په ځان باور

په ځان باندي باور په ژوند کې د ستريو برياو کليد دی ځکه نو تر څو انسان په ځان باور و نه لري تر هغه وخته په شعوري ډول بريا ته نشي رسېدلای.

په ځان باور په اسلام کې ډېر ارزښت لري ځکه اسلام موږ ته لارښوونه کوي چې تل بايد پیاوړي، پر تصمیم باندي ولاړ او په ځان باورمند وسو تر څو په کارونو کې د تزلزل او شا ته تګ څخه وساتل شو.

په ځان باندي باور د دې سبب جوړيږي چې انسان دي پر الله تعالی توکل وکړي او د ټولو کارونو په کولو کې دي تل چټکه روحيه، خپلواک فکر او قوي تصميم ولري؛  الله تعالی رسول الله صلی الله عليه وسلم ته په خطاب کې فرمايي: فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ.(قرآن، آل عمران: 159) ژباړه کله چې دي تصميم ونيوی نو په الله باندي توکل وکړه يقينا چې توکل کوونکي د الله تعالی خوښيږي. همداسي فرمايي: وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ.(قرآن، آل عمران: 139)ژباړه: مه کمزوري کېږئ او مه غمجن کېږئ که تاسي مؤمنان ياست نو تاسې به لوړ شئ. 

که انسان د ځان په باور کولو سره پر الله تعالی توکل وکړي نو ټول کارونه به يې په خپل وخت کې په تمامه معنی برابر شي؛ په حديث شريف کې راځي: عن عمر بن الخطاب قال : قال رسول الله صلى الله عليه و سلم لو أنكم كنتم توكلون على الله حق توكله لرزقتم كما يرزق الطير تغدو خماصا وتروح بطانا.(سنن ترمذي: 2344) ژباړه: که تاسي پر الله هغه توکل وکړی چې د توکل کولو حق دی، نو هغه به تاسي ته داسي رزق درکړي لکه څرنګه چې مرغانو ته روزي ورکوي، چې سهار وږي ووځي او ماښام ماړه راګرځي.

په ځان باور لاندي څلور مهمي نښي لري:

1 – په ځان باوري انسان تل د زړورتيا او جرئت احساس کوي او هيڅ وخت د هيڅ کار په وړاندي ځان ناتوانه او ضعيف نه احساسوي.

2 – په ځان باوري انسان برياليتوب ته د لاسرسۍ هيله لري او په هر مثبت کار کې چې يې کوي د ميني او لېوالتيا ښکارندويي کوي.

3 – په ځان باوري انسان د مسئوليت آداء کولو روحيه لري او په ژوند کې له نويو حالاتو او ستونزو سره هر ډول مقابله کولای شي.

4 – په ځان باوري انسان د مشرتابه اهليت لري او په مؤثره توګه د مثبتي پايلې سره د خلکو رهبري کولای شي.

مولوي نورالحق مظهري