوه چې هر شی چې ته یې صحي بولې هغه به خاماخا صحي وي ځکه یو خو ته معصوم نه یې بل که ستا هر فکر صحي سي نو د هر چا هر فکر صحي دی بیا نو غلط او خطأ نسي موجودېدلای سره د دې چې د خطأ او غلط وجود حق دی.

۲ ـ داسي فکر مه کوه چې کوم حیثیت چې ته يې په خپل قوم او وطن کې لرې هغه به په ټولو قومونو او وطنونو کې لرې ځکه ستا قوم به د قومیت په خاطر او وطنداران به دې د وطندارۍ په خاطر عزت کوي او دا دواړه تړونونه ته د نورو خلکو سره نه لرې.

۳ ـ داسي فکر مه کوه چې ته په يوې ټولنې کې په علمیت باندي مشهور یې نو په ټولي نړۍ کې به ته په علميت باندي مشهور کېږې او په نړیواله کچه به ستا کلیوال حیثیت منل کیږي ځکه نړیوال شهرت نړیوال ظرفیت غواړي او هغه په هر چا کې نشته.

۴ ـ داسي فکر مه کوه چې ستا هره خبره بايد نور خلک ومني او يا په هر شي کې بايد نور خلک ستا سره مشوره وکړي ځکه ستا خبره خو قرآن او حدیث نه دی چې په منلو یې نور انسانان مجبور وي او نه هم هر څوک په تا باور کوي چې ستا سره مشوره وکړي.

۵ ـ داسي فکر مه کوه چې کله ته په يو نظام کې وظیفه ولرې نو ستا هر کار دې په هره برخه کې د نظام په نماينده ګۍ وي او تا ته دي دا حق وي چې خپل هر کار نظام ته منسوب کړې ځکه نظام یواځي ستا پر فکر او ستا پر عمل باندي نه دی ولاړ بلکې په نظام کې ستا په څېر په سلهاوو کسان شته نو که هر یو ستا غوندي دعوه وکړي بیا خو نو د یوه نظام څخه په سلهاوو نظامونه جوړيږي.

۶ ـ داسي فکر مه کوه چې دين او مذهب د یوه ښار او یوه کلي لپاره راغلي تر څو نور ښارونه او کلي ستا د ښار او کلي په مذهب شي بلکې دین او مذهب د عقیدې او عمل نوم دی په هر ځای او هر چا کې موجودېدلای شي.

۷ ـ داسي فکر مه کوه چې دين او مذهب ته ستا لخوا جوړ شوي شعارونه بايد ټول خلک ومني ځکه ستا لخوا جوړ شوي شیان د دین او مذهب شعایر نه دي بلکې ستا تفردات دي منل او نه منل یې یواځي ستا کار دی نور خلک یې په منلو باندي مکلف نه دي.

۸ ـ داسي فکر مه کوه چې د یو شخص د کاري ظرفیت او استعداد په تشخیص کې ته حتما پر حق یې او نور خلک هم باید د هغه شخص په اړه ستا خبره ومني ځکه دا ستا خپل شخصي فکر او انفرادي استنباط دی ممکن ته پکې خطاوتلی وشې.
مولوي نورالحق مظهري
https://t.me/isalamimaqali

هغه شيان چې د انسان لپاره غوره دي:

عبدالله ابن مبارک ته يو چا وويل: د اسلام وروسته کوم شی ډېر ښه دی چي بنده ته ورکول شوی دی؟ هغه ورته وويل: عقل دی. بيا يې ورڅخه وپوښتل که عقل نه و؟ هغه وويل: ښه ادب دی. بيا يې پوښتنه ورڅخه وکړه که ادب نه و؟ هغه وويل: صالح ورور دی چې دی مشوره ورسره وکړي. بيا يې وپوښتل که صالح ورور نه و؟ هغه وويل: اوږد سکوت دی. بيا يې وپوښتل که سکوت نه و؟ هغه وويل: عاجل مرګ دی.[ذم الهوي ص10]

توضيح: يعني د انسان لپاره د اسلام وروسته تر ټولو ښه شی عقل دی د هغه وروسته ښه شی نيک ادب دی د هغه وروسته ښه شی صالح او نيک ورور دی تر څو دی مشوره ورسره وکړي د هغه وروسته ښه شی ډېر وخت چوپ پاتې کېدل دي ځکه په چوپ پاتې کېدلو باندي انسان د ډېرو آفاتو څخه ساتل کېدلای شي او که دا ټول شيان نه وي بيا نو انسان ته دا غوره ده چې دستي مړ شي ځکه په دې وخت کي ژوند هيڅ هدف نه لري او تر بې هدفه ژوند مرګ ډېر ښه دی.
مولوي نورالحق مظهري
https://t.me/isalamimaqali

د امريکا او انګلیس لخوا د اسرائيلو احتمالي ننګه:

داسي ښکاري چې امريکا او انګليس د اسرائیلو ننګه کوي او په پلوۍ يې پر ايران بريدونه کوي؛ د دې څخه داسي ښکاري چې د ايران بریدونو اسرائيلو ته ډېر زيانونه اړولي او د دې اټکل کيږي چې اسرائيل دي په نظامي لحاظ ضعيف سي او په يواځي ډول دي د ايران په وړاندي جګړه و نه ګټي.

د کومي ورځي څخه چې د فلسطين پر ځمکه اسرائيلو ځان ته حکومت جوړ کړی دی د هماغه ورځي څخه امريکا او انګليس په ټول توان سره د اسرائيلو تر څنګ ولاړ دي او چې د هر چا لخوا اسرائيلو ته ګواښ متوجه کيږي امريکا د هغه په وړاندي د اسرائیلو مرسته کوي لکه د عربو او اسرائیلو په جګړه کې چې امريکا او انګلیس په تمامه معنی د اسرائیلو سره ولاړ وه او يا لکه نن چې د ايران په وړاندي د اسرائیلو سره دريږي.

تاريخ ته په کتو داسي ویلای سو چې ایران اوس د اسرائيلو لومړی هدف دی، که ایران ته ماتي ورکړي دستي به د سيمي نورو هيوادونو ته هم لاس اچوي او د ځان په وړاندي به ټولو احتمالي ګواښونه له منځه وړي.

د اسلامي نړۍ هيوادونه يې اوس ننداره کوي او ځينې خو لا د اسرائيلو سره مرسته هم کوي خو دا په يقین باندي وايو چې لکه د اسرائيلو چې دا لومړنی برید نه دی وروستنی به هم نه وي بلکې نور اسلامي هيوادونه په خاصه توګه نسبتا قوي هیوادونه به هم تر برید لاندي نيسي.

کاشکي د اسلامي هيوادونو مشرانو عقل درلودلای او اخف د شرینو يې پېژندلای وای تر څو د اسرائيلو په وړاندي يې معقوله پالیسي غوره کړې وای او د ځان او نورو اسلامي هیوادونه راتلونکی يې د اسرائیلو غوندي تېريګرو څخه ساتلای وای.
مولوي نورالحق مظهري

د ايران او اسرائيلو د جګړې څخه بايد موږ درس او عبرت واخلو:

دا خو يقيني خبره ده چې ټول حقيقي او رښتيني مسلمانان د اسرائيلو په شکست او بربادۍ خوشحاله دي ځکه اسرائيل د اسلامي نړۍ لپاره ډېر لوی او ستر خطر دی په خاصه توګه په داسي حالت کې چې اسلامي نړۍ ډېره سره پاشلې او بې اتفاقه هم ده، او که اسرائيل په دې جګړه کې برلاسه سي بيا به يې هيڅوک مخي ته د درېدلو جرأت ونکړي.

کوم شی چې موږ مسلمانانو ته ډېر مهم دی هغه دا دی چې موږ د دې جګړې د نوعيت څخه عبرت او درس واخلو ځکه دا جګړه د توري، ټوپک او سړيو جګړه نه ده بلکې د پرمختللي تکنالوژۍ او لويو وسلو جګړه ده؛ داسي جګړه ده چې د زرګونو کيلومټرونو څخه پر يو بل باندي واري کوي او په ډېر دقت سره د دومره اوږد مسافت څخه هدف ويشتلای سي.

اسرائيل د ايران په نسبت بيخي ډېر کوچنی هيواد دی او لږ نفوس لري خو په نظامي برخه کې دومره پر مخ تللی دی چې د ايران غوندي پر سترو هيوادونو يرغل کوي او پر شااوخوا يې عربي هيوادونه خو سوڼ هم نه سي ورته وهلی.

که ايران داسي مسلح وای لکه اسرائيل، لومړی خو اسرائيلو بريد نه ورباندي کوی او که يې کړی وای په يوه ورځ يې اسرائيل د خاورو سره خاوري کوی خو خبره ټوله په وسله او نظامي سمبالښت کې ده.

موږ مسلمانان بايد وږي او تږي وګرځو خو د ځانونو د ساتني لپاره تکنالوژي او پرمختللي وسلې لاس ته راوړو کنه نو د اسرائيلو غوندي بدمعاش هيوادونه به هميشه ګواښونه راته کوي او تل به د ځان او خپلو نورو مسلمانانو وړونو په دفاع کې پاتي راځو.

دا زما باور دی چې شرائطو ته په کتو نړۍ په دوو شيانو کې ورځ تر بلي پرمختګ کوي چې يو رسنۍ دي او بل تکنالوژي ده او ورځ تر بلي د ساينسي اختراعاتو بازار ګرميږي نو زموږ لپاره لازمه ده چې په دغه دواړو برخو کې هم د ځان دفاع ته او هم د اړتيا په صورت کې پر دښمن بريد کولو ته ځانونه پوره چمتو کړو تر څو مو ځان، هيواد، فکر او فرهنګ ټوله په آسانۍ سره وساتو. 

موږ مسلمانان به هم خپله بزرګي کوو او هم به په مادي برخه کې د نړۍ سره متوازن روانيږو ځکه زموږ په دين کې د اعداد عمومي فرمول موږ ته همدا لارښوونه کوي چې تاسي بايد ځانونه په مادي او معنوي دواړو قوتونو باندي سمبال کړئ. 

مولوي نورالحق مظهري

شيطان ته د هوښيار انسان خطاايستل ډېر سخت کار دی:

ژباړه: وهب ابن منبه ويلي دي: د غره ايسته کول او ډبره ډبره کول شيطان ته آسانه دی تر مقابلې د هوښيار مؤمن.

دا د مؤمن د عقل د ارزښت ښکارندويي کوي چې شيطان يې د مقابلې څخه عاجز دی او د عاقل مسلمان سره مقابله ورته دومره سخته ده چې د غره ټوټه ټوټه کول ورته تر هغه آسانه دی؛ دا يوه پرتله ده او هدف ورڅخه دا دی چې شيطان ته د عاقل مسلمان سره مقابله ډېره سخته ښکاري.

موږ بايد الله تعالی ته دعا وکړو چې موږ ته کامل عقل راکړي او د شیطان د دسيسو څخه مو وساتي همداسي هغه کارونه وکړو چې په هغو باندي د انسان عقل قوي کيږي.

قال وهب ابن منبه: و إزالة الجبل صخرة صخرة أهون علي الشيطان من مکابدة المؤمن العاقل.[العقل لابن ابي الدنيا ص 17]

مولوي نورالحق مظهري