د روژې میاشتي برکتونه:

نهم برکت:
بل برکت ددې مياشتي دا دی چي په دې مياشتي کي د يوې روژې په نيولو سره انسان د اويا کالو سفر مسافت په اندازه د دوږخ څخه ليري کيږي.  لکه په حديث کي چي راځي:
مَنْ صَامَ يَوْمًا فِي سَبِيلِ اللهِ بَعَّدَ اللَّهُ وَجْهَهُ ، عَنِ النَّارِ سَبْعِينَ خَرِيفًا.[صحيح البخاري 2840]
ژباړه: څوک چي يوه ورځ د الله په لاره کي روژه ونيسي نو الله پاک به يې مخ د اويا 70 کاله سفر مسافت په اندازه د اور څخه ليري کړي.
دا معلومه خبره ده چي هر مسلمان ددې غوښتونکی دی چي الله پاک یې د اور څخه لیري کړي نو د اور د لیري کېدلو لپاره یوه ذریعه ددې مبارکي میاشتي د روژې نیول دي چي هر مسلمان یې باید عملي کړي.

لسم برکت:
بل برکت ددې مياشتي دا دی چي دا مياشت د توبې کولو لپاره ځانګړی وخت بلل سوی دی چي په اخلاص باندي توبه کول ارومرو د الله پاک په دربار کي قبليږي لکه په حديث کي چي راځي: وَرَغِمَ أَنْفُ رَجُلٍ دَخَلَ عَلَيْهِ رَمَضَانُ ثُمَّ انْسَلَخَ قَبْلَ أَنْ يُغْفَرَ لَهُ.[سنن ترمذي 3890]
ژباړه: په خاورو دي سي پزه د هغه انسان چي مياشت د روژې ورباندي راسي او بيا بيرته ځيني ولاړه سي مخکي تر دې چي ده ته بخښه وسي.
نو مخكي تر دې چی الله مکړه دا طلایي فرصت راڅخه ولاړ سي راسئ همدا اوس توبه وکړو او پر تېرو ګناهونو باندي د پښېمانۍ په ښکاره کولو سره د الله پاک سره دا وعده وکړو چي هیڅ وخت بیا هغه ګناهونو ته نه ورځو، همدا راز د را روانو وختونو په اړه هم د الله پاک څخه ددې توفیق وغواړو چي د ګناهونو څخه مو وساتي او موږ ته پر توبې د استقامت همت او غیرت راکړي.
دوام لري....
مولوي نورالحق مظهري

روژه او توبه:(څلورمه او آخري برخه)

د توبې په کولو کي د ځينو خلګو خطاګاني:

۱ – ځيني خلګ ژر توبه نه باسي بلکي ځنډوي يې داسي فکر کوي چي وروسته به بيا توبه وباسم،‌ دا ډېره غلطه مفکوره ده ځکه انسان ندی خبر چي زه به تر کوم وخته ژوندی يم او بل څه وخت به زما توبه قبوله سي؟ نو چي څومره د انسان په طاقت وي بايد ژر توبه وباسي.

۲ – ځيني خلګ د توبې څخه غافل وي او تل دېته ګوري چي ما خو په ظاهره کومه غټه ګناه نه ده کړې نو زه ولي توبه وباسم؟ پداسي حال کي انسان بايد دېته و نه ګوري چي ما خو ظاهرا ګناه نه ده کړې، بلکي تل توبه وباسي، ځکه ځيني وختونه د انسان څخه په ناخبرۍ کي ګناه کيږي او ځيني وختونه انسان داسي شيان کوي چي دی يې ګناه نه بولي سره ددې  چي هغه ګناه وي، پدې خاطر دی چي رسول الله صلي الله عليه وسلم فرمايي: الشرك في هذه الأمة أخفى من دبيب النمل فقال أبو بكر : فكيف الخلاص منه يا رسول الله؟ قال: أن تقول: اللهم إني أعوذ بك أن أشرك بك وأنا أعلم، وأستغفرك لما لا أعلم. [رواه البخاري في الأدب المفرد]

ژباړه: په دې امت کي شرک د ميزيانو د پښو تر ږغ لا سپک دی، ابوبکر رضي الله عنه پوښتنه وکړه چي يا رسول الله څنګه به نو ځيني خلاصيږو؟ رسول الله صلی الله عليه وسلم وفرمايل: داسي ووايه: ای الله په تا باندي پناه غوام ددې څخه چي ستا سره شريک ونيسم پداسي حال کي چي زه پوهېږم او ستا څخه طلب د بخښې کوم د هغه شرک په اړه چي زه نه په پوهېږم.

نو هميشه دي سړی عامه توبه باسي چي ای الله د هر ډول ګناه څخه مي توبه ده که ما په شعوري ډول کړېوي او که مي په غير شعوري ډول کړېوي.

۳ – ځيني خلګ توبه په دې خاطر نه کوي چي شايد زه بيرته ګناه ته رجوع وکړم، يا يې په دې خاطر نه کوي چي خلګ ما ته پېغور راکوي، يا يې په دې خاطر نه کوي چي زما چوکې او مرتبه له لاسه ځي، دا غلط فکر دی ځکه انسان بايد د ګناه د بيا کولو له وېري توبه ونه ځنډوي بلکي هر وخت توبه وباسي کڅه هم خدای مګړه ګناه ورڅخه ډېره کيږي، همدا راز د خلګو د پېغور له وېري او چوکۍ د لاسته تللو له وېري مسلمان ته د توبې ځنډول نه رواکيږي ځکه د توبې تر کولو پوري د انسان نجات او ژغورل تړاو لري نو د خلګو د پېغور له وجهي يا د يوې وظيفې د دلاسه ورکولو له وجهي نه بايد انسان خپل ځان د هلاکت کندي ته ورواچوي.

۴ - ځيني خلګ بيا توبه نه کوي ځکه د الله تعالی پر رحمت باندي اعتماد کوي، دا هم غلط فکر دی، دا صحيح خبره ده چي الله پاک رحيم او مهربان دی خو دا هم منل سوې خبره ده چي الله پاک قهار هم دی، جبار هم دی، عزيز هم دی، شديد العقاب هم دی او منقم هم دی نو لکه چي سړی بايد د الله پاک رحمت ته اميدوار وسي د الله  پاک څخه بايد وېره هم ولري، الله پاک فرمايي: وَلَا يُرَدُّ بَأْسُهُ عَنِ الْقَوْمِ الْمُجْرِمِينَ.[الأنعام:الآية ۱۴۷] ژباړه: د الله پاک عذاب د مجرمينو څخه نه ليري کيږي.

مولوي نورالحق مظهري

روژه او توبه:(دریمه برخه)

د توبې فضيلتونه:

1 - د توبې فضيلتونه او رازونه بيخي ډېر دي: توبه د کاميابۍ سبب دی، توبه د نيکمرغۍ لاره ده، په توبې باندي د انسان ګناهونه له مينځه ځي او چي څوک سمه توبه وباسي الله پاک يې بدۍ په نيکيو باندي بدلوي.

2 - الله تعالی د خپل بنده په توبې باندي ډېر خوشاله کيږي:

د احاديثو په کتابونو کي هغه حديث راغلی دی چي رسول الله صلی الله عليه وسلم په هغه کي د بنده په توبې باندي د الله پاک د خوشالۍ يادونه کوي؛ په حديث کي راځي: الله پاک د خپل بنده په توبې باندي تر هغه چا ډېر خوشاله کيږي چي يو ډېر خطرناک ځای ته ولاړ سي؛  ډوډې، اوبه او نور سامانونه يې پر سورلۍ باندي تړلي وي نو خپل سر کښېږدي تر څو يو کړی ويده سي کله چي  د خوبه را ويښ سي که ګوري سورلۍ يې نسته، ګرمي هم ډېره سخته وي او دی هم ډېر تږی سوی وي نو د خپلي دابې پسې وګرځي خو د پيدا کولو څخه يې عاجز سي تر څو چي ناهيلی سي نو د ځانه سره فيصله وکړي چي بيرته خپل هماغه پخواني ځای ته ځم، هغه ځای ته چي ولاړ سي نو ويده سي کله چي د خوبه را ويښ سي که ګوري سورلۍ يې سرته ولاړه ده، نو دا انسان ډېر خوشاله سي آن تردې چي د ډېري خوشالۍ له کبله ددې پر ځای چي دی ووايي: ای الله ته مي خدای يې زه دي بنده يم داسي ووايي ای الله ته مي بنده يې زه دي خدای يم.

نو دغه سړی چي څومره خوشاله کيږي الله پاک د خپل بنده په توبې باندي تر دغه انسان ډېر خوشاله کيږي.

3 - په توبې باندي الله پاک توبه کوونکي ته ډېر مراتب د عبوديت ورکوي چي بيا پر هغو باندي د ډېرو نعمتونو ورکول مرتب دي.

4 - په توبې باندي الله پاک توبه کوونکي ته محبت، د زړه نرمي، مهرباني، شکر ايستل، د الله پاک حمد ويل، د الله پاک څخه خوشاله کېدل ورکوي.

5 - په توبې باندي انسان ته عاجزي او نفس شکستي پيدا کيږي او عاجزي الله پاک ته تر ډېرو ښکاره اعمالو بهتره ده پدې خاطر دی چي الله پاک د عاجزۍ په وخت کي د انسان دعاء ژر قبلوي په خاصه توګه د سجدې په حالت کي دا ځکه چي هغه حالت د عاجزۍ او خضوع دی، له همدې امله د مظلوم او مسکين دعاء ژر قبلوي ځکه چي هغوی  عاجزي لري.

دوام لري....

مولوي نورالحق مظهري

ای د الله بنده تکبر مکوه!

ای د الله بنده! ته د ځانه سره فکر وکړه! د کوچنۍ ناروغۍ او تبي طاقت نه لرې او په يو ګړي دي تر بستر رسوي، د وړوکي غم طاقت نه لرې او په چيغو دي را ولي او د لږي ستړيا طاقت نه لرې پر ځای دي کښېنوي نو بيا ولي تکبر کوې! ته نه يې خبر چي الله تعالی فرمايي: خلق الانسان ضعيفا. يعني انسان ضعيف پیدا سوی دی. خپل ضعف درک کړه او د تکبر څخه ځان وساته!

ای د الله بنده! وظيفه چي هرڅومره غټه وي ددې ارزښت نلري چي انسان يې په درلودلو باندي تکبر وکړي.
ای د الله بنده! ته نه يې خبر چي تکبر د شيطان او فرعون صفته خلګو کار دی؟

ای د الله بنده! تا هغه حدیث ندی اورېدلی چي رسول الله صلی الله علیه وسلم فرمایي: د چا په زړه کي چي يوه زره تکبر وي هغه به جنت ته داخل نسي.؟

ای د الله بنده! تا هغه قدسي حدیث ندی اورېدلی چي الله جل جلاله فرمایي: تکبر زما پټو دی څوک چي په هغه کي زما سره لانجه کوي یعني تکبر کوي زه به هغه څوک اور ته وغورځوم؟

ای د الله بنده! تا هغه حدیث ندی اورېدلی چي رسول الله صلی الله علیه وسلم فرمایي: هر څوک چي د الله تعالی پر مخلوقاتو تکبر وکړي الله تعالی به یې داسي بې ارزښته کړي چي آخر به یې اسفل السافلین ته ور واچوي؟

او ای د الله بنده! ته چي هر څومره تکبر وکړې نه ځانته ګټه په رسولای سې او نه هم بل چا ته تاوان، هسي خپلو سږمو ته باد مه ورکوه چي هرڅه وکړې آخر د نورو انسانانو غوندي ته هم يو انسان يې؛ ددوی غوندي ډوډې خورې او قضاء حاجت کوې، ددوی غوندي په ناروغۍ لوېږې او په اجل باندي مړ کېږې.
مولوي نورالحق مظهري

روژه او توبه:(دویمه برخه)

الله پاک پر خپلو بندګانو ډېر مهربانه دی، ددې ترڅنګ چي د نېکۍ په کولو یې ډېر خوشاله کیږي بلکي د روژې په میاشت کي یې څوبرابره ورته حسابي او په عامه توګه  یې استغفار او توبې ته تشویقوي ترڅو د ګناه کولو وروسته توبه وباسي او د الله د دربار څخه نا امیده نسي. الله جل جلاله فرمایی: وَمَنْ يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُورًا رَحِيمًا.[النساء: 110]
ژباړه: هرڅوک چي بد کار وکړي او يا پرځان باندي ظلم وکړي وروسته بيا د الله پاک څخه د بښني غوښتنه وکړي نو الله پاک به بخښونکی او مهربان و مومي.
همدا راز د نصاراوو په اړه فرمايي: لَقَدْ كَفَرَ الَّذِينَ قَالُوا إِنَّ اللَّهَ ثَالِثُ ثَلَاثَةٍ وَمَا مِنْ إِلَهٍ إِلَّا إِلَهٌ وَاحِدٌ وَإِنْ لَمْ يَنْتَهُوا عَمَّا يَقُولُونَ لَيَمَسَّنَّ الَّذِينَ كَفَرُوا مِنْهُمْ عَذَابٌ أَلِيمٌ.[المائدة: 73]
ژباړه: يقينا چي کافران سويدي هغه خلګ چي دوی وايي: الله د درو دريم دی پداسي حال کي چي بېله يوه الله بل هيڅ حق معبود نسته، کچيري دوی د خپلي دغه وينا څخه لاس وانخلي نو ارومرو به هغه خلګو ته ددوی سخت عذاب ورسيږي چي کافران سويدي.
بيا یې وروسته الله پاک توبې کولو ته تشويقوي او فرمايي: أَفَلَا يَتُوبُونَ إِلَى اللَّهِ وَيَسْتَغْفِرُونَهُ وَاللَّهُ غَفُورٌ رَحِيمٌ.[المائدة: 74]
ژباړه: ولي دوی الله پاک ته توبه نکوي او ولي د الله پاک څخه بخښه نه غواړي پداسي حال کي چي الله بخښونکی او مهربان دی.
او د هغه خلګو په اړه چي مسلمانان يې د اور کندو ته ور اچول الله پاک فرمايي:
إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ. [البروج: 10]
ژباړه: يقينا هغه خلګ چي مسلمانانو نرانو او مسلمانو ښځو ته يې عذاب ورکړ وروسته يې توبه هم نده کړې ددوی لپاره به د جهنم او سوځوونکی عذاب وي.
حسن بصري رحمه الله ددې آيت په تفسير کي فرمايي: تاسو د الله پاک احسان او مهربانۍ ته وګورئ چي دغه خلګو د الله پاک اولياء او دوستان وژلي دي خو الله پاک يې بياهم توبې او بخښني ته دعوتوي.
د توبې ارزښت دومره ډېر دی چي الله پاک خپل بندګان د الله پاک د رحمت د نا اميدۍ څخه منع کړيدي او  فرمايي:
قُلْ يَاعِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ. [الزمر: 53]
ژباړه: ووايه ای زما هغه بندګانو چي پر ځان مو اسراف کړی دی د الله د رحمت څخه مه ناهيلي کيږئ يقينا چي الله ټول ګناهونه بخښي او يقينا چي الله بخښونکی او مهربان دی.
عبدالله ابن عباس رضي الله عنه ددې آيت په تفسير کي فرمايي: څوک چي ددغه آيت وروسته خلګ د توبې څخه نا هيلي کړي نو هغه انسان د الله د کتاب څخه انکار وکړ.
دوام لري...
مولوي نورالحق مظهري

روژه او توبه: (لومړي برخه)

ای روژاتيانو! روژه د توبې کولو لپاره ډېره ښه موقع ده راځئ د ټولو ګناهونو څخه که کوچني وي که لوی توبه وباسو او الله پاک ته راجع سو!
الله پاک په خپل احسان باندي د توبې دروازه خلاصه پرې ايښې ده، ځکه الله پاک د توبې کولو امر کړی دی او د قبلولو وعده يې ورکړېده کڅه هم ګناهونه غټ او ډېر وي. الله پاک فرمايي: وَأَنِيبُوا إِلَى رَبِّكُمْ وَأَسْلِمُوا لَهُ مِنْ قَبْلِ أَنْ يَأْتِيَكُمُ الْعَذَابُ ثُمَّ لَا تُنْصَرُونَ.[الزمر: 54]
ژباړه: خپل رب ته رجوع وکړئ او ورته تسليم سئ مخکي تر دې چي تاسو ته عذاب راسي وروسته بيا ستاسو کومک نه کيږي.
پدې آيت کي الله پاک خپل بنده ګان پدې باندي امر کړيدي چي الله پاک ته راجع سي، د رجوع  معنی همدغه ده چي توبه دي وباسي.
البته د دريو حالتونو وروسته د انسان توبه نه قبليږي: هغه وخت چي لمر د مغرب لخوا را وخيژي، هغه وخت چي د انسان زکندن وي او د غرغرې حالت يې وي او هغه وخت چي د عذاب نزول شروع وي.
چي په همدغه آيت کي يوه شي ته اشاره سوېده ځکه الله پاک فرمايي مخکي تردې چي تاسو ته عذاب راسي الله پاک ته راجع سئ يعني د عذاب راتللو وروسته بيا راجع کېدل کومه ګټه نلري.
همدا راز الله پاک د توبې د قبلولو په اړه فرمايي: وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ. [الشورى: 25]
ژباړه: الله هغه ذات دی چي د خپلو بندګانو څخه توبه قبلوي او ګناهونه يې ورته بخښي او په هغه څه باندي پوهيږي چي بندګان يې کوي.
نو چي الله پاک زموږ توبه راڅخه قبلوي موږ بايد چي څومره ژر وي د ټولو لويو او کوچنيو ګناهونو څخه توبه وباسو او الله پاک ته راجع سو.
دوام لري...
مولوي  نورالحق مظهري

د روژې میاشتي برکتونه:

شپږم برکت:
بل برکت ددې مياشتي دا دی چي څوک روژاتي ته روژه مات ورکړي نو الله پاک به و ده ته د روژاتي ثواب ورکوي لکه په حديث کي چي راځي: من فطر صائماً كان له مثل أجره غير أنه لا ينقص من أجر الصائم شيء. [مسند أحمد]
ژباړه: څوک چي روژاتي ته روژه مات ورکړي نو ده ته به د روژاتي غوندي مزدوري ورکول کيږي بېله دې چي د روژاتي د مزدورۍ څخه دي کوم شی کم کړل سي.
د روژاتي په ثواب باندي یواځي الله پاک خبر دی چي څومره به وي، دا پدې خاطر نه چي ثواب یې معلوم نه دی بلکي پدې خاطر چي ثواب یې بیخي ډېر دی نو څومره ثواب چي هغه ته د روژې پر نیولو ورکول کیږي و هغه چاته به هم هغومره ثواب ورکول کیږي چي روژاتي ته روژه مات ورکوي.

اووم برکت:
بل برکت ددې مياشتي دا دی چي پدې مياشتي کي د پيشلمي په کولو کي الله پاک ډېر فضيلت ايښی دی لکه چي په حديث کي راځي: تَسَحَّرُوا فَإِنَّ فِي السَّحُورِ بَرَكَةً.[متفق عليه]
ژباړه: پيشلمی وکړئ ځکه چي په پيشملي کي برکت دی.
زموږ او د اهل کتابو د روژې یو تفاوت په دغه کي دی چي موږ پیشلمی کوو دوی یې نه کوي او د پیشلمي كول لکه په ظاهري معنی چي د الله پاک لخوا امت ته د رسول الله صلی الله علیه وسلم یو ځانګړیتوب او احسان دی په معنوي لحاظ هم پر ډېرو برکتونو باندي مشتمل دی، پیشلمي ته کښیناستل ددې لامل جوړیږي چي انسان دي عبادت وکړي، ددې برکتناکه وخت د انوارو څخه دي برخمن سي او الهي رحمتونه دي ورباندی ووریږي.
د پیشلمي لپاره کوم خاص ټاکل سوی وخت نسته د شپې په آخرنۍ برخه کي د صبح دمېدلو څخه دي دومره وخت مخکي کښېني چي د صبح تر دمېدلو پوري په کافي اندازه خوراک او څښاک وکړي البته د صبح تر دمېدلو څو دقیقې مخکي باید پیشلمی بند کړل سي.
دوام لري....
مولوي نورالحق مظهري

آيا غواړی عبادات مو قبول سي؟

زموږ د تصوف علماء کرام فرمايي: تر څو چي انسان ځان د رزائلو څخه پاک نکړي په فضائلو باندي نسي ښايسته کېدلای؛ ځکه نو زموږ د ټولو عباداتو د قبوليت لپاره دا ضروري ده چي موږ لومړی ځانونه د هر ډول ظاهري او باطني ګناهونو څخه پاک کړو او د زنا، لواطت، غلا، غيبت، درواغ، حرام خوړلو، تهمت، چغلګري، حسد، بخالت، کينه او نورو جرمونو څخه توبه وباسو تر څو چي الله تعالی مو لمونځ، روژه، زکاة، حج، صله رحمي او نور عبادات په خپل دربار کي قبول کړي.
مولوي نورالحق مظهري

اسلامي مبارز ته پيغام:(۲)

مبارزه وروره! ستا اساسي هدف بايد د اسلام، مذهب او نظام څخه دفاع وي او هيڅ ځای ددې هدف څخه تر شا نسې او ددغه درو واړو څخه په دفاع کي ميدان خالي نکړې.
اسلام ستا دين دی او ستا د ژوند چوکاټ او قانون دی ځکه نو دفاع يې ستا ايماني دنده ده او پر اسلام باندي د شبهاتو جوابول ستا مسئوليت دی.
په دې باندي بايد ته خپل سر خلاص کړې چي الله تعالی ته اسلام تر ټولو غوره دين دی او بېله اسلام څخه بل هيڅ دين الله تعالی ته د منلو نه دی الله تعالی فرمايي: إِنَّ الدِّينَ عِنْدَ اللَّهِ الْإِسْلَامُ.[آل عمران۱۹] ژباړه: يقينا الله تعالی ته غوره دين اسلام دی. همداسي فرمايي: وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ.[آل عمران۸۵] ژباړه: څوک چي بېله اسلام څخه بل دين وغواړي ګرسره  به ورڅخه قبول نسي.
د اسلام دين الله تعالی زموږ لپاره انتخاب کړی او موږ يې د هغه په پيروۍ باندي امر کړي يو الله تعالی خپل پيغمبر ته فرمايي: فَأَقِمْ وَجْهَكَ لِلدِّينِ حَنِيفًا.[الروم۳۰] ژباړه: خپل مخ پر دين باندي ثابت کړه پداسي حال کي چي د نورو ټولو اديانو څخه و دين ته د اسلام مائل وسې.
يعني ته او ستا پلويان بايد پر دين د اسلام ټينګ ولاړ وي او د دين په ساتنه کي استقامت ولري.
ځکه نو مسلمان ته تر هر شي دين لومړيتوب لري او د دين په ساتنه او غځولو کي بايد خپل ټول توان په کار واچوي.
مذهب ستا د دين لپاره ډېره ښه تشريح ده او داسي اصولي چوکاټ دی چي ته  يې په منلو سره د هر ډول نفسي غوښتنو او ديني انحراف څخه ساتل کېدلای سې ځکه نو دا ستا مسئوليت دی چي د خپل حنفي مذهب دفاع په خپلو لومړيتوبونو کي وګرځوې او د هر ډول افراط او تفريط څخه په ډډي کولو سره خپل مذهب د تشدد او خرافاتو څخه وساتې.
د افغانانو د بريا او يووالي راز د پاک حنفي مذهب په منلو او ساتلو کي دی ځکه نو ته بايد دغه راز د ځانه سره وساتې او هيڅ وخت چا ته اجازه ور نکړې چي ستا د مذهب خلاف شبهات وارد کړي او يا ستا د مذهب خلاف بل فکر ته ترويج ورکړي.
اسلامي نظام ستا د سياست او اقتدار سمبول او کور دی ځکه نو ته يې په سمبالولو او ساتلو کي ډېر لوی مسئوليت لرې او ددې لپاره چي اسلامي ټولنه د سياسي انحراف څخه وساتل سي ته يې بايد د نظام څخه دفاع وکړې او پر نظام باندي هر ډول شبهات په مسلکي ډول په علمي ژبه او پوره استدلال جواب کړې.
موږ مسلمانان د اسلام په ساتلو او غځولو مأمور يو خو د اسلام ساتل او غځول د اسلامي نظام په شتون کي ممکن وي ځکه نو د اسلامي نظام اقامه زموږ دنده ده او د اقامې وروسته يې سمبالول او ساتل په هره طريقه چي وي زموږ فريضه ده.
دوام لري...
مولوي نورالحق مظهري

روژه د برکتونو میاشت:

د رسول الله صلي الله عليه وسلم د امت سره دا د الله پاک لوی احسان دی چي دوی ته يې د روژې مبارکه مياشت ورکړېده او دا مبارکه مياشت لکه الله پاک چي په قرآن کي او رسول الله صلی الله عليه وسلم په خپلو احاديثو کي مبارکه بللې همداسي د برکتونو او ثوابونو څخه ډکه ده، موږ به په نوبت ددې مبارکي میاشتي ډډېر برکته ستاسي شريک کړو .

 لومړی برکت:

لومړی بركت ددې مياشتي دا دی چي الله پاک دا مياشته د عظيم عبادت روژې لپاره ځانګړې کړې او تر نورو مياشتو يې ددې رتبه لوړه کړې لکه الله پاک چي فرمايي: فَمَنْ شَهِدَ مِنْكُمُ الشَّهْرَ فَلْيَصُمْه.[ البقرة 185] ژباړ: څوک چي ستاسو څخه مياشت وويني نو حتما دي روژة ونيسي.

دا چي الله پاک دا میاشت دداسي عظیم عبادت لپاره ځانګړې کړه او د دغه عبادت وخت یې دغه میاشت وګرځوله دا خپله لوی برکت دی.

نو موږ باید ددې میاشتي قدر وپېژنو پدې میاشتي کي د عظیم عبادت ترڅنګ نور عبادتونه هم ډېر وکړو تر څو الله پاک مو د خپلو خاصو بندګانو څخه وګرځوي.

 دویم برکت:

بل برکت ددې مياشتي دا دی چي الله پاک پدې مياشتي کي قرآن عظيم الشأن نازل کړی دی هغه قرآن چي د انسان د دنيوي او اخروي سعادت لپاره اساسي قانون دی لکه څنګه چي الله پاک فرمايي: شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى وَالْفُرْقَانِ.[البقرة 185] ژباړه: د روژې مياشت هغه مياشت ده چي په هغې کي قرآن نازل سوی دی، هغه قرآن چي د خلګو لپاره هدايت دی او د لارښووني او د حق او باطل تر مينځ د توپير کولو لپاره نښي دي.

نو موږ مسلمانان چي څومره قرآن ته احترام لرو، هغه پر خپل ژوند باندي حاکم بولو او خپله هره ستونزه پر قرآن باندي آواروو؛ د روژې د مبارکي میاشتي احترام هم باید ولرو او چي په کومو کارونو یې سمه لمانځنه او حق آداینه کیږي هماغه کارونه وکړو. 

دوام لري...

مولوي نورالحق مظهري

اسلامي مبارز ته پيغام:(۱)

که ته پر شريعت برابر وې په دې مه خوابدی کېږه چي خلګ په تا بسې خبري کوي ځکه خلګو په پيغمبرانو او امامانو پسې هم خبري کولې او ممکن د خلګو خبري ستا د خدمت او تقوی په سبب را پورته سوي وي ځکه مشهور متل دی چي ميوه لرونکې ونه په ډبرو ويشتل کيږي.
او که تا د باطل په وړاندي مبارزه کول نو پوه سه چي د خلګو خبري ستا په وړاندي د باطل عکس العمل او غبرګون دی ځکه کله چي د حق آواز پورته سي باطل خپله چيغي وهي او رش جوړوي نو ددې پر ځای چي ته خوابدی وسې بايد خوشحاله وسې ځکه د حق لپاره د خدمت نتيجه هغه وخت ښکاره کیږي چي اهل باطل ستا په وړاندي په چیغو سي او تبليغات درپسې شروع کړي.
اهل باطل تل د اهل حق د خدمت په وړاندي غبرګون ښکاره کوي ځکه تر هغه وخته چي رسول الله صلی الله د دین لپاره دعوت شروع کوی هیچا بد ورباندي نه ويل بلکي په امین يې یادوی خو کله چي په پيغمبرۍ مبعوث سو او د دین لپاره یې دعوت پیل کړ بيا یې هماغه خلګ ټول دښمنان سوه او رسول الله صلی الله علیه وسلم یې په ساحر، کاذب، مجنون او نورو بدو نومونو متهم کړ.
اهل باطل د اهل حق چوپ کولو او ناهيلی کولو لپاره ډېر تاکتيکونه په کار اچوي چي يو تاکتيک یې منفي تبليغات او بدي خبري کول دي.
په دې باندي هم باید ته خوشحاله وسې چي اهل باطل هيڅوخت ستا سره ځان نه مخامخ کوي او که کله در سره مخامخ کیږي نو تا ته هيڅ نه وايي ځکه پر تا باندي دليل نلري، ځيني وختونه خو ستا مخ ته د شرم احساس کوي او په چاپلوسۍ دي تر ځان تېروي.
خو په دې باندي پوه چي باطل هر څومره رش جوړ کړي او چي هر څومره زورور وي يوه ورځ به ستا په وړاندي ماتي خوري ځکه د حق د بريالیتوب وعده الله تعالی کړېده او ددې لپاره لويه بېلګه د ا.ا.ا مجاهدين دي چي تقريبا ټولي نړۍ تبليغات او منفي خبري پسې کولې خو الله تعالی د ټولو چلينجونو سره سره برياليتوب ته ورسول او ټول مخالفين یې وشرمول.
دوام لري....
مولوي نورالحق مظهري

د نوروز د لمانځني پر حراموالي باندي دلائل:

ليکوال: مولوي نورالحق مظهري
1. د نوروز په لمانځلوکي د کفارو د نفسي غوښتنو متابعت دی، پداسي حال کي چي مسلمان د هغوی د نفسي غوښتنو د متابعت څخه صراحتا منع سوی دی.
الله جل جلاله فرمایي:وَلَئِنِ اتَّبَعْتَ أَهْوَاءَهُمْ مِنْ بَعْدِ مَا جَاءَكَ مِنَ الْعِلْمِ إِنَّكَ إِذًا لَمِنَ الظَّالِمِينَ.[البقرة 145]
ژباړه: که چيري (بالفرض) ته د دوی (کفارو) د نفسي غوښتنو متابعت وکړې وروسته تر دې چي تاته علم درکړل سوی دی نو يقينا پدې وخت کي ته د ظالمانو څخه يې.
وَلَا تَتَّبِعْ أَهْوَاءَهُمْ عَمَّا جَاءَكَ مِنَ الْحَقِّ لِكُلٍّ جَعَلْنَا مِنْكُمْ شِرْعَةً وَمِنْهَاجًا.[ سورة المائدة 48]
ژباړه: او ته متابعت ددوی د نفسي غوښتنو مکوه د هغه څه نه چي تاسو ته د حق څخه راغلی دی، ستاسو څخه هر يوه ته مي لاره او طريقه جوړه کړېده.
يَا أَيُّهَا النَّبِيُّ اتَّقِ اللَّهَ وَلَا تُطِعِ الْكَافِرِينَ وَالْمُنَافِقِينَ إِنَّ اللَّهَ كَانَ عَلِيمًا حَكِيمًا * وَاتَّبِعْ مَا يُوحَى إِلَيْكَ مِنْ رَبِّكَ إِنَّ اللَّهَ كَانَ بِمَا تَعْمَلُونَ خَبِيرًا [الأحزاب 1 – 2]
ژباړه: ای پيغمبره د الله څخه ووېريږه، د کافرانو او منافقينو پيروي مکوه يقينا چي الله پوه او حکمت والا دی، او د هغه څه متابعت وکړه چي تاته د الله له لوري د وحي په توګه راغلي دي يقينا چي الله پاک په هغه څه باندي ښه خبر دی چي تاسو يې کوی.
په پورته آیتونو کي الله پاک رسول الله صلی الله علیه وسلم ته خطاب کوي چي د کفارو د نفسي غوښتنو متابعت مکوه ستاسو لاره د هغوی د لاري څخه بېله ده یعني د مسلمانانو لاره بېله ده او د کفارو لاره بېله ده، دلته کڅه هم خطاب رسول الله صلی الله علیه وسلم ته دی خو حکم یې عام دی هر مسلمان ورباندي مکلف دی.
2 - د نوروز په لمانځلو باندي ځان دکفارو غوندي جوړول دي، او مسلمان صراحتا ددې څخه منع سوی دی چي ځان دي د کفارو غوندي جوړکړي.
الله جل جلاله فرمایي:
وَلَا تَكُونُوا كَالَّذِينَ نَسُوا اللَّهَ فَأَنْسَاهُمْ أَنْفُسَهُمْ أُولَئِكَ هُمُ الْفَاسِقُونَ.[ سورة الحشر19]
ژباړه: تاسو مه جوړيږئ په شان د هغو خلګو چي الله پاک يې هېرکړی دی نو دوی ځانونه هېرکړيدي، دوی هغه خلګ دي چي د الله د اطاعت څخه وتلي دي.
أَلَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلا يَكُونُوا كَالَّذِينَ أُوتُوا الْكِتَابَ مِنْ قَبْلُ فَطَالَ عَلَيْهِمُ الأَمَدُ فَقَسَتْ قُلُوبُهُمْ وَكَثِيرٌ مِنْهُمْ فَاسِقُونَ.[سوره الحديد]
آيا نه دی نژدې سوی هغه خلګو ته چي ايمان يې راوړی دا چي د دوی زړونه د الله د ذکر لپاره او د هغه حق څخه چي پر دوی نازل سوی دی ووېريږي، او د هغو خلګو په ډول نسي کوم چي دوی ته مخکي کتاب ورکړل سو، بيا پر دوی باندي زمانه اوږده سوه (يعني د دوی او أنبياؤ ترمينځ ډېره زمانه تېره سوه) نو د دوی زړونه کلک سوه او ډېری د دوی فاسقان دي.
په پورته آیتونو کي الله پاک مسلمانان د دې څخه منع کوي چي ځانونه دي د کفارو غوندي جوړ کړي.
3.  د نوروز په لمانځلوکي د کفارو لوري ته شوق او ميلان دی او الله پاک مسلمانان ددې څخه په ښکاره منع کړېده، فرق نلري که ميلان دوی ته په دوستۍ باندي وي، که د اسلام په هکله د دوی د خبرو په منلو باندي وي اوکه د دوی په کارونو باندي په خوشاله کېدلو باندي وي.
الله جل جلاله فرمایي:
وَلَا تَرْكَنُوا إِلَى الَّذِينَ ظَلَمُوا فَتَمَسَّكُمُ النَّارُ وَمَا لَكُمْ مِنْ دُونِ اللَّهِ مِنْ أَوْلِيَاءَ ثُمَّ لَا تُنْصَرُونَ.[هود113]
ژباړه: تاسو ميلان مکوئ هغوکسانو ته چي ظلم يې کړی(کافران سويدي) نو اور به مو مسه کړي، او تاسو لره بېله الله بل هيڅ دوست نسته بيا به ستاسو هيڅ نصرت ونسي.
پدې آیت کي الله پاک مسلمانان کفارو ته د شوق کولو او میلان کولو څخه منع کړيدي.
4. د نوروز په لمانځلوکي دکفارو سره مشابهت دی، او د هغه څخه رسول الله صلي الله عليه وسلم خپل امت منع کړی دی.
رسول الله صلی الله علیه وسلم فرمایي:
• عن عمرو بن شعيب عن أبيه عن جده : أن رسول الله صلى الله عليه و سلم قال ليس منا من تشبه بغيرنا لا تشبهوا باليهود ولا بالنصاري.[سنن ترمذي 2695]
ژباړه: عمرو بن شعيب د خپل پلار څخه هغه دده د نيکه څخه روايت کوي چي رسول الله صلی الله عليه وسلم وفرمايل: زموږ څخه ندی هغه څوک چي ځان د غير سره زموږ(چي کافران دي) مشابه کوي ، د يهودو او نصاراوو سره مشابهت مکوئ.
• عَنِ ابْنِ عُمَرَ قَالَ قَالَ رَسُولُ اللَّهِ -صلى الله عليه وسلم- « مَنْ تَشَبَّهَ بِقَوْمٍ فَهُوَ مِنْهُمْ ».[سنن ابي داود 4033]
ژباړه: هرڅوک چي ځان د يوقوم سره مشابه کړي دی د هماغه قوم څخه شمېرل کيږي.
په پورته احادیثو کي رسول الله صلی الله علیه وسلم مسلمانان د کفارو سره د مشابهت څخه منع کړیدي.

5. د نوروز ورځي پر لمانځلو باندي عملا د رسول الله صلي الله عليه وسلم لخوا بنديز لګېدلی دی: 

عَنْ أَنَسٍ قَالَ قَدِمَ رَسُولُ اللَّهِ -صلى الله عليه وسلم- الْمَدِينَةَ وَلَهُمْ يَوْمَانِ يَلْعَبُونَ فِيهِمَا فَقَالَ: مَا هَذَانِ الْيَوْمَانِ؟ قَالُوا كُنَّا نَلْعَبُ فِيهِمَا فِى الْجَاهِلِيَّةِ. فَقَالَ رَسُولُ اللَّهِ -صلى الله عليه وسلم- :إِنَّ اللَّهَ قَدْ أَبْدَلَكُمْ بِهِمَا خَيْرًا مِنْهُمَا يَوْمَ الأَضْحَى وَيَوْمَ الْفِطْرِ.

ژباړه: انس رضي الله عنه فرمايي: کله چي رسول الله صلي الله عليه وسلم مدينې منورې ته راغی، د مدينې خلګو دوې ورځي لمانځلې او په هغو کي يې لوبي کولې، رسول الله صلي الله عليه وسلم وفرمايل: دا کومي ورځي دي؟ دوی ورته وويل: موږ د جاهليت په وخت کي (يعني مخکي تر اسلام) دا ورځي لمانځلې او لوبي مو پکښې کولې. رسول الله صلی الله عليه وسلم ورته وفرمايل: الله پاک تاسو ته ددغه دوو ورځو په بدل کي دوې نوري ورځي چي تر دغه دوو ورځو ډېري ښې دي درکړي چي د لوی او کوچني اخترونو ورځي دي.

د رسول الله صلي الله عليه وسلم د حديث ددې جزء "قد ابدلکم بهما" له ورايه ښکاري چي د لوی او کوچني اخترونو ورځي د هغو دوو ورځو په بدل کي ورکول سويدي، معلومه خبره ده چي د بدل ورکولو وروسته، مبدل منه چي هغه پخوانۍ ورځي دي وروسته پر خپل حال باندي نسي پاته کېدلای. 

نو د نوروز او ميزان ورځي حرامي سوې پر ځای يې د لوی اوکوچني اخترونو ورځي کښيښودل سوې.

6. د نوروز د ورځي لمانځل صحابه کرامو غندلي او مسلمانان يې د لمانځلوڅخه وېرولي دي.

• عن عبد الله بن عمرو بن العاص _ رضي الله عنه _ قال: من بنى ببلاد الأعاجم وصنع نيروزهم ومهرجانهم  وتشـبه بهم حتى يموت وهو كذلك حشر معهم يوم القيامة. [ سنن البيهقي الكبرى: 9/234،]

ژباړه: د عبدالله بن عمروبن العاص رضي الله عنه څخه روايت دی چي هر څوک د کفارو په ښارونوکي بناء وکړي، د دوی نوروز او ميزان و لمانځي او د دوی سره ځان مشابه کړي ترڅو چي پر دغه حالت باندي مړ کيږي نو دغه سړی به د دوی سره حشر کيږي.

• عن عُمَرَ بْنَ الْخَطَّابِ رَضِىَ اللَّهُ عَنْهُ قَالَ : اجْتَنِبُوا أَعْدَاءَ اللَّهِ فِى عِيدِهِمْ.[رواه البخاري في تاريخه،والبيهقي]

ژباړه: حضرت عمر رضي الله عنه فرمايي: د الله پاک د دښمنانو د اخترونو څخه ځانونه وساتئ.

معلومه خبره ده چي " نوروز" د الله ددښمنانو اختر دی.

7. فقهاء کرامو د قرآن اوحديث څخه په استنباط د نوروز د ورځي لمانځل حرام بللی دی.

• قال المظهر: وفيه دليل على أن تعظيم يوم النيروز والمهرجان ونحوهما منهي عنه وقال أبو حفص الحنفي : من أهدى فيه بيضة لمشرك تعظيما لليوم كفر.[ فيض القدير شرح جامع الصغير]

ژباړه: مظهر ويلي دي: پدې خبره کي دليل دی پردې باندي چي د نوروز اوميزان د ورځو تعظيم منع سوی دی، ابوحفص حنفي ويلي دي: څوک چي د نوروز د تعظيم په نيت يوکافر ته يوه هګۍ ورکړي دی پدې باندي کافر سو.

• ويكفر بخروجه إلى نيروز المجوس والموافقة معهم فيما يفعلونه في ذلك اليوم وبشرائه يوم نيروز شيئا لم يكن يشتريه قبل ذلك تعظيما للنيروز لا للأكل والشرب وبإهدائه ذلك اليوم للمشركين ولو بيضة تعظيما لذلك اليوم.[مجمع الانهرفي شرح ملتقي الابهر- بحرالرائق- الفتاوي الهندية]

ژباړه: کافرکيږي په وتلو سره ونوروز ته د مجوسيانو اوپه موافقت باندي د دوی سره په هغه کارونوکي چي دوی یې پدې ورځ کي کوي. او کافرکيږي په رانيولو سره د يو شي د نوروز په ورځ کوم چي بله ورځ يې نه رانيوی. البته پخاطر ددې تعظيم د نوروز نه پخاطر د خوړلو او څيښولو، همدا راز کافرکيږي کافر ته په سوغات ورکولو پدې ورځ کي کڅه هم يوه هګۍ وي البته پخاطر د تعظيم ددې ورځي.

دنوروز لمانځل حرام دي کڅه هم د کافرانو او مجوسيانو په نيت باندي نه وي، ځکه چي د کافر سره پداسي شيانوکي مشابهت کول نيت نه غواړي، که په نيت باندي وي هغه خو علماء ليکي چي سړی ورباندي کافرکيږي او که بېله نيته وي نو حکم يې حراموالی دی.

د يادوني وړ ده چي دغه ليکنه په شريعت ورځپاڼه کي هم نشر سوېده.